ƐZUKOALƐDEƐ 44
Asoo Nyamenle Anye Die Ɛvoyialilɛ Kɔsɔɔti Anwo?
Gyihova kulo kɛ yɛ nye die wɔ ɛbɛlabɔlɛ nu na ɔdwu mekɛ ne bie bɔbɔ a yɛbɔ nu yɛdie yɛ nye. Noko asoo ɔ nye die ɛvoyialilɛ kɔsɔɔti anwo ɔ? Kɛ ɔkɛyɛ na yɛahile kɛ yɛkulo Gyihova wɔ ɛhye anwo ɛ?
1. Duzu ati a Gyihova anye ɛnlie ɛvoyialilɛ dɔɔnwo anwo a?
Bie a saa ɛnwu kɛ ɛvoyialilɛ dɔɔnwo ɛngyi ngɛlɛlera ne azo anzɛɛ bɛvi awozonle ɛzonlenlɛ nu anzɛɛ adalɛ ɛzonlenlɛ nu a bɛrale a ɔbazi ɛ nwo. Bie a bɛgyi sunsum ɛtane nyɛleɛ anzɛɛ adwenle mɔɔ kile kɛ ɛkɛla ne ɛnwu la azo. Ɛvoyialilɛ bie mɔ gyi diedi mgbane anzɛɛ diedi mɔɔ bɛlɛ kɛ bɛ ti ɛyɛ boɛ la azo. (Ayezaya 65:11) Gyihova ɛbɔ ye azonvolɛ kɔkɔ kɛ: “Bɛvi bɛ avinli na bɛhwe bɛ nwo . . . na bɛmmafa bɛ sa bɛka debie mɔɔ anwo ɛnde la.”—2 Kɔlentema 6:17. a
2. Kɛzi Gyihova bu ɛvoyialilɛ mɔɔ wula sonla anyunlunyia la ɛ?
Gyihova ɛbɔ yɛ kɔkɔ kɛ yɛmmafa ‘yɛ nwo yɛto sonla nwo zo.’ (Kenga Gyɛlɛmaya 17:5.) Ɛvoyialilɛ bie mɔ wula tumivolɛma anzɛɛ sogyama anyunlunyia. Bie mɔ wɔ ɛkɛ a maanle sɛkɛlɛneɛ anzɛɛ fanwodi ti a bɛdi a. (1 Dwɔn 5:21) Bie mɔ noko di maanyɛlɛ anzɛɛ eku bie mɔɔ bɛde la anwo ɛvoyia. Saa yɛwula sonla anzɛɛ ahyehyɛdeɛ bie, titili mɔɔ si adwenle mɔɔ ko tia Gyihova bodane la anyunlunyia a, kɛzi ɔbade nganeɛ wɔ nwo ɛ?
3. Subane boni a kile kɛ ɛvoyialilɛ bie ɛnle kpalɛ a?
Baebolo ne tua “nza dɔɔnwo ɛnlonlɛ, anyelielɛ mgbane mgbane [nee] nzama agɔnwolɛvalɛ.” (1 Pita 4:3) Ɛvoyialilɛ bie mɔ maa menli nyia adenle yɛ mgbane mgbane na bɛbɔ ɛbɛlatane. Ɔwɔ kɛ yɛtwe yɛ nwo yɛfi ɛbɛla zɛhae mɔɔ anwo ɛnde la anwo amaa yɛahɔ zo yɛayɛ Gyihova agɔnwo.
SUKOA DƆƆNWO
Nea kɛzi ɛbahola wɔazi ɛvoyialilɛ nwo kpɔkɛ kpalɛ amaa Gyihova anye alie la.
4. Kpo ɛvoyialilɛ mɔɔ ɛnwula Gyihova anyunlunyia la
Kenga Ɛfɛsɛsema 5:10, na akee bɛzuzu kpuya ɛhye mɔ anwo:
-
Saa yɛlɛsi kpɔkɛ kɛ ɔwɔ kɛ yɛdi ɛvoyia bie anzɛɛ ɔnle kɛ yɛdi bie a, duzu a ɔhyia kɛ yɛnea wɔ nwo a?
