Nyɔɔ 23 biradee bu Taa Enɔɔ̄, 2020, bie barasī Khabarovsk li Russia, Pya aa a kura Federal Security Services (FSB) bee lap sa gbeesī nu tɔ Wuga Igor Avramenko, nyɔɔ eree ini’ī biradee sɔ̄ a u sah aāloo eyɔ nyiɛ. Pya lo nɛɛ bee aara kpa a wa nɛ ekpo kɔ ba a dap lap tɔ nɛɛ a aara bee wuga Avramenko, kerewo ba bee aa ye kɔmputa, ye nu suā foto, le pya dɔɔ̄na dɔɔ̄na nu ye wa, Yelena.

Aba lo dee, pya aa ebee si kɛ̄tam Wuga nɛɛwa Avramenko wee su ye a kuma be, e wa nɛɛ zaāsī a kura Stanislav Grebenkin, gaa bee wa baɛ sa aara kpa a wa nɛ ekpo kɔ ba a dap lap wa tɔ. Wuga nɛɛwa Avramenko bee kɔ nɛ Tɛɛ Grebenkin kɔ ye dam e’uae. A bee suā kɔ ye dam e’ua, kerewo a bee kɔ pya bɛbɛɛ ebee tɛma lok kɔ a lu elap ye tɔ lɛɛ Wuga nɛɛdam Avramenko aa u.

Lo nɛɛbee bee kɔ nɛ Wuga nɛɛwa Avramenko kɔ pya lo aa e aadee ɛp ye tɔ, sa kɔ a lu ebɛɛ̄ lokwa “a dap lu ekpaɛ̄ kpa loo lo ue sa su nu ba gbītɛ̄ muɛ̄ ma pya FSB.” Kaɛloo wo, ba bee bɔātɛ̄ elap dɛ̄dɛɛ̄ kɛ̄ a le ye be.

Ebee lu edɛrɛ ue lop pya Ekeebee li barasī Khabarovsk kɔ aba pya bag dogo. Kere pya bɛbɛɛ gaa bialoo piiga lo e’ɔɛloo yira pya i wuga nɛɛdam le nɛɛwa li Russia, i suā kɔ wa ekpo na “efɛɛlootɔɔ̄ le . . . ture nyiɛ loo” ba ɛrɛ bu i wereloo Tɛ, Jɛhova.—Aisaia 30:15.