21 NUENƆ
Mɛ Sīdee Na Aa Lu Ezue Le Yereue Ani?
Jɛhova elɛɛ dɛ̄dɛɛ̄ i taāŋa tɛ̄maloo ye Buɛ̄-mɛnɛ. Lee kɔ dɛ̄dɛɛ̄ nɛɛ a dā gbɛnɛ le yereue ama. Jizɔs gbī kɔ pya a ye nyɔɔnɛ dumɛ a kɔ lo yereue nɛ pya dɔɔ̄na! (Matiu 28:19, 20) Mɛ sīdee na Pya Ekeebee Jɛhova aa sere lok Jizɔs bee nɛ ama a?
1. Matiu 24:14 aa dooa gbɔ̄mɛɛ doodoo wa aniī’ee?
Jizɔs bee kɔ sere kɛ̄ kɔ: “A elu ezue le yereue ama lo Buɛ̄-mɛnɛ tɛ̄ma ɛŋɛnɛ dɛ̄dɛɛ̄ nyɔuwe.” (Matiu 24:14) Pya Ekeebee Jɛhova aa su ɛɛbu siā gbɛnɛ tam ama. I gaa zue ue bu nu a eeloo 1,000 muɛ̄ ue tɛɛ̄ ɛŋɛnɛ nyɔuwe! Lo gbɛnɛ nyɛŋia tam ama gbī kaāna epiaga le nɔnɔɔnu. Lo a naale tɛ̄maloo yerebah Jɛhova, naale ebee waɛ.
2. Pio ena i edoora lokwa i dap zue le yereue a?
I zue ue ɛrɛgeba kɛ̄ i dap gbī pya nɛɛ muɛ. Doodoo Pya Nɛɛ Kraist bu tua sɔ̄ o’oo tup zua a, i zue ue ‘aa ziī tɔ yii ziī.’ (Doonu 5:42) Sīdee alu enɔɔ lo tam doo kɔ i inaloo gbɛnɛ-edo nɛɛ bu ziī ziī zua. Nyɔɔbee pya nɛɛ naa wee le tɔ dɛ̄dɛɛ̄ sɔ̄ a, i wee zuenage ue kɛ̄ pya nɛɛ bɔŋia. I kiinagesī lo esu ɛrɛgeba dee a i kpaā nɛ zuema nu akiiloo Jɛhova le ekɛɛrɛ a ɛrɛ kumaloo pya nɛɛ.
3. Ba mɛɛ na alu enɛ tam zue le yereue a?
Tam zue le yereue nɛ pya dɔɔ̄na lu toh a le bee dɛ̄dɛɛ̄ pya kaka Nɛɛ Kraist. I su i tam ama nua gbɛnɛ. I piiga kaāna lo ezue ue dookɛ̄ i kɛ̄tɔɔ̄ i nɛ dee doo nyɔɔbee i suā kɔ dum pya nɛɛ le bu pe. (Buū 1 Timɔti 4:16.) Naa wee lu ekpɛ i lɔgɔ kpugi loo pya tam ama, nyɔɔbee Baibol kɔ: “Bui bee su yɔrɔ, bui nɛaa yɔrɔ.” (Matiu 10:7, 8) Naale dɛ̄dɛɛ̄ nɛɛ na a wee gbaɛ̄tɔ̄ i yereue a. Kerewo, i kiisī lo ezue nyɔnɛbee alu ziī gah loo i taāŋabah, e a doonage kɔ bu Jɛhova a ɛɛ.
NƆ YERELOO
Nɔ lo esuā kɛ̄ Pya Ekeebee Jɛhova aa piiga lo ezue ue tɛɛ̄ ɛŋɛnɛ nyɔuwe doo, sa muɛ kɛ̄ Jɛhova aa i yerebah nɛ doo.
Tam zue ue tɛɛ̄ ɛŋɛnɛ nyɔuwe: (A) Costa Rica, (B) United States, (C) Benin, (D) Thailand, (E) Yap, (F) Sweden
4. I piiga lo e’inaloo dɛ̄dɛɛ̄ nɛɛ
Pya Ekeebee Jɛhova piiga kaāna lo esu le yereue mmɛ loo dɛ̄dɛɛ̄ nɛɛ bie ɛrɛgeba kɛ̄ ba le. Bira lo VIDIO, lɛɛ o agara ebip a nyɔɔnɛ ama.
-
E na a a nia akiiloo kɛ̄ Pya Ekeebee Jɛhova piiga lo ezue ue doo a?
Buū Matiu 22:39 le Pya Rom 10:13-15, lɛɛ o agara pya ebip ama:
-
Mɛ sīdee na i tam zue ue tɔgɛ kɔ i wereloo pya nɛɛ a?
