ƐTE ampolo kpole bie mɔɔ ɛbolo la. Ɛfunvua kolaa na wɔava wɔaboka dɔɔnwo ne mɔɔ wɔ kɛndɛne ne anu la anwo. Wɔyɛ gyima dɔnehwele dɔɔnwo noko ɛtɛtele ɛvɛlɛ nganeɛ yɛɛ ɛnyia gyima bieko a ɛbayɛ. Ɛ nli nee abusua ne anu amra yɛɛ agɔnwolɛma bie mɔ mɔɔ bɛlɛboa bɛamaa bɛade ampolo ne la wɔ baka bie mɔɔ bikye wɔ la abo, bɛlɛbɔ adawu na bɛ nye ɛlie. Ɔtɛde bɛlɛra kɛmɔ ɛnwunle ye wɔ mekɛ mɔɔ ɛnee ɛle kakula wɔ ɛvolɛ dɔɔnwo mɔɔ ɛze anu la. Ɔyɛ se kɛ ɛbalie wɔali kɛ ɛnwunle kɛ ɔlɛyɛ kpanyinli wɔ ewiade zɔhane mɔɔ kɛkala ɛpɛ nu la anu. Ɛnwunle kɛ anwodolɛ manle ɔnwanle, ɛzɔle ɔ sa wɔ mekɛ mɔɔ ɔliele ye ɛnwomenle mɔɔ li awieleɛ, na ɛzunle wɔ ye nla ne azo. Noko yemɔ a wɔnwu ye bieko la, ɔ nee menli gyɛne dɔɔnwo de ngoane nu na bɛte kpɔkɛ!

Yɛze kɛ mekɛ zɔhane bara ɔluakɛ Nyamenle ɛwɔkɛ ne mɔ ba nu dahuu. Yɛbazuzu kɛzi Belemgbunlililɛ ɛwɔkɛ ne mɔ bara nu kenlensa ye na yeahɔwie Amagɛdɔn la anwo wɔ foa ɛhye anu. Eza yɛbazuzu Belemgbunlililɛ ɛwɔkɛ ne mɔ mɔɔ yɛ anyelielɛ mɔɔ bara nu wɔ ɛhye anzi la anwo. Nea kɛzi yɛ nye balie kɛ yɛbanwu mekɛ mɔɔ Nyamenle Belemgbunlililɛ ne bali tumi wɔ azɛlɛ ye kɔsɔɔti azo na yeayɛ ninyɛne kɔsɔɔti fofolɛ la!