11 NUENƆ

Sīdee O Dap Ɛrɛ Biī Aāloo Buū Baibol

PLAY

O ebee gbīge esi ziī tam a kuī sa o kɛɛrɛ kɔ lo tam aga ni? Lo edoo kɔ lo tam a waɛ a bah, o bɔātɛ̄ si kina kina. Kɛ̄ a le nage doolo kiiloo buū Baibol. O dap bip kɔ, ‘M bɔātɛ̄ aā mɛ kɛ̄?’ Bu nuenɔ ama, i kɔnia pio nu a waɛ o dap doo lo eyerebah a nɛ kɔ o ɛrɛ ekpeloo sɔ̄ o gaa buū Baibol le sɔ̄ o waa nɔ.

1. E na anua i buū Baibol dɛ̄dɛɛ̄ dee a?

Nɛɛ a buū Baibol ale “lok Jɛhova” dɛ̄dɛɛ̄ dee, e ɛrɛ ɛɛbu sa kiisī leere. (Buū Le-yɔɔ 1:1-3.) Lo ebɔātɛ̄, piiga lo esu pio minit buā ziī ziī biradee. Kɛ̄ o bɔātɛ̄ suā nu a le bu Muɛ̄ Ue Bari doo, kɛ̄ buū Baibol ekpenage a loo doolo.

2. E na eyerebah a nɛ kɔ o ɛrɛ biī aāloo buū Baibol a?

Lo e’ɛrɛ biī aāloo buū Baibol, lu ebɛɛ̄ kɔ i yira kina sa ɛrɛ ekɛɛrɛ nyɔɔ nu i gaa buū. Nyɔɔwo, sɔ̄ i gaa buū i ɛrɛ “ekɛɛrɛ” nyɔɔ. (Joshua 1:8) Kuma sɔ̄ o gaa buū, bip aba ɔɔ kɔ: ‘E na lo ama mɛ tɔgɛ akiiloo Jɛhova Bari a? M dap su lo ama yere bu na dum doodoo wa? Bu mɛ sīdee na m dap su pya dɔ kpa kaɛ ama yeābah nɛ pya dɔɔ̄na a?’

3. Bu mɛ sīdee na o dap nɔɔ sɔ̄ buā Baibol a?

A aga a bah lo e’ɛrɛ sɔ̄ buā Baibol ni? Le doo wo loo gbɛnɛ-edo ii. Piiga lo e “su [o] sɔ̄ leere.” (Pya Ɛfɛsɔs 5:16) O dap doo lo ama tɛ̄maloo sere sɔ̄ o buā Baibol ziī ziī biradee. Pio nɛɛ wee sere sɔ̄ lo ebuū Baibol bagara lɔɔrɛ. Pya dɔɔ̄na wee buū sɔ̄ ba gaa seea sɔɔ̄pie. E pio nɛɛ wee buū uunɛ lɛɛ ba gae daa. Mɛ sɔ̄ na elee a loo kaāna a?

NƆ YERELOO

Ɛp kɛ̄ o dap doo kɔ o buū Baibol a kpe a loo doo. Nɔ kɛ̄ o dap kpɛ̄naloo leere doo, lokwa o ɛrɛ biī aāloo o enɔānu Baibol.

Dookɛ̄ i dap nɔ lo edoo kɔ de keekee bee nuede a nia i doo, kɛ̄ i dapnage nɔ lo edoo kɔ buū Baibol a kpe i loo doolo

4. Nɔ edoo kɔ buū Baibol a kpe a loo

Naa dap aadee waɛ lo ebɔātɛ̄ buū Baibol. Kerewo, i dap doo kɔ kaāna “taɛ” a aakɛ̄ i bu, dookɛ̄ nɛɛ dap ɛrɛ taɛ lo ede aā bee nuede a sii wee de doo. Buū 1 Pita 2:2, lɛɛ o agara ebip ama:

Lo o buū Baibol dɛ̄dɛɛ̄ dee, o kɛɛrɛge kɔ ekpe a loo ewee buū kiisī ni?

