03 NUENƆ
O Dapge Yiga Pya Nu Baibol Kɔ Ni?
Gbɛnɛ-edo yii le zuurabahtɔ̄ le bu Baibol. Naa daba, a taɛ a kaāna lo esuā nu Baibol tɔgɛ, mɛ o nwaɛ̄nage dɛɛ̄. O dapge dɛrɛ nyiɛ nyɔɔ pya yii le zuurabahtɔ̄ a le bu nama kpa ama ni? Bɔgeloo kɔ o yiga nu Baibol kɔ akiiloo ɛrɛ ekpeloo loo dum anyaawo le deesī li ni? Gbɛnɛ-edo nɛɛ yiga. Doo i naa ɛp lo a le olo o dapge yiga doo wo.
1. Pya ue a le bu Baibol lu kunɛ loo sɛh a luge kaka ni?
Pya ue a le bu Baibol lu “kaka.” (Eklisiastis 12:10) A kɔ taɛ nu a bee sira loo pya nɛɛ. (Buū Luk 1:3; 3:1, 2.) Pya gbītɛ̄ nu le pya a wee nɔ nu a bee sira a kere emɔna kɔ biradee, pya nɛɛ, keekee kɛ̄ le pya siranu alu ebaatɛ̄ bu Baibol lu kaka.
2. E na anua i yiga kɔ Baibol lege aa dɔbiī bu ilii dee ama a?
Gbɛnɛkpo sɔ̄, Baibol wee kɔ nu akiiloo ziī nu sere kɛ̄ gbɛnɛ-edo zua lɛɛ lo nu gae sira. Bu edoba, sɔ̄ a kɔ nu akiiloo saɛns. Pya nɛɛ naa bee yiga gbɛnɛ-edo lo ue bu sɔ̄ a bee lu e’ɛm Baibol. Kerewo, pya saɛns bu ilii dee ama yiga kɔ pya ue a le bu Baibol lu kaka. Alu ‘eture nyiɛ loo anyaawo, le mmɛ dee a naa tah.’—Le-yɔɔ 111:8.
3. E na anua i dɛrɛ nyiɛ nyɔɔ pya ue Baibol kɔ akiiloo deesī li a?
Baibol aara pya mɔmanudɛɛ̄ a a kɔ “pya nu a sii lu edoo.” (Aisaia 46:10) Pya nu a bee kɔ sɔ̄ akii adumɛ edooa. A baa nagetɛ̄ pya nu aa sira bu nyɔuwe anii’ee. Bu nuenɔ ama, i kɔ ue nyɔɔ pio mɔmanudɛɛ̄ a le bu Baibol. Kɛ̄ pya lo mɔmanudɛɛ̄ dooa gbɔ̄mɛɛ̄ doo lu nyɛŋia!
NƆ YERELOO
Kɛɛrɛ kɛ̄ saɛns bu ilii dee ama gbaaloo nu Baibol tɔgɛ doo, sa gbītɛ̄ pio mɔmanudɛɛ̄ Baibol a a nia.
4. Saɛns gbaaloo Baibol
Dee kere a, gbɛnɛ-edo nɛɛ wee yiga kɔ a ɛrɛ nu kɛnɛkɛ̄ le nyɔɔ. Bira lo VIDIO.
Yere nukuādɛɛ̄ loo nu kpa Job bee kɔ nu alu 3,500 zua akii adumɛ. Buū Job 26:7, lɛɛ o agara ebip ama:
-
E na anua ue a kɔ kɛnɛkɛ̄ le nyɔɔ “nu a naale lɔgɔ nu” ɔbɛ i a?
Bee le 200 zua akii adumɛ na a bee lu edābeeloo kɛ̄ maā tɛ̄na doo a. Mɛ yere nukuādɛɛ̄ loo nu Baibol bee kɔ gbɛnɛ-edo zua lɛɛ a elu lo sɔ̄. Buū Job 36:27, 28, lɛɛ o agara pya ebip ama:
-
E na a a nia a le loo kɛ̄ alu ebaatɛ̄ kɛ̄ maā tɛ̄na doo ani?
