Adiema kulovolɛ:

Kɛmɔ ɛze la, Baebolo ne ka menli nwo edwɛkɛ. Ɛnee bɛ nuhua dɔɔnwo le mrenyia nee mraalɛ nɔhavoma mɔɔ yiale ngyegyelɛ mɔɔ le kɛ yɛ ɛdeɛ ne la. Ɛnee bɛte nganeɛ kɛ “yɛdayɛ ala la.” (Gyemise 5:17) Ngyegyelɛ nee adwenleadwenle maanle bie mɔ abɛ nu bule. Bie mɔ noko mbusua anzɛɛ bɛ mediema diedima nyɛleɛ maanle bɛlile nyane. Yɛɛ bie mɔ noko nvonleɛ maanle bɛbuale bɛ nwo fɔlɛ.

Menli ɛhye mɔ amkpo Gyihova. Ɛnee bɛ nuhua dɔɔnwo le kɛ edwɛndolɛnli ne la. Ɔzɛlɛle kɛ: “Meminli kɛ boane; kpondɛ wɔ sonvolɛ abo zo, ɔluakɛ me rɛle ɛnvi wɔ mɛla ne mɔ.” (Edwɛndolɛ 119:176) Asoo kɛ ɛte nganeɛ la ɛne?

Gyihova arɛle ɛnvi ye azonvolɛ mɔɔ kɛvi asafo ne anu la. Emomu, ɔdua bɛ mediema diedima anwo zo ɔboa bɛ. Kɛ neazo la, suzu kɛzi Gyihova boale ye sonvolɛ Dwobu la anwo nea. Ɔyiale ezukoa nwo ngyegyelɛ, ye alɔvolɛ wule yɛɛ ɔ nwo dole ye. Ɛnee ɔwɔ kɛ eza ɔgyinla ɔ gɔnwo mɔ mɔɔ rale kɛ bɛbakyekye ɔ rɛle la edwɛkɛ mɔɔ wowɔ la anloa. Dwobu nyianle adwenle mɔɔ ɛndenrɛ la ɛdeɛ, noko yeamkpo Gyihova. (Dwobu 1:22; 2:10) Kɛzi Gyihova boale Dwobu maanle ɔnyianle adwenle kpalɛ ɛ?

Gyihova luale diedinli Ɛlaehu anwo zo a boale Dwobu a. Mekɛ mɔɔ Dwobu da ye nganeɛdelɛ ali la, Ɛlaehu diele ye na yemɔ hanle Ɛlaehu maanle ɔdendɛle. Duzu a ɔhanle a? Asoo ɔdendɛle ɛtane ɔhilele Dwobu anzɛɛ ɔbuale ye fɔlɛ? Asoo Ɛlaehu bule ɔ nwo kɛ ɔle kpalɛ ɔtɛla Dwobu? Kyɛkyɛ! Nyamenle sunsum ne hanle Ɛlaehu maanle ɔhanle kɛ: “Melua Nyamenle adenle ne anu kɛ ɛdawɔ ala la, medame noko bɛvale ndɛtɛlɛ a bɛbɔle me a.” Akee ɔmaanle Dwobu anwosesebɛ kɛ: “Mmamaa wɔ ahonle tu na ɛsulo me, menrɛmaa ɛ nwo ɛnrɛhyele wɔ.” (Dwobu 33:6, 7) Ɛlaehu anga edwɛkɛ mɔɔ bamaa Dwobu amaneɛnwunlɛ ne ayɛ kpole a, emomu ɔdule ye folɛ na ɔmaanle ye anwosesebɛ.

Yɛsɛlɛ wɔ yɛ ye nzonlɛ kɛ adenle ko ne ala a Neazo Eku ne ɛlua zo ɛyɛ brohyua ɛhye a. Mɔɔ limoa, yɛdiele menli mɔɔ gyakyile Gyihova ɛzonlenlɛ la bie mɔ yɛɛ yɛzuzule tɛnlabelɛ ngakyile mɔɔ maanle bɛyɛle zɔ la anwo kpalɛ. (Mrɛlɛbulɛ 18:13) Akee yɛvale nzɛlɛlɛ yɛnleɛnleanle Ngɛlɛlera ne anu kɛlɛtokɛ mɔɔ fane kɛzi Gyihova boale ye tete azonvolɛ mɔɔ yiale ngyegyelɛ ɛhye mɔ bie la anu. Awieleɛ bɔkɔɔ ne, yɛvale Baebolo ne anu neazo nee anwubielɛ mɔɔ yɛ sa hanle ye la yɛbɔle nu yɛɛ yɛyɛle brohyua ɛhye a. Yɛsɛlɛ wɔ, sukoa edwɛkɛ ɛhye. Kakye kɛ yɛkulo wɔ kpalɛ.

Gyihova Alasevolɛ Neazo Eku