Jɛhova lu Bari a para nɔɔnu. (1 Pya Kɔrint 14:33) Nyɔɔwo i ɛmadɛɛ̄ kɔ pya ye zooro edoonage nu nyɔɔ etaā. Mɛ sīdee na alu enɔɔ bɔŋanaloo pya Nɛɛ Kraist sere nyɔɔ etaā a? E na ili dap doo lokwa a kiā leere a?

1. Mɛɛ na alu ekobee loo bɔŋanaloo a?

“Kraist lu ekobee loo bɔŋanaloo.” (Pya Ɛfɛsɔs 5:23) Jizɔs yira bunyɔɔ sa kuūdɛɛ̄loo dɛ̄dɛɛ̄ tam pya nɛɛ Jɛhova tɛɛ̄ ɛŋɛnɛ nyɔuwe. A tubobaloo “zooro a bɔloo eture nyiɛ loo sa suānu” lo a le nwīgbagbara eku pya kanɛɛ ba e’agaloo sa suānu alunage ekue Eku A Baɛbee. (Buū Matiu 24:45-47.) Doodoo pya nɛɛ lɛɛratam bu tua sɔ̄ o’oo tup zua le pya kanɛɛ bu Jerusalɛm, Eku A Baɛbee kuūdɛɛ̄loo bɔŋanaloo tɛɛ̄ ɛŋɛnɛ nyɔuwe. (Doonu 15:2) Mɛ ba naa lu ekobee loo i bɔŋanaloo. Ba gbī baɛbee aābah Jɛhova le bu ye Muɛ̄ Ue, e ba nyɔɔnɛ tɔgɛ dee Jizɔs doodoo nɛɛ alu ekobee loo bɔŋanaloo.

2. E na alu tam pya kanɛɛ wee si a?

Pya kanɛɛ na pya nɛɛdam enyima tura bu bɔŋanaloo Kraist, ba dap su Kpa Kaɛ tɔŋɛnu, sa kuūdɛɛ̄loo pya nɛɛ Jɛhova tɛ̄maloo eyerebah wa nɛ sa wa yere mɛm loo. Naa lu ekpɛ wa kpugi loo tam ba aa si. Taāwo, ba si wa tam “tɛ̄maloo gbīgbī, naale nyɔɔ biī bɔp kɛɛ, mɛ bu kirikiri.” (1 Pita 5:1, 2) Pya kanɛɛ ɛrɛ pya wuga nɛɛdam a wee wa yerebah nɛ alu ekure pya yerebah tam, lo sɔ̄ sɔ̄ aa kiisī ba wee nyim tura lo esinage tam doodoo pya kanɛɛ.

Eku A Baɛbee tubobaloo pio pya kanɛɛ nua pya kuūdɛɛ̄loo sɛkiut. Ba wee sigara bu keekee bɔŋanaloo lo ekɔ pya ue zuurabahtɔ̄ wa nɛ sa wa yere mɛm loo. Alaba tubobaloo pya elu nɛɛ kanɛɛ le pya yerebah tam ba edɔa zɔ̄ŋiadɛɛ̄ daakuu Kpa Kaɛ.—1 Timɔti 3:1-10, 12; Taitɔs 1:5-9.

3. Amunu tam na ziī ziī nɛɛ Ekeebee Jɛhova ɛrɛ a?

Dɛ̄dɛɛ̄ nɛɛ a le bu bɔŋanaloo “leera bee Jɛhova” tɛ̄maloo esudɔ bu dɛ̄dɛɛ̄ i enɔānu sa si tam zue ue eree sɔ̄ loo dookɛ̄ wa kɛ̄tɔɔ̄ nɛ dee doo.—Buū Le-yɔɔ 148:12, 13.

 NƆ YERELOO

4. Jizɔs lu nɛɛ zaāsī a nɛ ziīnɛloo pya nɛɛ

Jizɔs kue dɛ̄dɛɛ̄ ii. Buū Matiu 11:28-30, lɛɛ o agara ebip ama:

• Jizɔs gbī kɔ ye baɛbee a tɔɔ̄ i loo doodoo wa?

5. Pya kanɛɛ doo nu ba tɔgɛ

1. Pya kanɛɛ piiga lo emuɛ kɔ alaba le pya wa butɔ agaloo bu edɔɔ̄

2. Pya kanɛɛ kuūdɛɛ̄loo dɛ̄dɛɛ̄ nɛɛ a le bu bɔŋanaloo

3.   Pya kanɛɛ wee su mɛm zuema ue

4. Pya kanɛɛ lu pya tɔgɛnu. Ba yerenage bah lo ekwakɛ̄ sa si pya dɔɔ̄na tam

6. I dap gbabee bah pya kanɛɛ

Baibol kɔ taɛ nu anua a bɔloo kɔ i gbabee bah pya kanɛɛ. Buū Pya Hibru 13:17, lɛɛ o agara pya ebip ama:

• Ziī suānu lege bu kɔ Baibol yere i mɛm loo kɔ i gbaɛ̄tɔ̄ sa tɔɔ̄ kɛɛ̄ pya a i zaāsī ni? E na anua o kɛɛrɛ doo wo a?

Buū Luk 16:10, lɛɛ o agara ebip ama:

• E na anua a bɔloo kɔ i gbaɛ̄tɔ̄ pya kanɛɛ kere bu nwīgbagbara nu a?

 TƐƐ̄NYƆƆ

Jizɔs na ekobee loo bɔŋanaloo a. I wee su ɛɛbu gbamatɔ̄ pya kanɛɛ ba aa si tam kɛɛ̄ Jizɔs nyɔɔbee ba nɛ i ziīnɛloo sa i tɔgɛ le edoba.

Ebip Tɛ̄ma Nyɔɔ

• Mɛɛ na alu ekobee loo bɔŋanaloo a?

• Mɛ sīdee na pya kanɛɛ yerebah nɛ bɔŋanaloo a?

• Amunu tam na a le nɛ ziī ziī pya a taāŋabah Jɛhova a?