Agɔnwolɛvalɛ gyi ɛlɔlɛ zo. Mekɛ mɔɔ ɛlɛsukoa Gyihova anwo debie dɔɔnwo la, ɛbanyia ɛlɔlɛ kpole wɔamaa ye. Mekɛ mɔɔ ɛlɔlɛ mɔɔ ɛlɛ ɛmaa Gyihova la ɛlɛyɛ kpole la, ɛhulolɛ mɔɔ ɛlɛ kɛ ɛbazonle ye la noko bayɛ kpole. Ɛhye bamaa wɔayɛ Gyisɛse Kelaese ɛdoavolɛ. (Mateyu 28:19) Saa ɛboka Gyihova Alasevolɛ abusua ne mɔɔ lɛ anyelielɛ la anwo a, ɛbahola wɔayɛ Nyamenle agɔnwo dahuu. Duzu a ɔwɔ kɛ ɛyɛ a?

Di Nyamenle mɛla ne mɔ azo fa kile kɛ ɛkulo ye. “Ɛhye a Nyamenle anwo ɛlɔlɛ kile a, kɛ yɛkɛli ye mɛla ne mɔ azo; yɛɛ ye mɛla ne mɔ ɛnle adesoa.”​—1 Dwɔn 5:3.

Fa mɔɔ ɛbazukoa la di gyima. Gyisɛse hanle edwɛkɛ bie mɔɔ kilehile ɛhye anu la. Nrɛlɛbɛvolɛ bie zile ye sua wɔ bodane zo. Koasea bie zile ye sua wɔ ɛnwea nu. Mekɛ mɔɔ ahumu kpole dule la, sua ne mɔɔ gyi bodane ne azo la ambu, noko sua ne mɔɔ bɛzile ye wɔ ɛnwea ne anu la bule na ɔzɛkyele bɔkɔɔ. Gyisɛse hanle kɛ bɛdabɛ mɔɔ bɛtie ye edwɛkɛ na bɛdi zolɛ la le kɛ nrɛlɛbɛvolɛ ne mɔɔ zile ye sua wɔ bodane ne azo la. Na bɛdabɛ mɔɔ bɛtie ye edwɛkɛ ne na bɛnli zolɛ la le kɛ koasea ne mɔɔ zile ye sua wɔ ɛnwea ne anu la. Bɛ nuhua boni a ɛkulo kɛ ɛsukoa ye a?​—Mateyu 7:24-27.

 Bɛnwozoyilalɛ. Ɛhye kile kɛ ɛka wɔahile Gyihova wɔ asɔneyɛlɛ nu kɛ ɛkpondɛ kɛ ɛyɛ ye ɛhulolɛdeɛ dahuu. Nyamenle ɛhulolɛdeɛ mɔɔ ɛbayɛ la bahile kɛ ɛle Gyisɛse Kelaese ɛdoavolɛ.​—Mateyu 11:29.

Ɛzɔnenlɛ. “Maa bɛzɔne wɔ na bɔ ye duma fa wowo wɔ ɛtane ne mɔ.”​—Gyima ne 22:16.

Fa ɛ nwo wula Nyamenle ɛzonlenlɛ nu kpalɛ. “Debie biala mɔɔ bɛyɛ la, bɛvi ɛkɛla muala anu bɛyɛ kɛ asɛɛ bɛyɛ bɛamaa Gyihova, na tɛ menli ɔ.”​—Kɔlɔsaema 3:23.