18 NUENƆ
Kɛ̄ Etɛɛ̄ Doo Suāloo Pya Kaka Nɛɛ Kraist
Gbɛnɛ-edo pya nɛɛ daādaa kɔ ba lue Pya Nɛɛ Kraist. Mɛ dɛ̄dɛɛ̄ aba naa gbaa yiga aba nu, e wa tɔgɛnu nyɔɔ daakuu tɔɔ̄dum lugara keekee. Nyɔɔwo, i tɛɛ̄ doodoo wa suāloo pya kaka Nɛɛ Kraist?
1. E na a kura Nɛɛ Kraist a?
Pya Nɛɛ Kraist na pya a nyɔɔnɛ dumɛ Jizɔs Kraist. (Buū Doonu pya Nɛɛ lɛɛratam 11:26.) Mɛ sīdee na ba tɔgɛ kɔ ba lue pya a wee nyɔɔnɛ dumɛ Jizɔs a? Jizɔs bee kɔ: “Lo a le bui tɔɔ̄ bu na ue, bui lu kaāna pya a wee mɛ nyɔɔnɛ dumɛ.” (Jɔn 8:31) Lo ama kura kɔ pya kaka Nɛɛ Kraist ɛrɛ egbaɛ̄tɔ̄ dɛ̄dɛɛ̄ tɔgɛnu Jizɔs. E dookɛ̄ Jizɔs bee dɛɛa nyɔɔ Kpa Kaɛ bu dɛ̄dɛɛ̄ ye tɔgɛnu doo, kɛ̄ pya kaka Nɛɛ Kraist muɛnage kɔ nu ba yiga dɛɛa nyɔɔ tɔgɛnu Baibol doolo.—Buū Luk 24:27.
2. Pya kaka Nɛɛ Kraist tɔgɛ wereloo doodoo wa?
Jizɔs bee kɔ nɛ pya a wee ye nyɔɔnɛ dumɛ kɔ ba a ‘Wereloo ɛnia aba dookɛ̄ alɛ wa wereeloo doo.’ (Jɔn 15:12) Mɛ sīdee na Jizɔs tɔgɛ kɔ a wereeloo pya a wee ye nyɔɔnɛ dumɛ a? A bee su gbɛnɛ-edo sɔ̄ wa tɔ̄ma kpaɛ̄, wa yeā mɛm loo, sa wa yerebah nɛ. A bee wa unage bee. (1 Jɔn 3:16) Bu aba lo sīdee, wereloo pya kaka Nɛɛ Kraist naa wee wa bia aba bu egā. Mɛ ba wee tɔgɛ kɔ ba wereeloo ɛnia aba bu muɛ̄ ue le bu dogo.
3. Amunu tam na pya kaka Nɛɛ Kraist aa si a?
Jizɔs bee yere gbɛnɛ tam bah pya a wee ye nyɔɔnɛ dumɛ. “A yere wa lo ezue ue Buɛ̄-mɛnɛ Bari.” (Luk 9:2) Naale aba kɛ̄ Pya Nɛɛ Kraist bu bagara sɔ̄ bee zue ue na wa kɛ̄ etɔɔ̄ taāŋabah, mɛ ba bee zuenage ue taɛkɛ̄ le aā ziī tɔ̄ yii ziī. (Buū Doonu pya Nɛɛ lɛɛratam 5:42; 17:17.) Niī’ee, pya kaka Nɛɛ Kraist aa zuenage le yereue Baibol ɛrɛgeba kɛ̄ ba gbī pya nɛɛ muɛ. Wereloo ba ɛrɛ loo pya le aba le doo kɔ ba a su wa sɔ̄ le mɛm zuema pya ue a nɛ egbɔ̄nyiɛ le bɛābu a le bu Baibol wa nɛ.—Maak 12:31.
NƆ YERELOO
Ɛp kɛ̄ o dap sere kee yɛɛ pya kaka Nɛɛ Kraist le pya a naa su tɔgɛnu Jizɔs sa nyɔɔnɛ ye edoba doo.
4. Ba bee gbī kaka ue Baibol
Muɛ Ue Bari bee kuī loo Pya Nɛɛ Kraist a bee le bu bagara sɔ̄ a
Naale dɛ̄dɛɛ̄ pya a kɔ ba lue Pya Nɛɛ Kraist na kaka ue Baibol kuī loo a. Bira lo VIDIO, lɛɛ o agara ebip a nyɔɔnɛ ama.
-
Mɛ sīdee na pio tɔbari a kɔ ba lue Pya Nɛɛ Kraist kpaɛ̄ tɔgɛnu Jizɔs lɛɛ loo pya wa nɛɛ a?
Jizɔs bee tɔgɛ kaka ue aābu Muɛ̄ Ue Bari. Buū Jɔn 18:37, lɛɛ o agara ebip ama:
-
Dookɛ̄ Jizɔs bee kɔ doo, e na alu nukuādɛɛ̄ i su suāloo Pya Nɛɛ Kraist ba “aaloo kaka ue” a?
