26 NUENƆ

Ena Anua Pɔrɔ Siranu Le Tɔga Le Ani?

PLAY

“E na anua a?” lu ebip pya nɛɛ wee bip sɔ̄ pɔrɔ nu sira. Naa ɛp kɛ̄ a i ɛɛrɛbu kɔ Baibol agara ebip ama doo a!

1. Bu mɛ sīdee na Setan bee yere pɔrɔ bu nyɔuwe a?

Setan bee lɛɛbeekɛɛ̄ Bari. A bee gbī ebɛɛ pya dɔɔ̄na, nyɔɔwo a bee zū Adam le Iv alu pya nɛɛ a bee dasī le a kɛnɛkɛ̄ kɔ ba a nyɔɔnɛe ye lɛɛbeekɛɛ̄ Bari. Setan doo lo ama tɛ̄maloo ekɔ esah nɛ Iv. (Jɛnɛsis 3:1-5) A bee doo kɔ Iv a kɛɛrɛ kɔ a ɛrɛ lenu Jɛhova naa gbī kɔ a ɛrɛ. Nu aa bee kɔ na bee pya nɛɛ e’ɛrɛ ɛɛbu lo ba naa gbaɛ̄tɔ̄loo Bari. Setan bee kɔ tua esah nɛ Iv sɔ̄ a ye kɔ nɛ kɔ a naale e’u. Nyɔɔwo, Baibol su Setan kure “nɛɛ esah, le tɛ dɛ̄dɛɛ̄ esah.”—Jɔn 8:44.

2. Ena Adam le Iv bee biaɛfii lo edoo a?

Jɛhova bee dɔɔ̄ nu bu yaaribah nɛ Adam le Iv. A bee kɔ ba dap de bee a aaloo ɛrɛgeba te a le bu gɔh Idɛn, mɛ aba ziī aba na ba aa de a. (Jɛnɛsis 2:15-17) Mɛ ba bee biaɛfii lo ede bee a aaloo lo te. Iv “bee su ye bee sa de.” Sɔ̄ esaa, Adam “bee denage.” (Jɛnɛsis 3:6) Baɛ aba bee lɛɛbeekɛɛ̄ Bari. Nyɔɔbee Adam le Iv bee mmana a, ba ebee dap doo nu a lee. Mɛ kuma sɔ̄ ba ɛmɛnɛbee lɛɛbeekɛɛ̄ Bari a, ba si pɔrɔ sa kiī ekpo Bari ɛrɛ lo ebɛɛ wa. Biaɛfii ama bee wa su gbɛnɛ tɔga nua nyɔɔ.—Jɛnɛsis 3:16-19.

3. Biaɛfii Adam le Iv ɛrɛ i pah nyɔɔ doodoo wa?

Sɔ̄ Adam le Iv esia pɔrɔ sah, ba sikɛ̄ lu pya a naa mmana, nyɔɔwo ba bee tɛ̄ma wa kɛ̄tɔɔ̄ a naa mmana mmɛ loo dɛ̄dɛɛ̄ nɛɛ. Kiiloo Adam, Baibol kɔ: “Pɔrɔ bee tɛ̄maloo ziī nɛɛ yii bu nyɔuwe . . . e luh tɛ̄maloo pɔrɔ, e luh tɛ̄maloo wo inaloo dɛ̄dɛɛ̄ nɛɛ.”—Pya Rom 5:12.

I tɔga nyɔɔbee gbɛnɛ-edo nu. I tɔga pio sɔ̄ nyɔɔbee i pɔrɔ biaɛfii. Siga sɔ̄ i tɔga nyɔɔbee pɔrɔ biaɛfii pya dɔɔ̄na. Pio sɔ̄ i tɔganage nyɔɔbee i le pɔrɔ kɛ̄ pɔrɔ sɔ̄.—Buū Eklisiastis 9:11.

NƆ YERELOO

Muɛ nu anua ii yiga kɔ pɔrɔ siranu le tɔga a le bu nyɔuwe anii’ee aabah Bari, le kɛ̄ a ye tɔɔ̄loo doo sɔ̄ i tɔga.

