15 NUENƆ
Mɛɛ Na Jizɔs A?
Jizɔs lu ziī nɛɛ esiābee kaāna. Kerewo, aba nu gbɛnɛ-edo nɛɛ suā a ye kiiloo na ye bee, sa gbɛnɛ-edo aba ɛrɛ keekee ekɛɛrɛ akiiloo taɛ nɛɛ a lu. E na Baibol ye kɔ kumaloo a?
1. Mɛɛ na Jizɔs a?
Jizɔs lu ziī ɛnjɛl a ɛrɛ gbɛnɛ ekpo a le li bunyɔɔ. Jɛhova Bari bee ye dɛm lɛɛ aa dɛm pya dɔɔ̄na nu. Nyɔɔwo, alu ekue ye “lo tuatua a bee mɛā bu dɛ̄dɛɛ̄ nu a bee lu edɛm.” (Pya Kɔlɔsi 1:15) Baibol su Jizɔs kure “aba . . . Nwiīnɛɛdam [Bari]” nyɔɔbee aba Jizɔs na Jɛhova bee su taɛ alɛɛ bah dɛma a. (Jɔn 3:16) Jizɔs bee nyɔɔnɛ ye Tɛ Jɛhova si tam sa ye yerebah nɛ dɛm pya dɔɔ̄na nu. (Buū Kam 8:30.) Jizɔs bee kiisī lo enyɔɔnɛ Jɛhova gbaa tɔɔ̄ bu ɛɛbu. A bee si tam doodoo nɛɛ Bari wee kɔ ue tɛ̄maloo, lo a le lo “Bee-ue,” sa wee kɔ Ye yereue le zuurabahtɔ̄.—Jɔn 1:14.
2. E na anua Jizɔs bee lu a kɛnɛkɛ̄ a?
Nu a luge 2,000 zua akii adumɛ, Jɛhova bee su ye kaɛ edɔɔ̄ nyaana dum Jizɔs aā bunyɔɔ yere bu ziī nwī-emuā a sii si nɛɛ a kura Meri. Kɛ̄ Jizɔs bee tɛɛ̄ doo mɛā lu nɛɛ lo. (Buū Luk 1:34, 35.) Jizɔs bee lu a kɛnɛkɛ̄ sa lu Mɛsaia a bee lu eyira yii loo, ale Kraist, le lo ekpɔā miɔŋɔ nɛɛ. a Dɛ̄dɛɛ̄ mɔmanudɛɛ̄ akiiloo Mɛsaia bee dooa gbɔ̄mɛɛ̄ bu Jizɔs, lo a doo kɔ pya nɛɛ a suā ye loo nua “Kraist, Nwiīnɛɛdam Bari a le dum.”—Matiu 16:16.
3. Mɛ kɛ̄ na Jizɔs le anyaawo a?
Sɔ̄ Jizɔs e’ua sah, Bari bee ye lɛɛ kɛ̄ bu luh yere bu ekpaloo edɔɔ̄, lɛɛ a obia kii bunyɔɔ. Sɔ̄ a ina bunyɔɔ, “Bari bee ye dana nɛ nyɔɔ gbɛnɛ.” (Pya Filipai 2:9) Nyaawo, Jizɔs le dɔ a ɛrɛ gbɛnɛ ekpo, e aba Jɛhova na a ye eenyɔɔ a.
NƆ YERELOO
Nɔ lo esuā gbɛnɛ-edo nu akiiloo nɛɛ Jizɔs lu, le nu anua alu ebɛɛ̄ lo enɔ nu a ye kiiloo.
4. Jizɔs naale Bari A Eenyɔɔ Dɛ̄dɛɛ̄ Nu
Baibol tɔgɛ kɔ kere Jizɔs lu nɛɛ a ɛrɛ ekpo a le bu edɔɔ̄ li bunyɔɔ, a le kɛɛ̄ Bari alu ye Tɛ, lo a le Jɛhova. E na anua i dap kɔ doo wo a? Bira lo VIDIO lo emuɛ nu Baibol tɔgɛ akiiloo kɛ̄ Jizɔs lu kee loo Bari a eenyɔɔ dɛ̄dɛɛ̄ nu doo.
Pya dɔ kpa kaɛ a le kɛɛ̄ ama eyerebah i nɛ kɔ i dābeeloo gbanialoo a le yɛɛ Jɛhova le Jizɔs. Buū ziī ziī lo dɔ kpa kaɛ, lɛɛ o agara pya ebip a nyɔɔnɛ ama.
Buū Luk 1:30-32.
-
Mɛ sīdee na lo ɛnjɛl sere kee yɛɛ Jizɔs le Jɛhova Bari, “lo Nɛɛ A Eenyɔɔ Dɛ̄dɛɛ̄ Nu” a?
Buū Matiu 3:16, 17.
-
Sɔ̄ Jizɔs aa bee liamaā, e na ziī muɛ̄ a aa bunyɔɔ bee kɔ a?
-
Olo kɛɛrɛ kɔ a bee le muɛ̄ mɛɛ na ama ni?
