Nyɔɔ 5 biradee bu Taa Enɔɔ̄, 2023, Wuga David Splane, a le yɛɛ Eku A Baɛbee bee lɛɛ New World Translation of the Christian Greek Scriptures tɔ bu muɛ̄ ue pya bɔ̄nɔ a lu ekure South African Sign Language (ale SASL li South Africa), a lunage elɛɛ kpa Matiu tɔ bu muɛ̄ ue Ndonga. Wuga Splane bee lɛɛ pya lo Baibol tɔ bie ziī keebee zɔ̄zɔ̄ŋia a bee lu e’ɛrɛ bie tɔ-naatam a le South Africa. Gbɛnɛ-edo bɔŋanaloo bee si lo doonu tɛ̄ma nyɔɔ vidio aā keekee kɛ̄. Buā dɛ̄dɛɛ̄ pya a bee le kɛ̄ bee eeloo 130,000. Aba sɔ̄ a bee lu elɛɛ pya lo Baibol tɔ, bee lu edoo pya nɛɛ a dap ɛrɛ dee lo ekuɛ̄ aā nyɔɔ intanɛt.

Bee lu ebɔātɛ̄ tap ue yere bu SASL bu zua 2007 bie tɔ-naatam a le kpaɛ̄ Johannesburg, li South Africa. Bu zua 2022, bee lu esu wa aā lo tɔ naatam ture tɔ etɔɔ̄ tap ue a le Durban. Wuga Ayanda Mdabe a lu nɛɛ kanɛɛ a lu bɔ̄nɔ bee kɔ kumaloo lo Baibol a lu elɛɛ tɔ bu SASL ama kɔ: “Tɛ̄maloo Baibol ama, esikɛ̄ lu edābeeloo kaka le ekpo a le bu Muɛ Ue Bari ee kɛ̄ a wee lu edoo tua sɔ̄. Sisi ee Baibol bu SASL yerebah mɛ nɛ kɔ m dābeeloo taɛ dua nɛɛ Jizɔs bee lu le pya daakuu Baibol leere. E lo ama e ɛrɛ pah nyɔɔ kɛ̄ m kɛɛrɛ nu doo.”

Kɛ̄ a wee lu ekɔ muɛ ue Ndonga bie na Namibia, e tɔ etɔɔ̄ tap ue pya Ndonga le bu buɛ̄ Ondangwa. a Ziī yɛɛ pya a wee tap ue lo kɛ̄ bee kɔ: “Sɔ̄ a lu elɛɛ lo Baibol tɔ nyɛŋia mɛ bu kɔ Jɛhova wereloo pya nɛɛ sa gbī kɔ ba a suā ye loo leere.”

I nyɔɔnɛ pya wuga nɛɛdam le nɛɛwa ba e ɛrɛ biī aāloo pya aā kpa a lu elɛɛ tɔ ama ɛrɛ ɛɛbu. Lo tatap a lera sa lu kaka ama eyerebah wa nɛ kɔ ba a kiisī lo etɔgɛ nia loo pya lok Jɛhova.—Kam 2:1.