24 NUENƆ

Ena Alu Kaka Ue Akiiloo Pya Ɛnjɛl A?

PLAY

Jɛhova gbī kɔ i nɔ nu akiiloo pya ye butɔ a le li bunyɔɔ. Pya a le bu lo tɔ na pya ɛnjɛl alu ekue “miɔŋɔ Bari.” (Job 38:7) Ena Baibol kɔ kiiloo pya ɛnjɛl a? Ba wee zū pya nɛɛ kɔ ba a doo wa? E dɛ̄dɛɛ̄ aba nuunage butɔ Bari ni?

1. Ba mɛɛ na pya ɛnjɛl a?

Jɛhova bee dɛm pya ɛnjɛl lɛɛ a edɛm kɛnɛkɛ̄. Doodoo Bari, pya ɛnjɛl lu edɔɔ̄ ba tɔɔ̄ bunyɔɔ. (Pya Hibru 1:14) Gbɛnɛ-edo pya ɛnjɛl le, e ziī ziī aba ɛrɛ wa lele elap alu kee loo ziī. (Mumuuna 5:11) Ba ‘doo nu Jɛhova kɔ sa gbaɛ̄tɔ̄loo ye muɛ̄ ue.’ (Le-yɔɔ 103:20) Dee kere a, pio sɔ̄ Jɛhova wee tɛ̄ma ue nu pya ɛnjɛl, doo kɔ ba a yerebah nɛ pya nɛɛ sa wa sunage aŋana pya ye nɛɛ. Niī’ee, pya ɛnjɛl baɛloo Pya Nɛɛ Kraist sa wa ture ma pya a gbī enɔ nu akiiloo Bari.

2. Setan le pya ye gbo-yɔ lu mɛ dua nɛɛ?

Pio pya ɛnjɛl naa bee tɔɔ̄ nɛ Jɛhova. Tua ɛnjɛl a bee lɛɛbeekɛɛ̄ na nɛɛ “a bee lu ekue Pɔrɔ-edɔɔ̄ le Setan, nɛɛ dag dɛ̄dɛɛ̄ nyɔuwe.” (Mumuuna 12:9) Setan bee gbī ebɛɛ dɛ̄dɛɛ̄ nɛɛ, nyɔɔwo a bee dag i tua tɛ le ka, e sɔ̄ sɔ̄ tɛɛ̄ a doonage kɔ pio pya ɛnjɛl a gbaa wa loo bu wa lɛɛbeekɛɛ̄. Pya ɛnjɛl a bee lɛɛbeekɛɛ̄ ama na alu ekue pya gbo-yɔ a. Jɛhova bee taābah dɛ̄dɛɛ̄ aba lɛɛ bunyɔɔ tɛrɛ a kɛnɛkɛ̄, e sɔ̄ esaa egbeesī dɛ̄dɛɛ̄ aba lɛɛ.—Buū Mumuuna 12:9, 12.

3. Mɛ sīdee na Setan le pya ye gbo-yɔ aa piiga lo edag i a?

Setan le pya ye gbo-yɔ aa dag gbɛnɛ-edo nɛɛ tɛ̄maloo doo edɔɔ̄, lo alu ziī sīdee enyɔɔnɛ pya edɔɔ̄ kɔnia ue. Bu edoba, pio nɛɛ bip nu aānu pya a ɛp sīdee kɔā nu esira, pya bo-taā, pya nwī-aa-yɔ, le pya doo ebɛŋ. Pya dɔɔ̄na gbī boa tɛ̄ma sīdee a ɛrɛ nu edoo kiiloo doo edɔɔ̄. Lunage edag pya nɛɛ kɔ ba a yiga kɔ ba dabe kɔ ue nɛ pya e’ua. Mɛ Jɛhova zuura i bahtɔ̄ kɔ: “Bui aa kiiya pii pya nwī-aa-yɔ ale pya dambie.” (Levitikɔs 19:31) A nɛ i zuurabahtɔ̄ ama lo ekpega i lɛɛbah Setan le pya ye gbo-yɔ. Ba lu pya nɛɛ baa Bari, e ba gbīnage egbee i nu loo.

