Jɛhova gbī kɔ i “su tɔɔ̄nɛ nua gbɛnɛ.” (Maika 6:8, NW) Lo ama kuī gbɛnɛ bu iya dam le wa nyɔnɛbee lo anaa lu etɔɔ̄nɛ ziī, naale elu edɛrɛ nyiɛ nyɔɔ ziī. Esa dɛrɛ nyiɛ nyɔɔ ziī lu ebɛɛ̄ lokwa wereloo nyim.

Nii’ee, gbɛnɛ-edo dam le wa naa tɔɔ̄na nɛ ziī. Loe kpega o iya dam le wa, o ɛrɛ e biaɛfii loe doo baɛ nu.

NU KPA BAIBOL KƆ: “Gbītɛ̄ suā pya nu akuī.” (Pya Filipai 1:10, NW) O iya dam le wa lu ziī nu akuī gbɛnɛ bu o dum. A bɔloo kɔ o su ye nua nu a kuī.

Jɛhova gbī kɔ o sere o ekɛɛrɛ nyɔɔ o dam ale o wa sa bui gbaa “de dum.” (Eklisiastis 9:9) A kɔsiā kɔ oa ɛp o dam ale o wa tɛrɛ, mɛ, taāwo, baɛ bui a ɛp nu edoo kɔ bu ziī ziī bui a ɛɛ. (1 Pya Kɔrint 10:24) Doo kɔ o dam ale o wa a suā kɔ o gbī ye sa lu nɛɛ aa kuī loo gbɛnɛ.

NU O DAP DOO:

• Muɛ̄ kɔ bui gbaa tɔɔ̄nia dɛ̄dɛɛ̄ sɔ̄, sa ye gbaɛtɔ̄loo leere

• Kɛɛrɛ bu “baɛ bui” naale “aba oloo”

NU KPA BAIBOL KƆ: “Ɛrɛgeba nɛɛ a ɛmadɛɛ̄ ziī wa bu ye taɛ, e kuera ye bu benyiɛ ye anyawo.” (Matiu 5:28) Lo ale ziī nɛɛ kiisī loe ɛrɛ ekɛɛrɛ kunagā, bu ziī sīdee, anaa tɔɔ̄nɛ ye dam ale ye wa.

Jɛhova kɔ alu ebɛɛ̄ kɔ o “baɛloo o benyiɛ.” (Kam 4:23, NW; Jeremia 17:9) Lo edoo wo, o ɛrɛ e baɛloo baɛ o dɛɛ̄. (Matiu 5:29, 30) Nyɔnɛ edoba nama tɛ bee gā akura Job, lo abee nyɔnɛ ye baɛ dɛɛ̄ yinia yii bɔmadum kɔ anaale e’ɛp e dɔɔ̄na wa bu taɛ. (Job 31:1) Biaɛfii kɔ oo lee ɛp foto kunagā. Sa biaɛfii kɔ oo lee bie nyiɛ nyɔɔ nɛɛ anaale o dam ale o wa.

NU O DAP DOO:

• Doo kɔ pya dɔɔ̄na a suā leere kɔ o tɔɔ̄nɛ o dam ale o wa mmɛnɛ

• Kɛɛrɛ kɛ̄ e tɔɔ̄loo o dam ale o wa doo sa nwaaba ɔbɛ ɛrɛgeba gbaaloo loe doo kɔ nyiɛ ye aa sukɛ̄