Ninyɛndane mɔɔ ɛlɛsisi wɔ azɛlɛ ye azo kɛkala la kile kɛ Paladaese ɛbikye. Baebolo ne hanle kɛ ɔka ekyii Paladaese ne ba a Ninyɛndane bahɔ zo. Yɛde mekɛ zɔhane anu kɛkala! Ninyɛne mɔɔ Baebolo ne hanle kɛ bɛbara la bie mɔ a wɔ ɛke la:

Konle mgbole. “Maanle badwazo atia maanle yɛɛ belemgbunlililɛ badwazo atia belemgbunlililɛ.” (Mateyu 24:7) Ngapezo ɛhye ɛra nu. Ɔvi ɛvolɛ 1914, bɛho ewiade konle mgbole nwiɔ yɛɛ ngyikyi dɔɔnwo. Menli mgbe dɔɔnwo ɛwu wɔ konle ɛhye mɔ anu.

Ewule ngakyile. “Ewulenzane bara ɛleka ɛleka.” (Luku 21:11) Asoo ɛhye ɛra nu? Ɛhɛe. Kansa, ahonle ewule, avinli ewule, ebunlu, AIDS, nee ewule gyɛne mɔɔ ɛha la ɛhu menli mgbe dɔɔnwo.

Ɛhɔne. Wɔ azɛlɛ ye azo ɛleka dɔɔnwo menli ɛnnyia aleɛ mɔɔ sa bɛ la ɛnli. Ɛvolɛ biala ɛhɔne ku menli dɔɔnwo. Ɛhye le sɛkɛlɛneɛ bieko mɔɔ kile kɛ ɔnrɛhyɛ na Paladaese ne ara. Baebolo ne se: “Ɛhɔne bara.”​—Maake 13:8.

 Azɛlɛkpusulɛ. “Azɛlɛkpusulɛ bara ɛleka dɔɔnwo.” (Mateyu 24:7) Ɛhye noko ɛra nu wɔ yɛ mekɛ ye azo. Ɔvi ɛvolɛ 1914, menli mɔɔ bo mgbe la ɛwu wɔ azɛlɛkpusulɛ nu.

Amumuyɛma. Menli bayɛ “ezukoa nwo anyebolo” yɛɛ “angomedi.” “Bɛbahulo anyelielɛ bɛadɛla Nyamenle.” Ngakula “bɛayɛ bɛ awovolɛ nwo anzosesebɛ.” (2 Timote 3:1-5) Asoo ɛnlie ɛndo nu kɛ ɛnɛ menli dɔɔnwo wɔ ɛkɛ ne mɔɔ le zɔhane ɔ? Bɛmbu Nyamenle, yɛɛ bɛgyegye menli mɔɔ bɔ mɔdenle kɛ bɛsukoa Nyamenle anwo debie la.

Ɛtanelilɛ. Eza noko “ɛtaneyɛlɛ bazo.” (Mateyu 24:12) Ɛbalie wɔado nu kɛ ɛtaneyɛlɛ ɛhɔ ɔ nyunlu ɛdɛla mekɛ bie mɔɔ ɛze ɛhɔ la. Ɛleka biala bɛkola bɛwua menli, bɛsisi bɛ anzɛɛ bɛboda bɛ.

Ninyɛne ɛhye mɔ kɔsɔɔti kile kɛ Nyamenle Belemgbunlililɛ ne ɛbikye. Baebolo ne se: “Saa bɛnwu kɛ ninyɛne ɛhye mɔ ɛlɛsisi a, bɛnwu ye kɛ Nyamenle Belemgbunlililɛ ne ɛbikye.” (Luku 21:31) Nyamenle Belemgbunlililɛ ne a le duzu? Ɔle Nyamenle anwuma arane ne mɔɔ bava Paladaese ara azɛlɛ ɛhye azo la. Nyamenle Belemgbunlililɛ ne barali alesama arane agyakɛ anu.​—Daneɛle 2:44.