NƆ YERELOO

Nɔ nu akiiloo lele tam pya ɛnjɛl aa si, zaɛ̄ a le bu doo edɔɔ̄, le kɛ̄ i dap kpega i loo lɛɛbah Setan le pya ye gbo-yɔ doo.

4. Pya ɛnjɛl yerebah nɛ pya nɛɛ kɔ ba a nɔ nu akiiloo Jɛhova

Pya ɛnjɛl naa wee zue ue nɛ nɛɛ sī le sī. Taāwo, ba tɔgɛ dee pya nɛɛ Bari ma pya a gbī enɔ nu a ye kiiloo. Buū Mumuuna 14:6, 7, lɛɛ o agara pya ebip ama:

Ena anua i gbī yerebah a aabah pya ɛnjɛl lokwa i dap zue ue a?
Susuā kɔ pya ɛnjɛl dap a ture mmɛ loo pya a gbī edā ue Bari yerege a mɛm loo ni? Ena anua a?

5. Kiī doo edɔɔ̄

Setan le pya ye gbo-yɔ lu pya nɛɛ baa Jɛhova. Ba lunage pya ilii nɛɛ baa. Buū Luk 9:38-42, lɛɛ o agara ebip ama:

Ena pya gbo-yɔ wee doo loo pya nɛɛ a?

Ii gbī kɔ pya gbo-yɔ a kɔ nu i doo i nɛ. Buū Deuteronomi 18:10-12, lɛɛ o agara pya ebip ama:

Bu pya amunu sīdee na pya gbo-yɔ gbī kɔ i doo nu ba kɔ sa i yɔ kɔnia ue a? Amunu yɛɛ pya sīdee doo edɔɔ̄ ama na a boakɛ̄ kɛ̄ olo tɔɔ̄ a?
Suānu lege bu kɔ Jɛhova baaloo doo edɔɔ̄ ni? Ena anua o kɔ doo wo a?

Bira lo VIDIO, lɛɛ o agara pya ebip a nyɔɔnɛ ama.

VIDIO: “Gbanasī Pɔrɔ-edɔɔ̄” (5:02)

O kɛɛrɛge kɔ ziī piya nu le loo lɔh a bee lu eyere mɛɛbah nwiī Palesa ama ni? Ena anua o kɛɛrɛ doo wo a?
Ena alu ebɛɛ̄ kɔ Palesa a doo lokwa alu ekpega ye lɛɛbah pya gbo-yɔ a?

Pya kaka Nɛɛ Kraist aa gbananagesī pya gbo-yɔ dɛ̄dɛɛ̄ sɔ̄. Buū Doonu 19:19 le 1 Pya Kɔrint 10:21, lɛɛ o agara ebip ama:

Ena anua alu kaāna ebɛɛ̄ kɔ o gbeesī ɛrɛgeba nu a ɛrɛ nu edoo kiiloo doo edɔɔ̄ a a le bah a?

6. Be eebah Setan le pya ye gbo-yɔ

Nɛɛ a bɛɛ pya gbo-yɔ na Setan. Mɛ pya lo kaāna ɛnjɛl Bari le kɛɛ̄ wa nɛɛ bee lo a le ɛnjɛl Maikiɛl, alunage dɔɔ̄na bee Jizɔs. Maikiɛl ɛrɛge kaāna ekpo ni? Buū Mumuuna 12:7-9, lɛɛ o agara pya ebip ama:

Mɛɛ na a ɛrɛ ekpo ee ziī a? Maikiɛl le pya ye ɛnjɛl sɛh Setan le pya ye gbo-yɔ ni?
Luge ebɛɛ̄ kɔ Pya Nɛɛ Kraist a ɛrɛ bɔɔ loo Setan le pya ye gbo-yɔ ni?

O dap be eebah Setan le pya ye gbo-yɔ. Buū Jemes 4:7, lɛɛ o agara ebip ama: