ƐZUKOALƐDEƐ 21
Kɛzi Bɛlɛbɔ Edwɛkpa Ne Nolo Ɛ?
Ɔnrɛhyɛ Gyihova balua ye Belemgbunlililɛ ne azo aye yɛ ngyegyelɛ kɔsɔɔti avi ɛkɛ. Ɛhye le edwɛkpa mɔɔ ɔwɔ kɛ awie biala te a. Ɛnee Gyisɛse kulo kɛ ye ɛdoavolɛma ka edwɛkɛ ɛhye kile awie biala! (Mateyu 28:19, 20) Kɛzi Gyihova Alasevolɛ ɛlɛyɛ mɔɔ Gyisɛse hanle la ɛ?
1. Kɛzi Mateyu 24:14 ɛlɛba nu ɛnɛ ɛ?
Gyisɛse hanle kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala.” (Mateyu 24:14) Gyihova Alasevolɛ anye die kɛ bɛlɛyɛ gyima ɛhye mɔɔ anwo hyia la. Yɛlɛbɔ edwɛkpa ne nolo wɔ aneɛ mɔɔ bo 1,000 la anu wɔ ewiade amuala! Gyima kpole ɛhye hyia mɔdenlebɔlɛ nee ngyehyɛleɛ kpalɛ. Gyihova amboa yɛ a yɛnrɛhola ye yɛ.
2. Mɔdenle boni a yɛbɔ yɛdi menli daselɛ a?
Yɛka edwɛkɛ ne wɔ ɛleka biala mɔɔ menli wɔ la. Yɛka edwɛkɛ ne wɔ “azua nu” kɛ mɔɔ alimoa Kilisienema ne yɛle la. (Gyima ne 5:42) Adenle kpalɛ ɛhye maa yɛkola yɛka edwɛkɛ ne yɛkile menli mgbe dɔɔnwo ɛvolɛ biala. Kɛmɔ menli ɛnda ɛnle sua nu la ati, eza yɛka edwɛkɛ ne wɔ bagua nu. Dahuu yɛkpondɛ ndenle yɛdua zo yɛka Gyihova nee ye bodane ne anwo edwɛkɛ yɛkile awie mɔ.
3. Nwane a ɔle ye gyima kɛ ɔbɔ edwɛkpa ne nolo a?
Ɔwɔ kɛ nɔhalɛ Kilisienema kɔsɔɔti bɔ edwɛkpa ne nolo kile awie mɔ. Yɛfa gyima ɛhye anyebolo zo. Yɛbɔ mɔdenle biala mɔɔ yɛbahola la yɛka edwɛkɛ ne ɔluakɛ yɛnwu kɛ menli ngoane la esiane nu. (Kenga 1 Timote 4:16.) Bɛndua yɛ kakɛ wɔ gyima ɛhye anwo, ɔluakɛ Baebolo ne ka kɛ: “Bɛnyianle ye mgbane, bɛva bɛmaa mgbane.” (Mateyu 10:7, 8) Tɛ awie biala a anye die yɛ edwɛkɛ ne anwo a. Noko yɛkɔ zo yɛka ɔluakɛ edwɛkɛhanlɛ ne boka yɛ ɛzonlenlɛ ne anwo yɛɛ ɔmaa Gyihova anye die.
SUKOA DƆƆNWO
Sukoa mɔdenle mɔɔ Gyihova Alasevolɛ ɛlɛbɔ aha edwɛkɛ ne wɔ ewiade amuala la anwo ninyɛne dɔɔnwo, na nea kɛzi Gyihova boa yɛ la.
Bɛlɛka edwɛkɛ ne wɔ ewiade amuala: (A) Costa Rica, (B) United States, (D) Benin, (Ɛ) Thailand, (E) Yap, (F) Sweden
4. Yɛbɔ mɔdenle kpalɛ yɛdi menli kɔsɔɔti daselɛ
Gyihova Alasevolɛ bɔ mɔdenle kpalɛ ka edwɛkpa ne kile menli wɔ ɛleka biala. Ye VIDIO ne, na akee bɛzuzu kpuya ɛhye anwo.
-
Duzu a ɛ nye die nwo wɔ mɔdenle mɔɔ Gyihova Alasevolɛ ɛlɛbɔ aha edwɛkɛ ne la anwo a?
Kenga Mateyu 22:39 yɛɛ Wulomuma 10:13-15, na akee bɛzuzu kpuya ɛhye mɔ anwo:
-
Kɛzi yɛ daselɛlilɛ gyima ne kile kɛ yɛkulo yɛ gɔnwo mɔ ɛ?
-
Kɛzi Gyihova bu menli mɔɔ bɔ edwɛkpa ne nolo la ɛ? —Nea ngyɛnu 15.