Bira lo VIDIO lo emuɛ kɛ̄ pio nɛɛ ɛrɛ ekpeloo loo buū Baibol doo. Lɛɛ o agara pya ebip a nyɔɔnɛ ama.

VIDIO: Pya Zege Ba Enɔā Lo Ewereloo Muɛ̄ Ue Bari (5:33)

Bu vidio ama, e na alu pio finiabah pya zege ebea eebah a?
E na a wa yerebah nɛ kɔ ba a nyɔɔnɛ kɛ̄ ba bee nɔɔ lo ebuū Baibol doo a?
Bu mɛ sīdee na ba doo kɔ buū Baibol a kpe wa loo a?

Pio nu eyerebah a nɛ kɔ o bɔātɛ̄:

Su lo tatap Baibol a lera, le lo alu esu muɛ̄ ue aa lu ekɔ bu ilii sɔ̄ ama tama. Naa bɔātɛ̄ aāloo New World Translation lo a le bu o muɛ̄ ue ale lo a le bu ɛrɛgeba dɔɔ̄na muɛ̄ ue o dap buū.
Tuatua, bɔātɛ̄ aāloo pya dɔ Baibol a wee a nia kaāna. Lo edābeeloo kɛ̄ edoo doo, ɛp nu alu etɔ̄ a kura “Bɔātɛ̄ Buū Baibol.”
Ɛm pya nu o nɔ aābu o buū Baibol. Su ekpo a kura “Nyɛŋiabu Nu O Buū Aābu Baibol” a le bu kpa ama daānu.
Su JW Library^®app daānu. Lo o su o dap buū Baibol sa gbaɛ̄ nage tɔ̄ sɔ̄ aa lu ebuū bie ɛrɛgeba kɛ̄ o le aābu o gbɛnɛka fon ale bu ɛrɛgeba dɔɔ̄na nu o dap bira nu aābu.
Su Appendix a le dumɛ New World Translation daānu. A aara maps, charts, le glossary lo a dap doo kɔ buū Baibol a kpe a loo kaāna.

5. Kpɛ̄naloo lɛɛ o gae bɔātɛ̄ o enɔānu Baibol

Buū Le-yɔɔ 119:34, lɛɛ o agara ebip ama:

E na anua a lee lo eyere kara lɛɛ o gae buū Baibol ale kpɛ̄naloo lɛɛ o gae bɔātɛ̄ o enɔānu Baibol a?

Bu mɛ sīdee na o dap ɛrɛ kaāna biī aāloo o enɔānu Baibol ani? Kuma sɔ̄ o gaa kpɛ̄naloo ziī ziī kɛ̄ enɔ bu ekobee ue ama, piiga lo edoo pya nu alu e’ɛm kɛɛ̄ ama:

Buū pya barakpaɛ̄ a le bɔātɛ̄ lɛɛ o gae yii loo kɛ̄ a kɔ “Nɔ Yereloo.”
Buū pya dɔ kpa kaɛ a le bu, sa piiga lo edābeeloo kɛ̄ a ɛrɛ nu edoo kiiloo lo barakpaɛ̄ doo.
Niina nu kɛɛ̄ pya bee ue ale etaā ue a agara ziī ziī lo ebip; lo ama eyerebah doo kɔ o enɔānu alu kɔnia sɔh yɛɛ o nɛɛ tɔgɛnu le ɔɔ.

O suāge ni?

Pya Ekeebee Jɛhova esua keekee tatap Baibol daānu. Mɛ lo a i nia gbɛnɛ na New World Translation of the Holy Scriptures nyɔɔbee a lera, waɛ edābeeloo, e bee Bari sira bu.—Buū ekobee ue a le nyɔɔ intanɛt “Ekɔ Pya Ekeebee Jɛhova Ɛrɛ Alaba Baibol Ni?”

PIO NƐƐ KƆ: “Nɔ Baibol aga. Mm ɛrɛ sɔ̄ ale mɛm esu nɔā.”