Gyisɛse Kelaese le Gyihova Ara nee ɔ gɔnwo mɔɔ bikye ye na ɔkulo ye kpalɛ. Kolaa na Gyisɛse ara azɛlɛ ye azo kɛ sonla la, ɛnee ɔwɔ anwuma kɛ sunsum nu abɔdeɛ mɔɔ lɛ tumi. (Dwɔn 17:5) Akee ɔrale azɛlɛ ye azo kɛ ɔbahilehile menli Nyamenle anwo nɔhalɛ ne. (Dwɔn 18:37) Eza ɔvale ye dasanli ngoane ɔmaanle amaa yealie alesama mɔɔ yɛ tieyɛ la yeavi ɛtane nee ewule nu. (Wulomuma 6:23) Kɛkala Gyisɛse a le Nyamenle Belemgbunlililɛ ne, anwuma arane mɔɔ bava Paladaese ara azɛlɛ ye azo la azo Belemgbunli a.​—Yekile 19:16.

Anwumabɔvolɛ ne mɔ noko le Nyamenle agɔnwo. Anwumabɔvolɛ ne mɔ ɛnle menli mɔɔ dɛnlanle azɛlɛ ye azo a. Bɛbɔle bɛ wɔ anwuma kolaa na Nyamenle ayɛ azɛlɛ ne. (Dwobu 38:4-7) Anwumabɔvolɛ mgbe dɔɔnwo a wɔ ɛkɛ a. (Daneɛle 7:10) Nyamenle agɔnwo ɛhye mɔ mɔɔ wɔ anwuma la kpondɛ kɛ menli sukoa Gyihova anwo nɔhalɛ ne.​—Yekile 14:6, 7.

Nyamenle eza lɛ ɔ gɔnwo mɔ wɔ azɛlɛ ye azo; ɔfɛlɛ bɛ ye alasevolɛ. Dasevolɛ kɔ kɔɔto a ɔka awie anzɛɛ debie mɔɔ ɔze ye la anwo edwɛkɛ. Gyihova Alasevolɛ ka mɔɔ bɛze ye wɔ Gyihova nee ye bodane ne anwo la bɛkile awie mɔ. (Ayezaya 43:10) Alasevolɛ ne mɔ kpondɛ kɛ bɛboa wɔ bɛmaa ɛsukoa Gyihova anwo nɔhalɛ ne kɛ mɔɔ anwumabɔvolɛ ne mɔ yɛ la. Bɛkpondɛ kɛ ɛdawɔ noko ɛyɛ Nyamenle agɔnwo.