17 NUENƆ

Jizɔs Lu Mɛ Dua Nɛɛ?

PLAY

Sɔ̄ i nɔ nu akiiloo pya ue Jizɔs kɔ le pya nu a bee doo a kɛnɛkɛ̄, i muɛ lele elap dogo a i zuura ye nwamaloo le loo ye Tɛ, Jɛhova. E na alu pio lo lele elap dogo a? E mɛ sīdee na i dap nɔ Jizɔs bu ilii dum a?

1. Bu pya amunu sīdee na Jizɔs bee ye Tɛ a?

Sɔ̄ Jizɔs bee le bunyɔɔ, a bee ɛp nu ye wereloo Tɛ aa doo sa ye nɔ nu aāloo bu gbɛnɛ-edo zua. E nu a sira aabu na kɔ, ye ekɛɛrɛ, kɛ̄ nu ye tɔɔ̄loo doo, le ye dogo bee taɛ lo ye Tɛ. (Buū Jɔn 5:19.) Lu kaka kɔ, Jizɔs bee ye Tɛ mmɛ kɛ̄ a kɔ: “Nɛɛ a emɔna mɛ emɔna Tɛ a.” (Jɔn 14:9) Kuma sɔ̄ o gaa nɔ pya dogo Jizɔs, kɛ̄ o suānage loo Jɛhova leere doolo. Bu edoba, esaɛ̄ beenyiɛ Jizɔs bee ɛrɛ loo pya nɛɛ tɔgɛ ekɛɛrɛ Jɛhova ɛrɛ kumaloo olo.

2. Mɛ sīdee na Jizɔs bee tɔgɛ kɔ a wereeloo Jɛhova a?

Jizɔs bee kɔ: “Mɛ m doo dookɛ̄ Tɛ bee mɛ nɛ lok doo, lokwa nyɔuwe suā kɔ m wereloo Tɛ a.” (Jɔn 14:31) Sɔ̄ Jizɔs bee le a kɛnɛkɛ̄, a bee tɔgɛ kɔ a wereeloo ye Tɛ kaāna tɛ̄maloo egbaɛ̄ ye tɔ̄ loo kere bu e’aga kɛ̄tɔɔ̄. Wee nianage Jizɔs ekɔ nu akiiloo ye Tɛ sa yerebah nɛ pya dɔɔ̄na kɔ ba a yii ye gbo.—Jɔn 14:23.

3. Jizɔs bee tɔgɛ kɔ a wereeloo pya nɛɛ doodoo wa?

Baibol kɔ Jizɔs ɛrɛ gbɛnɛ “ɛɛbu bu miɔŋɔ pya nɛɛ.” (Kam 8:31) A bee tɔgɛ lo wereloo tɛ̄maloo eyere mɛm loo pya nɛɛ sa su ye loo nɛ lo eyerebah wa nɛ. Naale aba ekpo Jizɔs ɛrɛ na pya nyɛŋia tam a bee si tɔgɛ a, mɛ a tɔgɛnage kɔ a ɛrɛ toesaɛ̄. (Maak 1:40-42) A bee lu fɛgɛ loo dɛ̄dɛɛ̄ nɛɛ sa naa bee ɛp sī nɛɛ. Dɛ̄dɛɛ̄ ye ue bee nɛ egbɔ̄nyiɛ le bɛābu pya nɛɛ le beenyiɛ a ye gbaɛ̄tɔ̄loo. Jizɔs bee kpɛ̄naloo etɔga sa u nyɔɔ dɛ̄dɛɛ̄ miɔŋɔ nɛɛ nyɔɔ wereloo a ɛrɛ. Mɛ a ɛrɛ keebee wereloo nyɔɔ pya a su ye tɔgɛnu.—Buū Jɔn 15:13, 14.

NƆ YERELOO

Nɔ nu akiiloo pya lele elap dogo Jizɔs yereloo. O nɔnage lo etɔgɛ wereloo sa dɔɔ̄nu yaaribah dookɛ̄ alɛ bee doo doo.

