07 NUENƆ

Jɛhova Mɛā Doodoo Wa?

PLAY

Sɔ̄ o kɛɛrɛ nu akiiloo Jɛhova Bari, wee a tɔɔ̄loo doodoo wa? O kɛɛrɛ kɔ oo le edabe tɔɔ̄ waɛloo Bari nyɔɔbee alu nyɛŋia sa kii nyɔɔ gbɛnɛ doodoo zina a le bunyɔɔ ni? Ale o kɛɛrɛ kɔ a si ekpo doodoo gbɛnɛ fii sa naa lu nɛɛ ni? Jɛhova mɛā doodoo wa? Tɛ̄maloo ye Muɛ̄ Ue lo a le Baibol, Jɛhova muuna pio ye elap dogo, le kɔ a kuū a dɛɛ̄loo.

1. E na anua ii dap muɛ̄ Bari a?

“Bari na Edɔɔ̄.” (Jɔn 4:24) Jɛhova naa ɛrɛ ekpaloo namloo. A lu Edɔɔ̄ a tɔɔ̄ bunyɔɔ, kɛ̄ ii dap muɛ̄ nu a le.

2. Pio amunu elap dogo na Jɛhova ɛrɛ a?

Kere ii dap muɛ̄ Jɛhova, alu Nɛɛ a le lo a ɛrɛ pya elap dogo a doo kɔ bu pya a ye suāloo a ɛɛ ye loo. Baibol kɔ: “Jɛhova wereloo kaāna biaɛ, a naale elɛɛbaloo pya ye kaɛ.” (Le-yɔɔ 37:28) A ɛrɛ “le beenyiɛ le toesaɛ̄,” eetɔɔ̄ na kumaloo pya a gaa tɔga. (Jemes 5:11) “Jɛhova tɔɔ̄ waɛloo pya beenyiɛ baara, sa kpɔā pya wa edɔɔ̄ lu ezag bii kɛ̄.” (Le-yɔɔ 34:18) O suāge kɔ dogo i doo dap ɛɛrɛbu Jɛhova ale ebiire ye bu ni? Nɛɛ a biaɛfii lo edoo piya nu lɔgara Jɛhova sa ye yere saŋ bu. (Le-yɔɔ 78:40, 41) Mɛ nɛɛ a doo nu a lee doo kɔ bu ye a ɛɛ.—Buū Kam 27:11.

3. Bu mɛ sīdee na Jɛhova tɔgɛ kɔ a weree i loo a?

Yɛɛ dɛ̄dɛɛ̄ elap Jɛhova ɛrɛ, lo a kuī eera na wereloo. Bu kaka, “Bari na wereloo.” (1 Jɔn 4:8) Naale aba tɛ̄maloo Baibol na Jɛhova muuna ye wereloo siā a, mɛ a tɛ̄manage loo pya nu a bee dɛm. (Buū Doonu pya Nɛɛ lɛɛratam 14:17.) Bu edoba, naa ɛp kɛ̄ a i dɛm doo. A doo kɔ i dap muɛ̄ keekee dɛɛ̄ nu a kpedɛɛ̄, gbaɛ̄tɔ̄loo ekpetɔ̄ yɔɔ, sa de ekpe nuede. A gbī kɔ i ɛrɛ ekpeloo bu dum.

NƆ YERELOO

Nɔ nu akiiloo pya nu Jɛhova su siā gbɛnɛ gbɛnɛ tam. Sa muɛ̄ kɛ̄ Jɛhova muuna sa tɔgɛ pya ye lele elap dogo doo.

4. Kaɛ edɔɔ̄ lu ekpo Bari siātam

Dookɛ̄ i wee su bah siātam doo, kɛ̄ Jɛhova sunage ye kaɛ edɔɔ̄ siātam doolo. Baibol tɔgɛ kɔ kaɛ edɔɔ̄ naale nɛɛ, mɛ alu ekpo Bari wee siātam. Buū Luk 11:13 le Doonu pya Nɛɛ lɛɛratam 2:17, lɛɛ o agara pya ebip ama:

Bari e “egara” ye edɔɔ̄ nyɔɔ pya a ye bara. Nyɔɔwo, o kɛɛrɛ kɔ kaɛ edɔɔ̄ lu nɛɛ, sɛh alu ekpo Bari wee siātam ni? E na anua o kɔ doo wo a?

Jɛhova su ye kaɛ edɔɔ̄ siā gbɛnɛ gbɛnɛ tam. Buū Le-yɔɔ 33:6 le 2 Pita 1:20, 21, lɛɛ o agara ebip ama:

Bu pya amunu sīdee na Jɛhova esua ye kaɛ edɔɔ̄ siātam a?

5. Jɛhova ɛrɛ ziī elap dogo a lee gbɛnɛ

Mozis bee le zooro Bari a bɔloo ture nyiɛ loo, mɛ a bee gbī esuāloo Nɛɛ a bee ye dɛm leere. Nyɔɔwo Mozis bee bara Jɛhova kɔ: “Doolo m suā dɛ̄dɛɛ̄ o dee anyaawo, lokwa m a suā loo.” (A’aa 33:13) Lo e’agara ye bara, Jɛhova bee muuna ziī yɛɛ pya ye elap dogo nɛ Mozis. Buū A’aa 34:4-6, lɛɛ o agara pya ebip ama:

Amunu elap Jɛhova ɛrɛ na a bee muuna nɛ Mozis a?
Amunu yɛɛ pya elap dogo Jɛhova na a a nia gbɛnɛ a?

6. Jɛhova kuūdɛɛ̄loo pya nɛɛ

Pya Hibru ba lu pya nɛɛ Bari bee lu zooro bu buɛ̄ Ijipt. Wa tɔga bee tɔɔ̄loo Jɛhova doodoo wa? Bira lo I DĀ ABA MUƐ̄ sa gbaɛ̄tɔ̄ kaāna, ale o buū A’aa 3:1-10. lɛɛ o agara pya ebip a nyɔɔnɛ ama.

I DĀ ABA MUƐ̄: Wa Tɔga Ziloo Jɛhova (2:45)

E na e’ɛma ama a kɔ nɛ akiiloo kɛ̄ tɔga pya nɛɛ tɔɔ̄loo Jɛhova doo a?—Ɛp 7 le 8 barakpaɛ̄.
O kɛɛrɛge kɔ Jɛhova gbī eyerebah nɛ pya nɛɛ le kɔ a dap doo wo ni? E na anua o kɛɛrɛ doo wo a?