-
Ɛvoyia boni mɔ a bɛdi wɔ ɛleka mɔɔ ɛwɔ la a?
-
Ɛnea a Gyihova anye die ɛvoyialilɛ zɔhane mɔ anwo ɔ?
Kɛ neazo la, asoo wɔzuzu kɛzi Nyamenle bu awolɛ kenle ɛlilɛ la anwo ɛlɛ ɔ? Baebolo ne ɛnga kɛ Gyihova sonvolɛ bie lile ye awolɛ kenle, noko ɔka menli nwiɔ mɔɔ ɛnzonle Nyamenle mɔɔ lile awolɛ kenle la anwo edwɛkɛ. Kenga Gyɛnɛsese 40:20-22 yɛɛ Mateyu 14:6-10. Akee bɛzuzu kpuya ɛhye mɔ anwo:
-
Duzu a zile wɔ awolɛ kenle ɛlilɛ nwiɔ ne abo a?
-
Kɛ mɔɔ Baebolo kɛlɛtokɛ ɛhye mɔ kile la, ɛnea a kɛzi Gyihova bu awolɛ kenle ɛ?
Noko bie a ɛbabiza kɛ, ‘Saa medi awolɛ kenle anzɛɛ ɛvoyia bie mɔɔ ɛngyi ngɛlɛlera ne azo la a, asoo ɔle debie mɔɔ hyia Gyihova ɔ?’ Kenga Ɛzɛdɔso 32:1-8. Akee ye VIDIO ne, na akee bɛzuzu kpuya ɛhye mɔ anwo.
-
Duzu ati a ɔwɔ kɛ yɛnwu debie mɔɔ Gyihova die to nu a?
-
Kɛ ɔkɛyɛ na yɛayɛ zɔ ɛ?
Kɛzi yɛbahola yɛanwu ɛvoyialilɛ mɔɔ Nyamenle anye ɛnlie nwo la
-
Ɔgyi adalɛ ngilehilelɛ zo ɔ? Amaa wɔanwu ɛhye la, nea ɛleka mɔɔ ɔ bo vi la.
-
Asoo ɔwula sonla, ahyehyɛdeɛ anzɛɛ maanle sɛkɛlɛneɛ bie anyunlunyia? Gyihova angomekye a yɛwula ye anyunlunyia na yɛfa yɛ nwo to ɔ nwo zo kɛ ɔbali ewiade ngyegyelɛ ne anwo gyima a.
-
Asoo nwolɛ amaamuo nee nyɛleɛ ko tia Baebolo ngyinlazo? Ɔwɔ kɛ yɛkɔ zo yɛmaa yɛ ɛbɛlabɔlɛ nwo te.
5. Boa awie mɔ maa bɛde wɔ diedi ne abo
Saa awie mɔ ɛlɛgyegye yɛ kɛ yɛli ɛvoyia mɔɔ Gyihova anye ɛnlie nwo la bie a, ɔbahola yeayɛ se kɛ yɛbaha kɛ yɛnrɛyɛ. Si abotane dua nrɛlɛbɛ adenle zo kilehile wɔ kpɔkɛzilɛ ne anu. Amaa wɔanwu kɛzi ɛbayɛ ɛhye anwo neazo la, ye VIDIO ne.
Kenga Mateyu 7:12, na akee bɛzuzu kpuya ɛhye mɔ anwo:
-
Kɛ mɔɔ tɛkese ɛhye kile la, asoo ɔwɔ kɛ ɛka ɛkile wɔ mbusuafoɔ mɔɔ bɛnle diedima la kɛ ɔnle kɛ bɛdi ɛvoyia bie ɔ?
-
Duzu a ɛbahola wɔayɛ wɔamaa wɔ mbusuafoɔ anwu kɛ ɛ nee bɛ ɛnrɛbɔ nu ɛnrɛli ɛvoyia bɔbɔ a, ɛkulo bɛ edwɛkɛ yɛɛ ɛdwenle bɛ nwo ɛ?