4. Jizɔs wereloo ye Tɛ

Edoba Jizɔs yerebah i nɛ kɔ i muɛ kɛ̄ i dap tɔgɛ wereloo kumaloo Bari doo. Buū Luk 6:12 le Jɔn 15:10; 17:26. Agara ebip ama sɔ̄ o ebūna ziī ziī dɔ kpa kaɛ ama sah:

Bu nɔnɔ Jizɔs, i dap tɔgɛ kɔ i wereeloo Jɛhova doodoo wa?

Jizɔs wereloo ye Tɛ a le li bunyɔɔ gbɛnɛ, nyɔɔwo a wee ye kɔ ue nɛ gbɛnɛ-edo sɔ̄ tɛ̄maloo yere kara

5. Jizɔs wee kuūdɛɛ̄loo pya a le bu ebɛɛ̄

Ebɛɛ̄ pya dɔɔ̄na wee kuī loo Jizɔs ee lo alɛ. Kere sɔ̄ Jizɔs le bu e’ɔaloo, a bee kiisī lo eyerebah nɛ pya dɔɔ̄na. Buū Maak 6:30-44, lɛɛ o agara pya ebip ama:

Bu e’ɛma ama, pya amunu sīdee na Jizɔs tɔgɛ kɔ a kɛɛrɛe pya dɔɔ̄na a?—Ɛp ye 31, 34, 41, le 42 barakpaɛ̄.
E na a bee zū Jizɔs kɔ a yerebah nɛ pya nɛɛ a?—Ɛp 34 barakpaɛ̄.
Kɔ Jizɔs ɛrɛ pya lele elap dogo Jɛhova, tɔgɛ a e akiiloo Jɛhova?
Bu pya amunu sīdee na i dap nɔ lo e’ɛrɛ dua ekɛɛrɛ Jizɔs bee ɛrɛ kumaloo pya nɛɛ a?

6. Jizɔs para dɔɔ̄ nu

Jizɔs wee dɔɔ̄ nu kaāna kere a naa bee ɛrɛ gbɛnɛkpo zɔ, sa a bee i yerenage mɛm loo kɔ i dɔɔ̄ nu nɛ pya dɔɔ̄na. Buū Doonu pya Nɛɛ lɛɛratam 20:35, lɛɛ o agara ebip ama:

Dookɛ̄ Jizɔs bee kɔ doo, e na i doo lokwa i ɛrɛ ɛɛbu a?

Bira lo VIDIO, lɛɛ o agara ebip a nyɔɔnɛ ama.

VIDIO: “Gbɛnɛ Ɛɛbu Le Bu Nɛnɛ Ee Susu”—Sigaloo (4:00)

Pio amunu sīdee na i dap dɔɔ̄ nu kere ii lu mɛnɛ a?

O suāge ni?

Baibol tɔgɛ i kɔ i yere kara nɛ Jɛhova tɛ̄ma bu bee Jizɔs. (Buū Jɔn 16:23, 24.) Sɔ̄ i yere kara doo wo, i tɔgɛ kɔ i yeree nukuādɛɛ̄ loo nu Jizɔs bee doo lo eyerebah kɔ i dap yii gbo Jɛhova.

PIO NƐƐ KƆ: “I tɔga naa kiɛ̄ Bari.”

Kuma sɔ̄ Jizɔs ɛrɛ pya lele elap dogo a le bu Jɛhova a, mɛ sīdee na dɛ̄dɛɛ̄ nu a bee doo a kɛnɛkɛ̄ tɔgɛ kɔ Jɛhova kuū i dɛɛ̄ loo a?

TƐƐ̄NYƆƆ

Jizɔs wereloo Jɛhova, sa werenage loo pya nɛɛ. Nyɔɔbee Jizɔs bee ye Tɛ a, kumakɛ̄ o nɔ nu akiiloo Jizɔs sa ye suāloo doo, kɛ̄ o suānage loo Jɛhova ye tɛ̄maloo doolo.