Yɛ muala yɛhyia ezukoa amaa yɛahola yɛanlea yɛ mbusua. (Mrɛlɛbulɛ 30:8) Ezukoa “kola bɔ sonla nwo bane.” (Nolobɔvo ne 7:12) Kɛ agyalɛma la, bie a ɔbayɛ se kɛ bɛbaha ezukoa nwo edwɛkɛ, noko mmamaa ezukoa sɛkye wɔ agyalɛ. (Ɛfɛsɛsema 4:32) Ɔwɔ kɛ ɛdie wɔ bokavolɛ ne ɛdi na bɛbɔ nu bɛsuzu kɛzi bɛbali bɛ ezukoa la anwo.

MƆƆ BAEBOLO NE KA LA: “Saa bɛ nuhua bie kpondɛ kɛ ɔsi sua a, ɔdumua ɔtɛnla aze, ɔsese ye bolɛ, na ɔnea saa ɔlɛ ezukoa mɔɔ sa ye si la a.” (Luku 14:28) Ɔwɔ kɛ bɛbɔ nu bɛsuzu kɛzi bɛbali bɛ ezukoa la anwo. (Emɔso 3:3) Bɛzuzu ninyɛne mɔɔ ɔhyia kɛ bɛtɔ nee ezukoa mɔɔ bɛlɛ la anwo. (Mrɛlɛbulɛ 31:16) Saa bɛlɛ ezukoa a ɔngile kɛ ɔwɔ kɛ bɛtɔ debie biala mɔɔ bɛbanwu ye la. Bɛmmatwe kakɛ bɛto bɛ nwo zo. Bɛmmatotɔ ninyɛne bɛmaa ɔtɛla ezukoa mɔɔ bɛlɛ la.​—Mrɛlɛbulɛ 21:5; 22:7.

DUZU A ƐBAHOLA WƆAYƐ A?:

• Saa bɛlɛ ezukoa wɔ siane ne awieleɛ a, bɛbɔ nu bɛzi mɔɔ bɛbava bɛayɛ la anwo kpɔkɛ

• Saa bɛlɛ kakɛ a, bɛyɛ ngyehyɛleɛ bɛde kakɛ mɔɔ bɛbɔ la azo. Kɛ neazo la, bie a ɔbayɛ kpalɛ kɛ bɛbado aleɛ tɛla kɛ bɛbadidi gua zo

MƆƆ BAEBOLO NE KA LA: “Bɛmmabɔ adalɛ bɛkile bɛ nwo, ɔluakɛ bɛye bɛ su dɛba ne nee ye nyɛleɛ ne mɔ wɔ bɛ nu bɛgua.” (Kɔlɔsaema 3:9) Mmafa ezukoa mɔɔ ɛnyia ye siane biala nee kɛzi ɛdi ye la ɛfea wɔ bokavolɛ ne.

Saa ɛlɛsi ezukoa nwo kpɔkɛ bie mɔɔ anwo hyia la a, maa wɔ bokavolɛ ne ɛde nwolɛ bie. (Mrɛlɛbulɛ 13:10) Saa bɛka ezukoa nwo edwɛkɛ a ɔbamaa anzondwolɛ adɛnla bɛ agyalɛ nu. Bu ezukoa mɔɔ ɛlɛ la kɛ ɔle abusua ne ezukoa.​—1 Temɔte 5:8.

DUZU A ƐBAHOLA WƆAYƐ A?:

• Bɛzi ezukoa dodo mɔɔ bɛ nuhua ko biala bahola ava adɔ debie mɔɔ ɔngyia kɛ bɛsuzu nwo la anwo kpɔkɛ

• Bɛmmakendɛ bɛmaa ngyegyelɛ ba kolaa na bɛaha ezukoa nwo edwɛkɛ