Buū Jɔn 14:28.
-
Mɛɛ na a nama mɛɛ sa ɛrɛ gbɛnɛ ekpo a? Nwiī sɛh tɛ?
-
Sɔ̄ Jizɔs su Jɛhova kure ye Tɛ, e na a i tɔgɛ a?
Buū Jɔn 12:49.
-
Jizɔs bee kɛɛrɛge kɔ ye Tɛ le ɛɛ lue kunakuna ni? E na olo kɛɛrɛ a?
5. Nu a bee tɔgɛ kɔ Jizɔs na Mɛsaia a
Baibol aara gbɛnɛ-edo mɔmanudɛɛ̄ a yerebah nɛ pya nɛɛ kɔ ba a suāloo lo Mɛsaia, lo a le nɛɛ Bari bee sagɛ kɔ a kpɔā miɔŋɔ nɛɛ. Bira lo VIDIO lo enɔ nu akiiloo pya mɔmanudɛɛ̄ Jizɔs bee doo gbɔ̄mɛɛ̄ sɔ̄ a bee lu a kɛnɛkɛ̄.
Buū pya mɔmanudɛɛ̄ ama, lɛɛ o agara pya ebip a nyɔɔnɛ:
Buū Maika 5:2 lo esuā kɛ̄ a bee lu ekɔ lo Mɛsaia emɛā. b
-
Kɛ̄ Jizɔs bee mɛā bee mmɛnɛge mɔmanudɛɛ̄ ama ni?—Matiu 2:1.
Buū Le-yɔɔ 34:20 le Zekaria 12:10 lo emuɛ̄ nu Baibol bee kɔ akiiloo luh Mɛsaia.
-
Pya lo mɔmanudɛɛ̄ bee dooage gbɔ̄mɛɛ ni?—Jɔn 19:33-37.
-
O kɛɛrɛ kɔ a bee le Jizɔs na a bee doo kɔ pya lo mɔmanudɛɛ̄ a dooa ye gbɔ̄mɛɛ̄ bu ani?
-
E na ba a tɔgɛ akiiloo Jizɔs a?
6. I ɛrɛ biī aāloo nɔ nu akiiloo Jizɔs
Baibol kɔ biī a le bu nɔnɔ nu akiiloo Jizɔs le tam Bari bee ye lɛɛra. Buū Jɔn 14:6 le 17:3, lɛɛ o agara ebip ama:
-
E na anua alu ebɛɛ̄ kɔ i nɔ nu akiiloo Jizɔs ani?
Jizɔs bee kpaāna dee lokwa pya nɛɛ dap yii gbo Bari. A bee tɔgɛ kaka ue akiiloo Jɛhova, e tɛ̄maloo Jizɔs na i dap ɛrɛ dum a naatah a
PIO NƐƐ KƆ: “Pya Ekeebee Jɛhova naa yiga bu Jizɔs.”
-
Olo o bee agara doodoo wa?
TƐƐ̄NYƆƆ
Jizɔs lu ɛnjɛl a ɛrɛ ekpo. Ɛɛ Nwiīnɛɛdam Bari le Mɛsaia.
Ebip Tɛ̄ma Nyɔɔ
-
E na anua alu esu Jizɔs kure “lo tuatua a bee mɛā bu dɛ̄dɛɛ̄ nu a bee lu edɛm” a?
-
E na Jizɔs bee doo lɛɛ a elu a kɛnɛkɛ̄ a?
-
I tɛɛ̄ doodoo wa suā kɔ Jizɔs na lo Mɛsaia a?
GBĪTƐ̄ NU
Nɔ pya dɔɔ̄na nu a doo kɔ i suā kɔ Jizɔs na Mɛsaia a.
“Pya Mɔmanudɛɛ̄ Akiiloo Mɛsaia Tɔgɛge Kɔ Jizɔs Na lo Mɛsaia Ani?” (Ekobee ue a le nyɔɔ intanɛt)
Gbītɛ̄ sa suā sɛh Baibol tɔgɛge kɔ Bari bee buɛ̄ Jizɔs dookɛ̄ nɛɛ wee buɛ̄ nwiī doo naa e.
“E Na Anua Alu Esu Jizɔs Kure Nwiīnɛɛdam Bari A?” (Ekobee ue a le nyɔɔ intanɛt)
Nɔ sa suā nu anua Taa Ka Bari Bu Ziī naale tɔgɛnu Baibol.
Buū nu akiiloo kɛ̄ dum ziī wa bee nyaa doo sɔ̄ a bee gbītɛ̄ sa suā nu Baibol kɔ akiiloo Jizɔs.
“Ziī Wa Juu Bee Baatɛ̄ Nu Anua A Bee Sikɛ̄ Ɛp Nu A Yiga” (Awake!, May 2013)
b Buū 2 Ue ale dumɛ lo emuɛ̄ mɔmanudɛɛ̄ a bee kɔ taɛ sɔ̄ Jizɔs elu a kɛnɛkɛ̄.