-
Dɔ kpa kaɛ o buū sah ama dooge kɔ o agɛrɛbah dɛrɛ nyiɛ nyɔɔ pya ue a le bu Baibol ni?
5. Baibol ebee kɔ pya nu esira alu gbɛnɛ
Buū Aisaia 44:27–45:2, lɛɛ o agara ebip ama:
-
E na Baibol bee kɔ akiiloo dɔdɔ Babilɔn 200 zua lɛɛ a gae sira a?
Eloh kere tɔgɛ kɔ Sairɔs Mɛnɛ pya Pesia le pya ye gbo nɔ̄ bee be eebah Babilɔn bu zua 539 B.C.E. b Ba bee baa maā a wee kpega lo buɛ̄, tɛɛ̄ nudee gbɛnɛ buɛ̄ a bee le yeea a yii sa aa pya nɛɛ aā, e lɔgɔ nɛɛ naa bee wa bebe loo. Nu a eeloo 2,500 zua etɛ̄na aā lo sɔ̄ mmɛ anii’ee, e Babilɔn lege kɛ̄ a bee lu egbee ye sī doo. Yere nukuādɛɛ̄ loo nu Baibol bee kɔ sere kɛ̄ ama.
Buū Aisaia 13:19, 20, lɛɛ o agara ebip ama:
-
Bu mɛ sīdee na nu a bee sira loo Babilɔn tɔgɛ kɔ mɔmanudɛɛ̄ ama lu kaka a?
Kɛ̄ alu egbeesī Babilɔn a le kpaɛ̄ Iraq doo
6. Baibol ebee kɔ pya nu aa sira anii’ee sere kɛ̄
Baibol kɔ sɔ̄ i le ama ɛɛ “kpɛdumɛ dee.” (2 Timɔti 3:1) Ɛp nu Baibol kɔ akiiloo kpɛdumɛ dee ama:
Buū Matiu 24:6, 7, lɛɛ o agara ebip ama:
-
Pya amunu dogo na Baibol bee kɔ pya nɛɛ edoogi bu kpɛdumɛ dee a?
Buū 2 Timɔti 3:1-5, lɛɛ o agara pya ebip ama:
-
Pya amunu dogo na Baibol bee kɔ pya nɛɛ edoogi bu kpɛdumɛ dee a?
-
Amunu yɛɛ pya dogo ama na o emɔna a?
PIO NƐƐ KƆ: “Baibol lu kpa loo a naa lu kaka.”
-
E na a a zū kɔ o yiga kɔ pya ue a le bu Baibol lu kaka a?
TƐƐ̄NYƆƆ
Eloh kere, saɛns, le mɔmanudɛɛ̄ tɔgɛ kɔ o dap dɛrɛ nyiɛ nyɔɔ ue a le bu Baibol.
Ebip Tɛ̄ma Nyɔɔ
-
Baibol lu kpa a kɔ kaka, sɛh kpa a kɔ nu a naa bee sira ni?
-
Pio amunu ue saɛns na a gbaaloo ue a le bu Baibol a?
-
O kɛɛrɛge kɔ Baibol kɔ nu esira li deesī ni? E na anua o kɛɛrɛ doo wo a?
GBĪTƐ̄ NU
Ɛrɛge pya ue Baibol kɔ nyɔɔ saɛns alu ekwɔ ni?
“Ekɔ Saɛns Gbaageloo Ue A Le Bu Baibol Ni?” (Ekobee ue a le nyɔɔ intanɛt)
E na alu kaka ue akiiloo “kpɛdumɛ dee” a?
“6 Pya mɔmanudɛɛ̄ Baibol O Muɛ̄ A Gaa Dooa Gbɔ̄mɛɛ̄” (The Watchtower, May 1, 2011)
Nɔ kɛ̄ pya mɔmanudɛɛ̄ a le bu Baibol akiiloo bɛbɛɛ pya Grik bee dooa gbɔ̄mɛɛ̄ doo.
Nɔ kɛ̄ pya mɔmanudɛɛ̄ a le bu Baibol nyaana kɛ̄ ziī gbara bee ɛmadɛɛ̄ Baibol doo.