6. Gyihova kulo kɛ yɛ nye die
Gyihova kulo kɛ yɛ nee yɛ mbusuafoɔ nee yɛ gɔnwo mɔ bɔ nu die yɛ nye. Kenga Nolobɔvo 8:15, na akee bɛzuzu kpuya ɛhye anwo:
-
Kɛzi tɛkese ɛhye kile kɛ Gyihova kulo kɛ yɛ nye die ɛ?
Gyihova kulo kɛ ye menli di fɛlɛko na bɛbɔ nu bɛdie bɛ nye. Ye VIDIO ne na nea kɛzi ɛhye kɔ zo kpalɛ wɔ maanle maanle avinli nyianu bo la.
Kenga Galeehyeama 6:10, na akee bɛzuzu kpuya ɛhye mɔ anwo:
-
Asoo ɔwɔ kɛ yɛdi ɛvoyia bie mɔɔ ɛlie duma la amaa ‘yɛayɛ awie mɔ kpalɛ’ ɔ?
-
Debie ɛhyɛlɛ boni a maa ɛ nye die kpalɛ a—mɔɔ ɛvoyialilɛ bie ati a ɛfa ɛkyɛ anzɛɛ mɔɔ ɛfi wɔ ɛhulolɛ nu ɛfa ɛkyɛ la ɔ?
-
Ɔyɛ a Alasevolɛ dɔɔnwo yɛ ngyehyɛleɛ titili bie maa bɛ mra na bɛkyɛ bɛ debie wɔ mekɛ bɔbɔ mɔɔ bɛ nye ɛnla la. Saa ɛlɛ ngakula a, ninyɛne titili boni mɔ a ɛbahola wɔayɛ wɔamaa bɛ a?
BIE MƆ KA KƐ: “Ɛleka mɔɔ ɛvoyialilɛ bie abo vi la anwo ɛngyia. Mɔɔ hyia la a le kɛ mbusuafoɔ nee agɔnwolɛma babɔ nu alie bɛ nye.”
-
Duzu a ɛbaha a?
EDWƐKƐ TITILI
Gyihova kulo kɛ yɛ nee yɛ mbusuafoɔ nee yɛ gɔnwo mɔ bɔ nu die yɛ nye. Noko eza ɔkulo kɛ yɛtwe yɛ nwo yɛfi ɛvoyialilɛ mɔɔ ɔ nye ɛnlie nwo la anwo.
Ndinu
-
Kpuya boni mɔ a yɛbahola yɛabiza amaa yɛanwu ye saa Gyihova anye die ɛvoyialilɛ bie anwo a?
-
Kɛ ɔkɛyɛ na yɛaboa yɛ mbusuafoɔ nee yɛ gɔnwo mɔ yɛamaa bɛade ɛvoyialilɛ bie anwo kpɔkɛ mɔɔ yɛzi la abo ɛ?
-
Kɛzi ɛkola ɛnwu kɛ Gyihova kulo kɛ yɛ nye die na yɛdi fɛlɛko ɛ?
KPONDƐ DƆƆNWO
Nea ɛvoyia fɔɔnwo bie mɔ mɔɔ Kilisienema ɛnli la.
“Duzu Ati A Gyihova Alasevolɛ Ɛnli Ɛvoyia Bie Mɔ Ɛ?” (Edwɛkɛ mɔɔ wɔ jw.org azo)
Nea ninyɛne nna mɔɔ ɔti yɛdie yɛdi kɛ Nyamenle anye ɛnlie awolɛ kenle ɛlilɛ nwo la.
“Duzu Ati A Gyihova Alasevolɛ Ɛnli Awolɛkenle A?” (Edwɛkɛ mɔɔ wɔ jw.org azo)
Nea kɛzi ngakula mɔɔ kulo Gyihova la bahola amaa ɔ nye alie wɔ ɛvoyialilɛ mekɛ nu la.
Kilisienema mgbe dɔɔnwo ɛnli Bolonyia. Kɛzi bɛbu bɛ kpɔkɛzilɛ ne ɛ?
a Nea Awieleɛdwɛkɛ 5 na sukoa kɛzi ɛbali ɛvoyialilɛ mekɛ nu tɛnlabelɛ bie mɔ anwo gyima la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
