Saa ɛlɛ ɛ gɔnwo mɔɔ ɛkulo ye edwɛkɛ na ɛbu ye a, ɛbɔ mɔdenle kɛ ɛbayɛ kɛ ɔdaye la. Baebolo ne se: “[Gyihova, NW] le kpalɛ nee tenlene.” (Edwɛndolɛ 25:8) Saa yɛbayɛ Nyamenle agɔnwo a, ɔwɔ kɛ yɛyɛ kpalɛ nee tenlene. Baebolo ne se: “Bɛzukoa Nyamenle kɛ mralɛ kulovolɛma, na bɛhɔ zo bɛbɔ bɛ ɛbɛla wɔ ɛlɔlɛ nu.” (Ɛfɛsɛsema 5: 1, 2) Ndenle mɔɔ ɛbahola wɔalua zo wɔayɛ zɔ la bie mɔ a wɔ ɛke la:

Boa awie mɔ. “Bɛmaa yɛyɛ kpalɛ yɛmaa menli kɔsɔɔti.”​—Galeehyeama 6:10.

Yɛ gyima ɛsesebɛ. “Mɔɔ le awule la mmawua bieko; emomu ɔyɛ gyima ɛsesebɛ.”​—Ɛfɛsɛsema 4:28.

Maa ɛ nwo ɛde wɔ nwonane nee ɛbɛlabɔlɛ nu. “Bɛmaa yɛwowo yɛ nwo wɔ nwonane nee sunsum nu evinli biala anwo, amaa yɛ nwo ade kpalɛ wɔ Nyamenle ɛzulolɛ nu.”​—2 Kɔlentema 7:1.

 Kulo wɔ mbusuafoɔ na di bɛ eni. “Ɔwɔ kɛ bɛ nuhua ko biala kulo ɔ ye kɛ ɔdaye ɔ nwo; na yelɛ noko nyia ɛbulɛ kpole maa ɔ hu. Ngakula, bɛdie bɛ awovolɛ.”​—Ɛfɛsɛsema 5:33–6:1.

Kulo menli gyɛne. “Bɛmaa yɛhɔ zo yɛhulo yɛ nwo ngoko, ɔluakɛ ɛlɔlɛ vi Nyamenle.”​—1 Dwɔn 4:7.

Di maanle ne mɛla zo. “Bɛmaa awie biala ɛbɛlɛ ɔ nwo aze ɛmaa tumivolɛma [arane] . . . Bɛdua adwule bɛmaa mɔɔ adwule fɛta ye la.”​—Wulomuma 13:1, 7.