Lo Bari na wereloo a, e na anua gbɛnɛ-edo bag dogo aa kiisī bu pya yigabari ba kɔ ba aa taāŋae bah Bari ani? Ye ture na kɔ, pya yigabari ama lu ekwɔ; ba gbee bee Bari. Bu mɛ sīdee na ba ye gbee bee ani? Lo sīdee taāŋabah tɔɔ̄loo Bari doodoo wa? E e na aa le doo kumaloo a?

1. Ekwɔ sīdee taāŋabah gbee bee Bari tɛ̄maloo wa tɔgɛnu doodoo wa?

Ekwɔ sīdee taāŋabah e “nyaana kaka Bari nua esah.” (Pya Rom 1:25) Bu edoba, gbɛnɛ-edo sīdee taāŋabah naa tɔgɛ bee Bari pya wa nɛɛ. E Baibol kɔ, bee Bari ɛrɛ elu ekue. (Pya Rom 10:13, 14) Pio pya zaāsī yigabari kɔ ɛrɛgeba piya nu a sira lu nia Bari. Mɛ lo ama lu esah. Bari naa wee doo kɔ pɔrɔ nu a sira. (Buū Jemes 1:13.) Lu nu ekiɛ̄nu kɔ, esah a le bu keekee yigabari edoora kɔ pya nɛɛ aa werena loo Bari.

2. Bu mɛ sīdee na ekwɔ sīdee taāŋabah gbee bee Bari tɛ̄maloo wa dogo a?

Ekwɔ sīdee taāŋabah naa aara pya nɛɛ dookɛ̄ Jɛhova doo. Baibol kɔ ye “pɔrɔ eborakpo kii nyɔɔ ina loo bunyɔɔ.” (Mumuuna 18:5) Bu gbɛnɛ-edo zua lo, keekee sīdee taāŋabah e’ɛrɛ bah bu bira bɛbɛɛ, yerekpotɛ̄ benɔ̄, sa lɛɛ dum ale yerekpotɛ̄ kɔ alu efɛ gbɛnɛ-edo nɛɛ a naa waɛna esuā buā. Pio pya zaāsī yigabari gbī elu mɛnɛ sa ba bip kpugi aābah pya a wa le kɛɛ̄. Pya dogo ama tɔgɛ kɔ ba naa suāloo Bari, a maɛ lo ba eleere ye ue.—Buū 1 Jɔn 4:8.

3. Ekwɔ sīdee taāŋabah tɔɔ̄loo Bari doodoo wa?

Lo nu aa lu edoo bu ekwɔ sīdee taāŋabah bɛā a, o kɛɛrɛ kɔ a tɔɔ̄loo Jɛhova doodoo wa? Jɛhova wereloo pya nɛɛ, mɛ bu ye biira loo pya zaāsī yigabari ba gaa ye gbee bee sa aara pya a wa le kɛ̄bah bu pɔrɔ sīdee. A yira yii kɔ elu egbeesī ekwɔ sīdee taāŋabah sa “a naale eluna esikɛ̄ ye muɛ.” (Mumuuna 18:21) Bia nwīgbagbara sɔ̄, Bari gbeesī ekwɔ sīdee taāŋabah.—Mumuuna 18:8.

 NƆ YERELOO

4. Bari naa su dɛ̄dɛɛ̄ sīdee taāŋabah

Gbɛnɛ-edo nɛɛ yiga kɔ keekee sīdee taāŋabah le doodoo keekee ebadee lo dɛ̄dɛɛ̄ ɛɛ ture nɛɛ mmɛ loo Bari. Mɛ a lege doo wo ni? Buū Matiu 7:13, 14, lɛɛ o agara ebip ama:

• E na Baibol kɔ akiiloo dee a ture nɛɛ mmɛ loo dum ani?

Bira lo VIDIO, lɛɛ o agara ebip a nyɔɔnɛ ama.

• Baibol kɔge kɔ dɛ̄dɛɛ̄ sīdee taāŋabah ture nɛɛ mmɛ loo Bari ni?

 6. Bari gbī eyerebah nɛ pya nɛɛ kɔ ba a aabu ekwɔ sīdee taāŋabah

Buū Mumuuna 18:4, a lɛɛ o agara ebip ama:

• Tɔɔ̄ a loo doodoo wa sɔ̄ o suā kɔ Bari gbī eyerebah nɛ ziī ziī pya elua edag a le bu ekwɔ sīdee taāŋabah?

7. Kiisī lo enɔ nu akiiloo kaka Bari

Ekɔ pɔrɔ pɔrɔ nu ekwɔ sīdee taāŋabah aa doo e’ɛrɛ pah nyɔɔ kɛ̄ o ɛmadɛɛ̄ Bari doo ni? Naa su kɔ ziī nwiīnɛɛdam kiī le zuurabahtɔ̄ ye tɛ bee ye nɛ, a lap nu aa be sa yii bu pɔrɔ dum. Nu lo nwiī doo naa nia ye tɛ. E na anua a naa lee ebege ue tɛ loo pɔrɔ sīdee tɔɔ̄dum ye nwiī a?

• Bɔgeloo ebege ue Jɛhova sa ɔbɛ enɔ nu a ye kiiloo nyɔɔ dogo ekwɔ sīdee taāŋabah ni?

 TƐƐ̄NYƆƆ

Ekwɔ sīdee taāŋabah egbeera bee Bari tɛ̄maloo wa ekwɔ tɔgɛnu le pya saāŋa dogo ba gaa doogi. Bari gaa le gbeesī ekwɔ sīdee taāŋabah.

Ebip Tɛ̄ma Nyɔɔ

• Pya nu ekwɔ sīdee yigabari tɔgɛ le wa dogo tɔɔ̄ a loo doodoo wa?

• Ekwɔ sīdee yigabari tɔɔ̄loo Jɛhova doodoo wa?

• E na Bari edoo loo ekwɔ sīdee yigabari ani?