4. Nɛɛ a doo kɔ i tɔga

Gbɛnɛ-edo nɛɛ yiga kɔ Bari na aa baɛbee nyɔuwe a. Lege wo? Bira lo VIDIO.

VIDIO: Mɛɛ̄ Na A Gaa Baɛbee Nyɔuwe A? (1:24)

Buū Jemes 1:13 le 1 Jɔn 5:19, lɛɛ o agara ebip ama:

Pɔrɔ siranu le tɔga aage bah Bari ni?

5. Naa kɛɛrɛ pya nu esira aā sɔ̄ Setan bee bɔātɛ̄ ebɛɛ̄

Bira lo VIDIO.

VIDIO: E Na Anua Bari Lɛɛbaloo Tɔga Ani?—Sigaloo (3:07)

Buū Jɛnɛsis 3:1-6, lɛɛ o agara pya ebip ama:

Amunu esah na Setan bee kɔ a?—Ɛp 4 le 5 barakpaɛ̄.
Bu mɛ sīdee na Setan kɔ Jɛhova aa kpeg lenu lɛɛloo pya nɛɛ a?
Mɛ sīdee na Setan tɔgɛ kɔ miɔŋɔ nɛɛ dap ɛrɛ ɛɛbu kere Jɛhova naa bɛɛ wa a?

Buū Eklisiastis 8:9, lɛɛ o agara ebip ama:

Ena esira aā dee Jɛhova naa bɛɛ nyɔuwe a?

Adam le Iv bee mmana sa bee tɔɔ̄ bu Paradais. Mɛ ba bee gbaɛ̄tɔ̄loo Setan sa lɛɛbeekɛɛ̄ Jɛhova
Tɔga gbaāloo pɔrɔ le luh mma bu nyɔuwe nyɔɔ wa lɛɛbeekɛɛ̄
Jɛhova elɛɛ pɔrɔ, tɔga, le luh. Pya nɛɛ esikɛ̄ mmana sa tɔɔ̄ bu Paradais

6. I tɔga kiɛ̄ Jɛhova

I tɔga tɔɔ̄loo Bari doodoo wa? Naa kɛɛrɛbu nu Mɛnɛ Devid le nɛɛ lɛɛratam Pita bee ɛm. Buū Le-yɔɔ 31:7 le 1 Pita 5:7, lɛɛ o agara ebip ama:

A tɔɔ̄ a loo doodoo wa sɔ̄ o suā kɔ Jɛhova muɛ sɔ̄ o gaa tɔga sa a kiɛ̄ ye ni?

7. Bari e mmɛ kuma loo dɛ̄dɛɛ̄ tɔga miɔŋɔ nɛɛ

Buū Aisaia 65:17 le Mumuuna 21:3, 4, lɛɛ o agara ebip ama:

Ena anua alu nu a nɛ egbɔ̄nyiɛ lo esuā kɔ Jɛhova gaa le lɛɛ dɛ̄dɛɛ̄ pɔrɔ pɔrɔ nu aa sira loo pya nɛɛ a?

O suāge ni?

Setan gbee bee Jɛhova sɔ̄ a bee kɔ lo tuatua esah. Lo a kura kɔ a doo kɔ pya nɛɛ a kɛɛrɛ kɔ Jɛhova naa bɔloo sa naa wereloo pya nɛɛ bu ye bɛbɛɛ. Sɔ̄ Jɛhova elɛɛ tɔga miɔŋɔ nɛɛ li deesī, a gaa le doo kɔ ye bee a le kaɛ. Lo a kura kɔ, e doo kɔ alu esuā kɔ ye bɛbɛɛ lu lo a lee eera. Nu a kuī loo Jɛhova ee dɛ̄dɛɛ̄ nu a le bu nyɔuwe na sesere ye bee kaɛ.—Matiu 6:9, 10.

PIO NƐƐ KƆ: “Bari bee nɔɔ kɔ miɔŋɔ nɛɛ a tɔga.”