Gbɛnɛ-edo Pya Ekeebee Jɛhova le pya a ɛrɛ nia gaa le bɔŋia nyɔɔ Baɛ Deelookaɛ, 7 Nia Enɔɔ̄, 2020, loo doonu a kuī ee dɛ̄dɛɛ̄ doonu, lo a le Doonu Nyɛŋiabu Loo Luh Jizɔs. Kerewo, bu lo zua ama, nyɔɔ dumɛloo COVID-19, elu edoo lo doonu bu sīdee a lu keebee. Gbɛnɛ-edo nɛɛ egbaa bɔŋana tɛ̄mabu vidio.

Nyɔɔ dumɛloo coronavirus, pya bɛbɛɛ pio barasī ekɔa kɔ gbɛnɛ-edo nɛɛ aa gbaana bɔŋana. Nyɔɔwo, gbɛnɛ-edo bɔŋanaloo bu yube nyɔuwe aa si wa enɔānu bu ziī ziī kaɛ tɛ̄mabu vidio. Pya bɔŋanaloo ama edoonage Doonu Nyɛŋiabu Loo Luh Jizɔs tɛ̄mabu vidio. Elu eyere lo doonu bu gama sa sere i dɔ intanɛt jw.org lokwa dɛ̄dɛɛ̄ nɛɛ dap muɛ̄.

Nu a eeloo 20 miliɔn pya nɛɛ bee si Doonu Nyɛŋiabu Loo Luh Jizɔs bu zua i aa a. I bɛābu kɔ gbɛnɛ-edo pya nɛɛ dap si lo doonu tɛ̄mabu vidio, kue kue bu fon, ale si ee lo ebee lu eyere bu gama a le dɔ intanɛt jw.org.

Bu gbɛnɛ-edo barasī, lo dumɛloo aa yii loo sa yere bɔɔ bu pya nɛɛ. Lo ekpega pya i wuga, alu ebɛɛ̄ kɔ i bia bu nwaɛdɛɛ̄ sa nyɔɔnɛ pya zuurabahtɔ̄ a lu enɛ mmɛ sɔ̄ dumɛloo ama etaa. Kerewo, i suā kɔ Jɛhova eyerebah i nɛ, sa i ebiaɛrafii lo enyɔɔnɛ lok Jizɔs a kɔ “dooraa lo ba ama bu kɛkɛɛrɛ mɛ bu.”—Luk 22:19.