ADWENLEADWENLE tɔ awie biala anwo, Nyamenle menli bɔbɔ boka nwo. Edwɛndolɛnli ne hɛlɛle kɛ, “Adwenleadwenle [ɛbo] me nwo zo.” (Edwɛndolɛ 94:19) Gyisɛse noko hanle kɛ wɔ awieleɛ mekɛ ne anu, ‘ɛbɛla ye anu ɛvɛlɛvɛlɛ’ bagyegye menli mɔɔ sonle Gyihova la. (Luku 21:34) Na ɛdawɔ noko ɛ? Asoo ezukoa nwo anwongyelelɛ, abusua nu ngyegyelɛ, anzɛɛ anwodolɛ bie ɛmaa wɔyɛ basaa ɔ? Kɛzi Gyihova bahola aboa wɔ yeamaa wɔagyinla ɔ nloa ɛ?

Yɛdayɛ mumua ne yɛnrɛhola yɛnrɛli yɛ adwenleadwenle nwo gyima. Ɛzoanvolɛ Pɔɔlo hɛlɛle kɛ: “Ndenle dɔɔnwo anu bɛgyegye yɛ. Bɛmaa yɛ adwenle nu yɛ kpomgbondee . . . yɛɛ ɔdwu mekɛ ne bie bɔbɔ a bɛbobɔ yɛ.” Eza noko ɔhanle kɛ “bɛngola bɛnzɛkye yɛ,” “yɛ agbɔkɛ nu ɛntuto” yɛɛ “yɛtɛwule.” Duzu a boa yɛ maa yɛkola gyinla a? “Tumi bedevinli ne” mɔɔ vi tumivolɛ Nyamenle, Gyihova ɛkɛ la a boa yɛ a.​—2 Kɔlentema 4:7-9.

Suzu kɛzi ɛnyianle “tumi bedevinli ne” wɔ mekɛ bie mɔɔ ɛze ɛhɔ la anwo. Ɛkakye kɛzi ɛdendɛlɛ bie mɔɔ maa anwosesebɛ la boale wɔ maanle ɛ nye liele Gyihova nɔhalɛ ɛlɔlɛ ne anwo la ɔ? Asoo diedi mɔɔ ɛlɛ wɔ Gyihova ɛwɔkɛ ne mɔ anu la nyinle wɔ mekɛ mɔɔ ɛhilehilele awie mɔ Paladaese anyelazo ne la ɔ? Saa yɛkɔ Kilisiene nyianu na yɛka yɛ diedi ne anwo edwɛkɛ a, yɛnyia anwosesebɛ mɔɔ ɔboa yɛ ɔmaa yɛgyinla ɛbɛlabɔlɛ nu adwenleadwenle nloa la. Ɛhye bamaa yɛanyia anzodwolɛ yɛava yɛazonle Gyihova anyelielɛ nu.

Nɔhalɛ nu, ɔdwu mekɛ ne bie a, ɛlɛ ninyɛne dɔɔnwo ɛyɛ wɔ mekɛ ko ne ala anu. Kɛ neazo la, Gyihova ka kile yɛ kɛ yɛlimoa yɛkpondɛ Belemgbunlililɛ ne na yɛyɛ yɛ sunsum nu gyima ne. (Mateyu 6:33; Luku 13:24) Na saa dwazotia, anwodolɛ, nee abusua nu ngyegyelɛ ɛmmaa ɛngola ɛnyɛ dɔɔnwo ɛ? Anzɛɛ nwonane afoa nu gyima ɛlie mekɛ mɔɔ ɛbava ɛ nee asafo ne ayɛ ninyɛne la ɛ? Ɛlɛ ninyɛne dɔɔnwo ɛyɛ noko mekɛ nee anwosesebɛ ekyi bie a ɛlɛ ye a. Ɔbayɛ wɔ adwenleadwenle. Bie a ɛbadwenle kɛ ninyɛne mɔɔ Gyihova kpondɛ kɛ ɛyɛ la bo ɛ nwo zo.

Gyihova lɛ ndelebɛbo. Ɔmmaa yɛnyɛ ninyɛne mɔɔ bo yɛ nwo zo la. Eza ɔze kɛ saa yɛyɛ bɛtɛɛ a, ɔdie mekɛ na yɛahola yɛnyia anwosesebɛ bieko.​—Edwɛndolɛ 103:13, 14.

