Ɛbahola wɔazukoa Gyihova anwo debie ɔlua Baebolo ne mɔɔ ɛbagenga la azo. Mekɛ tendenle mɔɔ ɛze ɛhɔ la Nyamenle kpale menli bie maanle bɛhɛlɛle ye nzuzulɛ bɛdole ɛkɛ. Bɛfɛlɛ zɔhane buluku ne Baebolo. Ɛnɛ yɛsukoa Nyamenle anwo debie ɔlua Baebolo ne mɔɔ yɛkenga la azo. Kɛmɔ Gyihova edwɛkɛ, anzɛɛ nrɛlaleɛ a wɔ Baebolo ne anu la ati, bɛfɛlɛ ye Nyamenle Edwɛkɛ. Yɛkola yɛdie mɔɔ Baebolo ne ka la yɛdi ɔluakɛ Gyihova ɛmbɔ adalɛ. “Nyamenle ɛngola ɛmbɔ adalɛ.” (Hibuluma 6:18) Nyamenle Edwɛkɛ ne le nɔhalɛ.​—Dwɔn 17:17.

Baebolo ne le Nyamenle ahyɛlɛdeɛ mɔɔ sonle bolɛ la anu ko. Ɔle kɛ kɛlata mɔɔ selɛ kulovolɛ bie ɛhɛlɛ ɛhɔmaa ɔ mra la. Ɔka ɛwɔkɛ mɔɔ Nyamenle ɛbɔ kɛ ɔkakyi azɛlɛ ne yeamaa yeayɛ paladaese la anwo edwɛkɛ. Ɔka ninyɛne mɔɔ yeyɛ ye dɛba, mɔɔ ɔlɛyɛ ye kɛkala nee mɔɔ ɔbayɛ ye kenle bie yeamaa ɔ mra mɔɔ di nɔhalɛ la anwo edwɛkɛ. Eza ɔboa yɛ ɔmaa yɛkola yɛdi yɛ ngyegyelɛ ngakyile nwo gyima na yɛnyia anyelielɛ.​—2 Timote 3:16, 17.

 Gyihova Alasevolɛ le Nyamenle agɔnwo mɔ; bɛbaboa wɔ bɛamaa wɔade mɔɔ Baebolo ne kilehile la abo. Wɔmɔ ka kile bɛ kɛ ɛkulo kɛ ɛsukoa Baebolo ne. Bɛnrɛlie wɔ ezukoa biala. (Mateyu 10:8) Eza noko, ɛbahola wɔahɔ Kilisiene nyianu ne mɔ bie. Bɛyɛ ayia ɛhye mɔ wɔ ɛleka mɔɔ bɛsonle mɔɔ bɛfɛlɛ ye Belemgbunlililɛ Asalo la. Saa ɛkɔ Kilisienema nyianu a, Nyamenle anwo ndelebɛbo mɔɔ ɛlɛ ye la bayɛ kpole.

Ɛbahola wɔazukoa Nyamenle anwo debie wɔavi ninyɛne mɔɔ yebɔ la anu. Kɛ neazo la, Baebolo ne se: “Nyamenle bɔle anwuma nee aze.” (Mɔlebɛbo 1:1) Mekɛ mɔɔ Gyihova bɔle “anwuma” ne la, ɔyɛle sɛnzɛne ne. Duzu a ɛhye ka ye wɔ Nyamenle anwo a? Ɔmaa yɛnwu ye kɛ Gyihova lɛ tumi kpole. Ɔ ngomekye ala a ɔbahola yeayɛ debie mɔɔ lɛ tumi kɛ sɛnzɛne ne la a. Eza ɔmaa yɛnwu kɛ Gyihova le nrɛlɛbɛvolɛ, ɔluakɛ ɛnee nrɛlɛbɛ nwo hyia na yeahola yeayɛ sɛnzɛne ne, mɔɔ maa yɛ wuluwulu nee wienyi noko ɔnwie ɛlɛ la.

Gyihova abɔdeɛ kile kɛ ɔkulo yɛ. Suzu mbakama ngakyile mɔɔ wɔ azɛlɛ ye azo la anwo nea. Anrɛɛ Gyihova bahola amaa yɛ bakama kokye ala​—anzɛɛ ɔnrɛmaa yɛ bie fee. Noko, Gyihova maanle yɛ mbakama ngakyile dɔɔnwo mɔɔ asolo biala kpole, ye kɔla, nee kɛzi ye fɛlɛko de la. Ɛhye kile kɛ Gyihova ɛnle Nyamenle mɔɔ lɛ ɛlɔlɛ ala emomu eza ɔ sa nu do, ɔsuzu yɛ nwo na ɔyɛ nyele noko.​—Edwɛndolɛ 104:24.