5. Ba zue kaka ue Baibol
Pya Nɛɛ Kraist a bee le bu bagara sɔ̄ a bee zue ue nɛ pya dɔɔ̄na
Lɛɛ Jizɔs a ekii bunyɔɔ, a bee nɛ tam pya a wee ye nyɔɔnɛ dumɛ lo aa luge esi mmɛ niī’ee. Buū Matiu 28:19, 20 le Doonu pya Nɛɛ lɛɛratam 1:8, lɛɛ o agara ebip ama:
-
Elu esitam zue ue mmɛ mɛ sɔ̄ le mɛ kɛ̄?
6. Ba doo nu ba zue
E na a bee doo kɔ ziī gbara a kura Tom a yiga kɔ emɔnae kaka sīdee taāŋabah a? Bira lo VIDIO, lɛɛ o agara pya ebip a nyɔɔnɛ ama.
-
Bu lo vidio, e na a bee doo kɔ Tom a biewo esi tɔbari a?
-
E na a bee doo kɔ a suā kɔ emɔnae kaka sīdee taāŋabah a?
Dogo nɛɛ kɔ ue ee nu a kɔ. Buū Matiu 7:21, lɛɛ o agara ebip ama:
-
Amunu na a kuī loo Jizɔs a, lege nu i daādaa kɔ i yigae sɛh nu i dogo tɔgɛ siā?
7. Ba wereloo ɛnia aba
Pya Nɛɛ Kraist a bee le bu bagara sɔ̄ a bee wereloo ɛnia aba
Luge kaka kɔ pio Nɛɛ Kraist ekpɛ̄naloo e’u bee pya dɔɔ̄na Nɛɛ Kraist ni? Bira lo VIDIO, lɛɛ o agara pya ebip a nyɔɔnɛ ama.
-
Bu lo vidio, e na a bee zū Lloyd kɔ a kpɛ̄naloo enɛ ye dum nyɔɔ Wuga Nɛɛdam Johansson a?
-
Nu a doo ama tɔgɛge a kɔ ɛɛ kaāna Nɛɛ Kraist ni?
Buū Jɔn 13:34, 35, lɛɛ o agara pya ebip ama:
-
Bu mɛ sīdee na pya a nyɔɔnɛ dumɛ Kraist (lo a le pya kaka Nɛɛ Kraist) e’aara pya a aa dɔɔ̄na edo a?
-
Ba edoo lo ama doodoo wa sɔ̄ nɔ̄ dɔ?
PIO NƐƐ KƆ: “Pya a kɔ ba lue Pya Nɛɛ Kraist edora gbɛnɛ-edo piya nu—nyɔɔwo ba tɛɛ̄ doodoo wa kɔ ba lue pya kaka taāŋabah Bari?”
-
Amunu dɔ kpa kaɛ na o dap buū nɛ nɛɛ a kɔ doo wo, lo etɔgɛ kɛ̄ etɛɛ̄ doo suāloo pya aa taāŋabah Bari bu kaka sīdee a?
TƐƐ̄NYƆƆ
Pya kaka Nɛɛ Kraist nyɔɔnɛ tɔgɛnu Baibol, tɔgɛ wereloo suloo nwaana zɔɔ, sa zue kaka ue Baibol.
Ebip Tɛ̄ma Nyɔɔ
-
Tɔgɛnu pya kaka Nɛɛ Kraist dɛɛa nyɔɔ e?
-
Amunu elap na a yere nukuādɛɛ̄ loo pya kaka Nɛɛ Kraist a?
-
Amunu tam na pya kaka Nɛɛ Kraist wee si a?
GBĪTƐ̄ NU
Gbītɛ̄ yereloo lo esuāloo ziī eku pya aa piiga lo enyɔɔnɛ edoba Jizɔs le dɛ̄dɛɛ̄ ye tɔgɛnu.
Buū nu a bee doo kɔ ziī wa a wee le bu yigabari fada sɔ̄ akii adumɛ a gbī “butɔ a ɛrɛ bɔɔ loo Bari muɛ.”
“Ba Su Baibol Aŋana Dɛ̄dɛɛ̄ Ebip Alu Ebip Wa!” (The Watchtower, April 1, 2014)
Ɛp kɛ̄ pya kaka Nɛɛ Kraist tɔgɛ wereloo kumaloo pya wa wuga bu yira a le bu ebɛɛ̄ doo.
Gbī muɛ kɛ̄ Pya Nɛɛ Kraist bu bagara sɔ̄ le pya kaka Nɛɛ Kraist bu ilii dee ama ɛrɛ nukuādɛɛ̄ Jizɔs bee kɔ ele loo pya a ye nyɔɔnɛ dumɛ doo.
“E Na Alu Nukuādɛɛ̄ a Le Loo Kaka Bɔŋanaloo Kraist A?” (The Watchtower, March 1, 2012)