-
Jɛhova ɛp pya a zue le yereue doodoo wa?—Ɛp 15 barakpaɛ̄.
5. Ili yɔ Bari si tam
Gbɛnɛ-edo nu esira tɔgɛ kɔ Jɛhova aa zaāsī i esiatam. Bu edoba, bie New Zealand ziī i wuga nɛɛdam bee zɔŋia ziī wa sɔ̄ ba aa zue ue aa ziī tɔ yii ziī taɛ sɔɔ̄pie. Taɛ lɔɔrɛ lo dee, lo wa bee yere kara nɛ Bari sa kue ye bee a kura Jɛhova, ye bara kɔ a yere ziī nɛɛ ye ma. Pɔɔl bee kɔ; “Taa awa aā lo sɔ̄, m bee kpoga ye bū.”
Buū 1 Pya Kɔrint 3:9, lɛɛ o agara ebip ama:
-
Bu mɛ sīdee na pya siranu a doodoo lo alu ekɔ a bee sira New Zealand tɔgɛ kɔ Jɛhova aa zaāsī tam zue ue a?
Buū Doonu pya Nɛɛ lɛɛratam 1:8, lɛɛ o agara ebip ama:
-
Ena anua i gbī yerebah Jɛhova lo esi i tam zue ue gbɔ̄mɛɛ a?
O suāge ni?
Bie dɛ̄dɛɛ̄ i enɔānu taɛyɛɛ kaɛ, wee lu etɔgɛ i edoba a i yerebah nɛ kɔ i para zue ue. Lo o esia ziī yɛɛ pya lo enɔānu, lo tɔgɛnu tɔɔ̄ a loo doodoo wa?
6. I sere lok Bari a kɔ i zue ue
Bu tua sɔ̄ o’oo tup zua a, pya gbanasī bee kɔ pya a wee nyɔɔnɛ dumɛ Jizɔs aa zuena ue. Pya Nɛɛ Kraist bu bagara sɔ̄ ama bee tɔgɛ kɛ̄ a bɔloo kɔ ba a zuee ue doo tɛ̄maloo wa “yira agɛrɛ loo le yereue.” (Pya Filipai 1:7) Kɛ̄ Pya Ekeebee Jɛhova doonage lo aniī’ee. a
Buū Doonu pya Nɛɛ lɛɛratam 5:27-42, lɛɛ o agara ebip ama:
-
E na anua ii le e’ɔbɛ zue ue a?—Ɛp 29, 38, le 39 barakpaɛ̄.
ZIĪ NƐƐ DAP BIP KƆ: “E na anua Pya Ekeebee Jɛhova zue ue aa ziī tɔ yii ziī a?”
-
O agara doodoo wa?
TƐƐ̄NYƆƆ
Jizɔs bee nɛ lok pya a wee ye nyɔɔnɛ dumɛ kɔ ba a zue le yereue nɛ dɛ̄dɛɛ̄ edonyɔɔ. Jɛhova aa yerebah nɛ pya ye nɛɛ bu lo tam.
Ebip Tɛ̄ma Nyɔɔ
-
Mɛ sīdee na aa lu ezue le yereue tɛ̄ma ɛŋɛnɛ nyɔuwe a?
-
Mɛ sīdee na tam zue ue tɔgɛ kɔ i wereloo pya nɛɛ le ii le a?
-
O kɛɛrɛge kɔ tam zue ue dap nɛ ziīnɛloo le ɛɛbu nɛɛ ni? E na anua o kɛɛrɛ doo wo a?
GBĪTƐ̄ NU
Ɛp kɛ̄ Pya Ekeebee Jɛhova aa zue ue nɛ pya nɛɛ bu gbɛnɛ gbɛnɛ buɛ̄ doo.
Ena Pya Ekeebee doo lo emmɛ le yereue loo pya a teera kii dɔɔ̄na buɛ̄ a?
Dā sɔ̄ ziī nɛɛ aa kɔ nu a ye ɛɛrɛbu sa doo kɔ a kiisī lo ezue ue mmɛɛ sɔ̄.
Ɛpnage pya ue elua e eeba bie tɔbiaɛ a doo kɔ tam zue ue a agɛrɛbah kiisī.
“Pya Zue Ue Buɛ̄-mɛnɛ Yere Wa Ue Tɔbiaɛ” (God’s Kingdom Rules!, 13 ekobee)
a Bari na a i nɛ ekpo kɔ i zue ue a. Nyɔɔwo, Pya Ekeebee Jɛhova naale esinakɛ̄ gbī ekpo aābah pya bɛbɛɛ lɛɛ ba aa zue le yereue.