5. Nyamenle le yɛ gɔnwo gyimayɛvo
Anwubielɛ dɔɔnwo kile kɛ Gyihova ɛlɛkile yɛ gyima ne adenle. Kɛ neazo la, wɔ New Zealand, adiema nrenyia bie mɔɔ bɛfɛlɛ ye Paul la yiale raalɛ bie wɔ mekɛ mɔɔ ɔlɛyɛ azua nu daselɛlilɛ gyima ne wɔ kenle ko ewiazo la. Zɔhane nwonlomɔ ne, ɛnee raalɛ ne ɛbɔ Nyamenle duma Gyihova ne na yezɛlɛ ye kɛ ɔmaa awie ɛrakpɔla ye. Paul hanle kɛ: “Dɔnehwele nsa pɛle nu la ɛnee megyi ye anlenkɛ ne anloa.”
Kenga 1 Kɔlentema 3:9, na akee bɛzuzu kpuya ɛhye anwo:
-
Kɛzi anwubielɛ ngakyile le kɛ mɔɔ zile wɔ New Zealand la kile kɛ Gyihova ɛlɛkile edwɛkɛhanlɛ gyima ne adenle ɛ?
Kenga Gyima ne 1:8, na akee bɛzuzu kpuya ɛhye anwo:
-
Duzu ati a yɛhyia Gyihova moalɛ amaa yɛahola yɛayɛ yɛ daselɛlilɛ gyima ne a?
Asoo ɛze?
Dapɛne biala, yɛnyia ndetelɛ mɔɔ boa ɔmaa yɛka edwɛkɛ ne la wɔ yɛ dapɛne avinli debiezukoalɛ ne abo. Saa wɔhɔ debiezukoalɛ ɛhye mɔ bie ɛlɛ a, kɛzi ɛnwu ndetelɛ mɔɔ bɛfa bɛmaa la ɛ?
6. Yɛtie Nyamenle mɔɔ ɔse yɛha edwɛkɛ ne la
Wɔ ɛvoya mɔɔ limoa la anu, dwazotiama bɔle mɔdenle kɛ bɛmaa Gyisɛse ɛdoavolɛma agyakyi edwɛkɛhanlɛ ne. Alimoa Kilisienema gyinlanle adenle mɔɔ bɛlɛ kɛ bɛka edwɛkɛ ne la anzi ɔlua ‘edwɛkpa ne mɔɔ bɛluale mɛla adenle zo bɛvale bɛziele ɛkɛ ne la’ azo. (Felepaema 1:7) Zɔhane ala a Gyihova Alasevolɛ yɛ ye ɛnɛ a. a
Kenga Gyima ne 5:27-42, na akee bɛzuzu kpuya ɛhye anwo:
-
Duzu ati a yɛnrɛgyakyi edwɛkɛhanlɛ gyima ne a?—Nea ngyehyɛnu 29, 38 yɛɛ 39.
BIE A AWIE BABIZA KƐ: “Duzu ati a Gyihova Alasevolɛ kɔ awie mɔ azua nu a?”
-
Kɛzi ɛbaye ɔ nloa ɛ?
EDWƐKƐ TITILI
Gyisɛse hanle hilele ye ɛdoavolɛma kɛ bɛbɔ edwɛkpa ne nolo wɔ maanle maanle kɔsɔɔti anu. Gyihova ɛlɛboa ye menli ne yeamaa bɛayɛ gyima ɛhye.
Ndinu
-
Kɛzi bɛlɛbɔ edwɛkpa ne nolo wɔ ewiade amuala ɛ?
-
Kɛzi yɛ daselɛlilɛ gyima ne kile kɛ yɛkulo yɛ gɔnwo mɔ ɛ?
-
Ɛnea a edwɛkɛhanlɛ gyima ne maa yɛ nye die ɔ? Duzu ati ɔ?
KPONDƐ DƆƆNWO
Nea kɛzi Gyihova Alasevolɛ ka edwɛkɛ ne wɔ azuamgbole zo la.
Azuamgbole Zo Nee Bagua Nu Daselɛlilɛ Titili Wɔ Paris (5:11)
Kɛzi Gyihova Alasevolɛ ɛlɛboa tutanema ɛ?
Tie kɛzi dahuu ɛzonlenlɛ gyima ne ɛmaa awie anye ɛlie la.
Sukoa kɔɔto konimlilɛ ngakyile mɔɔ ɛboa ɛmaa yɛlɛbɔ edwɛkpa ne nolo la anwo debie.
“Belemgbunlililɛ Edwɛkɛhanlɛma Fa Bɛ Edwɛkɛ Kɔ Kɔɔto” (Nyamenle Belemgbunlililɛ Di Tumi!, tile 13)
a Nyamenle a ɛmaa Gyihova Alasevolɛ adenle kɛ yɛha edwɛkɛ ne a. Ɔti ɔngyia kɛ yɛsɛlɛ adenle yɛfi menli mɔɔ lɛ tumi la ɛkɛ na yɛabɔ edwɛkpa ne nolo.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