Kɛ neazo la, suzu kɛzi Gyihova boale ye ngapezonli Yilaegya la anwo. Wɔ mekɛ mɔɔ Yilaegya asa nu dole na ɛzulolɛ maanle ɔnriandile ɔhɔle fienemgbole ne anu la, asoo Gyihova deanle ye ngapezonli ne na ɔhanle ɔhilele ye kɛ ɔzia ɔhɔyɛ ye gyima ne ɔ? Kyɛkyɛ. Gyihova zoanle ye  anwumabɔvolɛ fane nwiɔ maanle ɔhɔdunwuele Yilaegya na ɔmaanle ye aleɛ ɔlile. Kenle 40 anzi bɔbɔ, ɛnee Yilaegya tɛdwenle na ɔsulo. Boni bieko a Gyihova yɛle boale ye a? Mɔɔ limoa, Gyihova hilele kɛ ɔbahola yeabɔ ɔ nwo bane. Mɔɔ tɔ zo nwiɔ, Gyihova vale ‘ɛnelɛ bɛtɛɛ dendɛle’ kyekyele Yilaegya arɛle. Awieleɛ ne, Gyihova maanle ɔnwunle ye kɛ ɔlɛ azonvolɛ apenle dɔɔnwo mɔɔ sonle ɔdaye Nyamenle nɔhalɛ nu a. Yeangyɛ, Yilaegya nyianle anwosesebɛ bieko kɛ ngapezonli mɔɔ bɔ mɔdenle. (1 Arelemgbunli 19:1-19) Duzu a yɛsukoa yɛfi nu a? Mekɛ mɔɔ adwenleadwenle dɔle Yilaegya anwo la, Gyihova vile abotane nee anwunvɔnezelɛ nu boale ye. Gyihova ɛtɛkakyile. Ɔdwenle yɛdayɛ noko yɛ nwo.

Mmadwenle kɛ ɔwɔ kɛ ɛyɛ dɔɔnwo ɛtɛla mɔɔ ɛbahola wɔayɛ wɔ Gyihova ɛzonlenlɛ nu la. Mmafa mɔɔ ɛbahola wɔayɛ la ɛtoto mɔɔ ɛnee ɛyɛ ye dɛba la anwo. Ndonwo ɛne: Awie mɔɔ su ɛnriandilɛ mɔɔ ɔbagyakyi la ɛnrɛhola ɛnrɛbɔ ɔ bo arɛlevilɛ nu. Emomu, ɔfa bodane ngyikyi mɔɔ bamaa yeanyia anwosesebɛ la ɔsie ɔ nye zo. Kilisienema le kɛ menli mɔɔ su ɛnriandilɛ la. Bɛfa bodane bɛsie bɛ nye zo na bɛpele bɛdwu nwo. (1 Kɔlentema 9:24-27) Fa sunsum nu bodane mɔɔ ɛbahola wɔadwu nwo la sie ɛ nye zo. Kɛ neazo la, ɛbahola wɔabɔ kpɔkɛ kɛ ɛbahɔ debiezukoalɛ dahuu. Sɛlɛ Gyihova maa ɔboa wɔ amaa wɔadwu wɔ bodane ne anwo. Mekɛ mɔɔ ɛlɛnyia sunsum nu anwosesebɛ la, ‘ɛbanwu kɛ Gyihova le kpalɛ.’ (Edwɛndolɛ 34:8) Kakye kɛ Gyihova anye sɔ debie ekyi biala mɔɔ ɛbayɛ wɔahile kɛ ɛkulo ye la.​—Luku 21:1-4.

Kɛzi Gyihova boale adiema raalɛ June maanle ɔziale ɛ? Ɔka kɛ: “Menzɛlɛle Gyihova dahuu kɛ ɔboa me. Yeangyɛ yɛɛ me ra nrenyia ne aye hanle hilele me kɛ bɛbayɛ nyianu bie wɔ me sua zo a. Menyɛle kɛ mebahɔ kenle ko ala. Me nye liele kɛ me nee Gyihova menli bɔle nu bieko a! Ɛnee nyianu ɛhye le moalɛ wɔ ye mekɛ nloa. Kɛkala, melɛsonle Gyihova bieko wɔ anyelielɛ nu. Me nye die. Menwu ye kɛ mehyia me mediema nwo yɛɛ medie bɛ moalɛ meto nu. Me nye ɛlie kɛ mehola mezia la.”