16 NUENƆ

E Na Jizɔs Bee Doo Sɔ̄ A Bee Le A Kɛnɛkɛ̄ A?

PLAY

Gbɛnɛ-edo nɛɛ kɛɛrɛ kɔ Jizɔs lu nwīgbagbara nwiī, nɛɛ zue ue a suā nu gbɛnɛ, ale nɛɛ e’ina aa u. Mɛ i dapge nɔ gbɛnɛ-edo nu a ye kiiloo tɛ̄maloo egbītɛ̄ nu akiiloo ye tɔɔ̄dum a kɛnɛkɛ̄ ni? Bu nuenɔ ama, i gaa le kɛɛrɛ bu pio nu a kuī eera Jizɔs bee doo le kɛ̄ pya lo nu i dap yerebah nɛ doo.

1. Amunu tam na a bee kuī loo Jizɔs a?

Tam a bee kuī loo Jizɔs na “zue le yereue Buɛ̄-mɛnɛ” Bari. (Buū Luk 4:43.) A bee zue le yereue kɔ Bari ewu ziī buɛ̄-mɛnɛ, ale bɛbɛɛ lo elɛɛ dɛ̄dɛɛ̄ taāŋa pya nɛɛ. a Jizɔs bee su mɛm zuema lo le yereue loo taa zua le siga.—Matiu 9:35.

2. E na anua Jizɔs bee sigara nyɛŋia tam a?

Baibol baatɛ̄ “gbɛnɛ tam, le nyɛŋia le edoba nu lo Bari bee doo . . . tɛ̄mabah [Jizɔs].” (Doonu 2:22) Tɛ̄maloo ekpo Bari, Jizɔs bee ɛrɛ ekpo loo sī-dee, nɛ nuede gbɛnɛ-edo nɛɛ, bo pya loo dumɛ, sa lɛɛnage pya a bee u kɛ̄ bu luh. (Matiu 8:23-27; 14:15-21; Maak 6:56; Luk 7:11-17) Pya nyɛŋia tam Jizɔs bee si tɔgɛ kɔ Bari na a bee ye yere a. A tɔgɛnage kɔ Jɛhova ɛrɛ ekpo elɛɛ dɛ̄dɛɛ̄ i taāŋa.

3. E na i dap nɔ aāloo sīdee tɔɔ̄dum Jizɔs a?

Jizɔs bee gbaɛ̄tɔ̄loo Jɛhova bu dɛ̄dɛɛ̄ kɛ̄tɔɔ̄. (Buū Jɔn 8:29.) Kaɛlɛɛ gbanasī, Jizɔs bee yira agɛrɛ sa doo nu ye Tɛ ye gbī aābah mmɛ loo luh. A bee tɔgɛ kɔ pya nɛɛ dap taāŋabah Bari kere sɔ̄ ba le bu e’aga kɛ̄tɔɔ̄. Nyɔɔwo, Jizɔs “bie edoba nu i nɛ kɔ [i] nyɔɔnɛ ye elap tɔ kiā.”—1 Pita 2:21.

NƆ YERELOO

Kɛɛrɛ sīdee Jizɔs bee zue le yereue sa si nyɛŋia tam.

4. Jizɔs bee zue le yereue

Jizɔs bee kiā nyɔɔnyɔɔ dɛɛ̄ kiā nyɔɔ pya dee alu tɔ̄tɔ̄, zuegi le yereue nɛ dɛ̄dɛɛ̄ nɛɛ a muɛ. Buū Luk 8:1, lɛɛ o agara pya ebip ama:

Jizɔs wee zuege ue nɛ aba pya a bɔŋana lo egbaɛ̄ ye tɔ̄loo ni?
Amunu epiaga na Jizɔs bee doo lo egbī pya nɛɛ a?

Bari ebee kɔ sere kɛ̄ kɔ Mɛsaia ezue le yereue. Buū Aisaia 61:1, 2, lɛɛ o agara pya ebip ama:

Jizɔs bee doo gbɔ̄mɛɛ̄ mɔmanudɛɛ̄ ama doodoo wa?
O kɛɛrɛge kɔ alu ebɛɛ̄ kɔ pya nɛɛ a dā lo le yereue bu ilii dee ama ni?

5. Jizɔs bee tɔgɛ kaka ue a dɔbiī

Gbaāloo zue le yereue akiiloo Buɛ̄-mɛnɛ Bari, Jizɔs bee tɔgɛ gbɛnɛ-edo nu edap i dɔbiī nɛ. Naa ɛp pio edoba aāloo ye Ekɔaue Nyɔɔ Kpokɛ̄. Buū Matiu 6:14, 34 le 7:12, lɛɛ o agara pya ebip ama:

Amunu zuurabahtɔ̄ a dɔbiī na Jizɔs nɛ bu pya dɔ ama a?
O kɛɛrɛ kɔ zuurabahtɔ̄ ama dap lege aa i yerebah nɛ anii’ee ni?

6. Jizɔs bee si nyɛŋia tam

Jɛhova bee nɛ ekpo Jizɔs kɔ a siā booboo nyɛŋia tam. Lo emuɛ ziī edoba, buū Maak 5:25-34 ale o bira lo VIDIO. Lɛɛ o agara pya ebip a nyɔɔnɛ ama.

VIDIO: Lu Ebo Wa Loo Bee Dumɛ (5:10)

Bu vidio o ɛp sah ama, e na wa loo bee dumɛ a bee yiga a?
E na a a nia a le loo nyɛŋia tam Jizɔs bee si ama a?

Buū Jɔn 5:36, lɛɛ o agara ebip ama:

Amunu “ekeebee” na pya nyɛŋia tam Jizɔs bee si ye yira kumaloo a?

O suāge ni?

Gbɛnɛ-edo nu i suā akiiloo Jizɔs aabu nia kpa a le bu Baibol alu ekure Kpa Le Yereue, lo a le Matiu, Maak, Luk, le Jɔn. Ziī ziī nɛɛ a bee ɛm pya lo Kpa Le Yereue kɔ keekee nu ba suā akiiloo Jizɔs. Nu dɛ̄dɛɛ̄ nia pya a ɛm Kpa Le Yereue ɛm doo kɔ i suā pya nu a bee sira bu dum Jizɔs.

MATIU

na a bee dasī ɛm alɛɛ Kpa a. A baatɛ̄ pya tɔgɛnu Jizɔs, eetɔɔ̄ na pya nu a bee tɔgɛ akiiloo Buɛ̄-mɛnɛ Bari.
MAAK

na a bee ɛm lo Kpa Le Yereue a kpuria kaāna a. A kɔ nu akiiloo pya siranu a ɛɛrɛbu nɛɛ.
LUK

kɔ kɛ̄ yere kara bee kuī loo Jizɔs doo, le kɛ̄ a bee aara pya nɛɛwa doo.
JƆN

muuna gbɛnɛ-edo nu akiiloo elap dogo Jizɔs tɛ̄maloo ekɔ booboo ue a bee nyɔɔnɛ pya ye gbo le pya dɔɔ̄na kɔnia.