Ewule angɔbɛnzi a le ngoane. Ewule le kɛ nafelɛ kpole la. (Dwɔn 11:11-14) Mowuamra ɛngola ɛnde edwɛkɛ, bɛnnwu debie, bɛndendɛ, anzɛɛ bɛndwenle debie biala anwo. (Nolobɔvo ne 9:5, 10) Adalɛ ɛzonlenlɛ kilehile kɛ mowuamra kɔ sunsum ewiade bie anu na bɛ nee bɛ mgbanyima mɔɔ bɛwu la kɔtɛnla. Baebolo ne ɛngilehile zɔ.

Menli mɔɔ ɛwu la ɛngola ɛmboa yɛ, yɛɛ bɛngola bɛmboda yɛ. Menli yɛ maandeɛ ngakyile kpa munzule mɔɔ bɛdie bɛdi kɛ ɔbazɔ menli mɔɔ ɛwu la anye a. Ɛhye ɛnzɔ Nyamenle anye ɔluakɛ ɔgyi Seetan adalɛbɔlɛ ne ko azo. Ɔnrɛhola ɔnrɛzɔ mowuamra noko anye ɔluakɛ ngoane ɛnle bɛ nu. Ɔnle kɛ yɛsulo anzɛɛ yɛsonle mowuamra. Ɔwɔ kɛ yɛsonle Nyamenle angomekye.​—Mateyu 4:10.

Mowuamra badɛnla aze bieko. Gyihova badwazo mowuamra ara ngoane nu wɔ paladaese azɛlɛ ne azo. Mekɛ zɔhane ɛtɛbale. (Dwɔn 5:28, 29; Gyima ne 24:15) Nyamenle bahola adwazo menli mɔɔ ɛwu la kɛ mɔɔ ɛdawɔ ɛbahola wɔadunwue awie wɔavi nafelɛ nu ala la.​—Maake 5:22, 23, 41, 42.

Adwenle mɔɔ kile kɛ yɛnwu la le adalɛ mɔɔ Seetan Abɔnsam a ɛlɛmaa yeasalo a. Seetan nee ye sunsum ɛtane ne mɔ maa menli dwenle kɛ mowuamra sunsum de aze na bɛmɛ a bɛfa ngyegyelɛ nee anwodolɛ dɔɔnwo bɛba a. Seetan dua ɛlalɛ yɛɛ ɛnyelɛzodeɛnwunlɛ zo bɛlɛbɛla menli. Gyihova tendɛ tia bɛdabɛ mɔɔ bɛbɔ mɔdenle kɛ bɛ nee mowuamra tendɛ la.​—Mɛla ne 18:10-12.