25 NUENƆ
Ena Alu Ekɛɛrɛ Bari I Kumaloo A?
Baibol kɔ dum miɔŋɔ nɛɛ ‘kpuria sa taāŋa mma ye loo.’ (Job 14:1) Lege dua dum Bari gbī kɔ i tɔɔ̄ na ama ni? Lo a naale wo, ena alu ye ekɛɛrɛ i kumaloo a? Ye ekɛɛrɛ edooage gbɔ̄mɛɛ̄ ni? Naa ɛp ture Baibol a i nɛ egbɔ̄nyiɛ ama.
1. Mɛ dua dum na Jɛhova gbī kɔ i tɔɔ̄ a?
Jɛhova gbī kɔ i tɔɔ̄dum a lee eera. Sɔ̄ a bee dɛm i tua tɛ le ka lo a le Adam le Iv, a bee wa sere bu ekpedɛɛ̄ gɔh Idɛn. E “Bari bee wa nɛ leelee, e Bari bee wa kɔ nɛ: ‘Manaa sa yii loo, sa mma bu nyɔuwe, sa ye su seea kɛɛ̄ i.’” (Jɛnɛsis 1:28) Jɛhova bee gbī kɔ ba a ɛrɛ pya miɔŋɔ, doo kɔ kɛnɛkɛ̄ alu paradais sa kuūdɛɛ̄loo dɛ̄dɛɛ̄ nam. Nu a bee lu ye ekɛɛrɛ na kɔ dɛ̄dɛɛ̄ nɛɛ a ɛrɛ ekpeloo dum le kaāna nwanaloo sa tɔɔ̄ ina deedee.
Kere a naale doo wo anyaawo, a ekɛɛrɛ Bari sii nyaa. (Aisaia 46:10, 11) Aa gbīge kɔ pya nɛɛ a ye gbaɛ̄tɔ̄loo a ɛrɛ ekpeloo dum a kɛnɛkɛ̄ mmɛ deedee.—Buū Mumuuna 21:3, 4.
2. I dap tɔɔ̄dum bu sīdee edɔbiī i nɛ anyaawo doodoo wa?
Jɛhova bee i dɛm sa doo kɔ i ɛrɛ ‘ebɛɛ̄ loo nu bu edɔɔ̄,’ lo a le taɛ lo esuā ye loo sa ye taāŋabah. (Buū Matiu 5:3-6.) A gbī kɔ i ɛrɛ le gbanialoo ye kumaloo, “lo ekiā bu dɛ̄dɛɛ̄ ye dee, lo ewere ye loo,” le lo esitam ye nɛ “tɛ̄maloo dɛ̄dɛɛ̄ [i] beenyiɛ.” (Deuteronomi 10:12; Le-yɔɔ 25:14) Sɔ̄ i doo wo, i ɛrɛ kaāna ɛɛbu kere i le bu taāŋa. Taāŋabah Jɛhova doo kɔ i dum a ɛrɛ nu a kura nyɔnɛbee i gaa doo nu a gbī.
NƆ YERELOO
Nɔ nu akiiloo gbɛnɛ wereloo Jɛhova tɔgɛ sɔ̄ aa bee i kwa kɛnɛkɛ̄ nɛ le nu Baibol i tɔgɛ akiiloo ekɛɛrɛ a le dumɛ dum.
3. Jɛhova ɛrɛ le ekɛɛrɛ kumaloo pya nɛɛ
Bira lo VIDIO, lɛɛ o agara ebip a nyɔɔnɛ ama.
-
Ena anua Bari bee dɛm ekpedɛɛ̄ kɛnɛkɛ̄ i le nyɔɔ ama a?
Buū Eklisiastis 3:11, lɛɛ o agara ebip ama:
-
Ena lo ama a tɔgɛ akiiloo Jɛhova a?
4. Ekɛɛrɛ Jɛhova sii nyaa
Buū Le-yɔɔ 37:11, 29 le Aisaia 55:11, lɛɛ o agara ebip ama:
-
I tɛɛ̄ doodoo wa suā kɔ ekɛɛrɛ Jɛhova i ɛrɛ kumaloo sii nyaa?
Dap lu esikɛ̄ kwa tɔ egbea kaāna. Bu aba lo sīdee, Bari esikɛ̄ kwa kɛnɛkɛ̄ pya nɛɛ e’ɛba tɛrɛ ama nɛ pya a ye wereloo
5. Taāŋabah Jɛhova doo kɔ i ɛrɛ dum a lee eera
Susuā ekɛɛrɛ a le dumɛ dum dap doo kɔ i ɛrɛ ɛɛbu. Bira lo VIDIO, lɛɛ o agara ebip a nyɔɔnɛ ama.
-
Bu mɛ sīdee na Terumi bee ɛrɛ biī aāloo nɔnɔ ekɛɛrɛ a le dumɛ dum a?
Buū Eklisiastis 12:13, lɛɛ o agara ebip ama:
-
Nyɔɔbee Jɛhova edora gbɛnɛ-edo le nu i nɛ a, e na i doo lo etɔgɛ nia loo pya nu ama a?
ZIĪ NƐƐ DAP BIP KƆ: “Ena alu ekɛɛrɛ a le dumɛ dum a?”
-
O agara doodoo wa?
TƐƐ̄NYƆƆ
Jɛhova gbī kɔ i ɛrɛ ekpeloo bu kaāna nwanaloo a kɛnɛkɛ̄. Sɔ̄ i taāŋabah Jɛhova aābu i beenyiɛ, i dum ɛrɛ kaāna nu a kura, kere nyaawo.
Ebip Tɛ̄ma Nyɔɔ
-
Taɛ ena a bee lu ekɛɛrɛ Jɛhova kumaloo Adam le Iv a?
-
I tɛɛ̄ doodoo wa suā kɔ ekɛɛrɛ Bari kumaloo pya nɛɛ sii nyaa?
-
Ena edap doo kɔ o dum alu lo a dɔbiī a?
GBĪTƐ̄ NU
Nɔ pya nu a tɔgɛ kɔ gɔh Idɛn bee le.
“Gɔh Idɛn Luge Kaāna Gɔh A Bee Le Sɛh Alu Loo?” (The Watchtower, January 1, 2011)
Suā nu anua i yiga kɔ kɛnɛkɛ̄ ama ele mmɛ deedee.
Kɛɛrɛ nu Baibol kɔ akiiloo tɔɔ̄dum a ɛrɛ nu a kura.
“Ena Alu Ekɛɛrɛ A Le Dumɛ Dum A?” (Ekobee ue a le nyɔɔ intanɛt)
Ɛp kɛ̄ ziī gbara a bee kɛɛrɛ kɔ a ɛrɛe dɛ̄dɛɛ̄ nu bu dum bee muɛ kɔ a ɛrɛ nu aa peeree bu ye dum doo.
a Bu elua ekobee ue li, o nɔ nu anua dum naa lena doo wo anii’ee.
