Kɔmaa menli mɔɔ kulo Gyihova Nyamenle nee ye Edwɛkɛ Baebolo ne la:

Gyisɛse hanle kɛ: “Bɛbanwu nɔhalɛ ne, na nɔhalɛ ne bamaa bɛanyia fanwodi.” (Dwɔn 8:32) Dwenle kɛzi ɛdele nganeɛ wɔ mekɛ mɔɔ limoa mɔɔ ɛnwunle Baebolo ne anu nɔhalɛ ne la anwo nea! Ɛ nye liele kɛ ɛnwunle kɛ wɔ ewiade mɔɔ adalɛ ɛyi nuhua tɛkɛɛ la anu, yɛbahola yɛanwu nɔhalɛ ne la.​—2 Timote 3:1.

Gyihova Nyamenle kulo kɛ yɛnwu nɔhalɛ ne. Na kɛmɔ yɛkulo menli la ati, yɛkulo kɛ yɛka nwolɛ edwɛkɛ yɛkile bɛ. Noko Nyamenle ɛzonlenlɛ kile ninyɛne dɔɔnwo. Ɔwɔ kɛ yɛbɔ mɔdenle yɛbɔ yɛ ɛbɛla kɛ Kilisienema la ɔluakɛ yɛbu Gyihova ngyinlazo ne mɔ kpole. Gyisɛse hilele adenle mɔɔ hyia mɔɔ yɛbahola yɛalua zo yɛamaa Nyamenle anwu kɛ yɛkulo ye la. Ɔhanle kɛ: “Saa bɛdi me mɛla zo a bɛbadɛnla me ɛlɔlɛ ne anu kɛ mɔɔ meli Selɛ ne mɛla zo na mede ye ɛlɔlɛ ne anu la.”​—Dwɔn 15:10.

Gyisɛse kulo ɔ Ze kpalɛ, na ɔyɛ debie biala mɔɔ ɔ Ze kɛha kɛ ɔyɛ la. Saa yɛsukoa Gyisɛse wɔ yɛ ɛbɛlabɔlɛ nu a, Gyihova bahulo yɛ na yɛ nye balie kpalɛ. Kɛ mɔɔ Gyisɛse hanle la, “saa bɛze ninyɛne ɛhye mɔ na bɛyɛ a, bɛ nye balie.”​​—Dwɔn 13:17.

Yɛ nye la kɛ buluku ɛhye baboa wɔ yeamaa wɔazukoa kɛ ɛbava Baebolo ne anu nɔhalɛ ne wɔabɔ wɔ ɛbɛla na wɔayɛ Nyamenle agɔnwo. Yɛ asɔneyɛlɛ a le kɛ ɛbanyia Nyamenle anwo ɛlɔlɛ kpole amaa wɔadɛnla ‘Nyamenle ɛlɔlɛ ne anu wɔahɔwie dahuu ngoane nu.’​​—Dwuudu 21.