Ziī nɛɛ o wereloo kaāna e’ua ni? Sɔ̄ o le bu dua ezialoo kɛ̄tɔɔ̄ ama, o dap kɛɛrɛ kɔ: ‘Ena a i siraloo sɔ̄ i u ani? Bɛābu lege kɔ i sikɛ̄ muɛ pya i wereloo ba e’ua ni?’ Bu ekobee ue ama le elua li, kɛɛrɛbu pya ture Baibol a i nɛ egbɔ̄nyiɛ.

1. Ena a i siraloo sɔ̄ i u ani?

Jizɔs su luh dooreloo kaāna daa. Nɛɛ a le kaāna daa naa wee suā nu aa sira kɛ̄ a le. Bu mɛ sīdee na luh bee daa a? Nu naa zina loo nɛɛ e’ua. Naa suā na kɔ a lee aba ɛɛ, kaɛlɛɛ kɛ̄ a wee ye nia ele kpaɛ̄ pya ye butɔ doo. Baibol kɔ: “Pya a e’ua naa suā lɔgɔ nu.”—Buū Eklisiastis 9:5.

2. Susuā kaka akiiloo luh dɔbiī i nɛ doodoo wa?

Gbɛnɛ-do nɛɛ ɛrɛ bɔɔ loo luh sa ɛrɛnage bɔɔ loo pya e’ua! Mɛ nu Baibol kɔ kumaloo luh dap a gbɔ̄nyiɛ. Jizɔs kɔ: “Kaka ue edoo kɔ bui aa bu zooro.” (Jɔn 8:32) Pio sīdee yigabari tɔgɛ kɔ a ɛrɛ nu a le bu nɛɛ a kiisī lo etɔɔ̄dum sɔ̄ nɛɛ e’ua sah, mɛ a naale nu Baibol tɔgɛ lo. Nyɔɔwo, lɔgɔ nɛɛ e’ua naa tɔga na. Gbaāloo wo, kuma sɔ̄ pya e’ua naa suā lɔgɔ nu a, ba naa dap i doo lɔgɔ piya nu loo. Nu anua a naa bɔloo kɔ i ɛrɛ bɔɔ loo pya e’ua, tɛrɛ ziā sa egara mii kɛ̄ ale kɔ kara wa nɛ lo.

Pio nɛɛ kɔ ba dabe nyɔɔnɛe pya e’ua kɔnia ue. Mɛ a naa waɛ doo wo. Dookɛ̄ i enɔā doo, pya e’ua “naa suā lɔgɔ nu.” Pya nɛɛ a kɛɛrɛ kɔ ba aa nyɔɔnɛe pya wa nɛɛ ba e’ua kɔnia ue, aa nyɔɔnɛ pya gbo-yɔ ba sere loo bee pya e’ua kɔnia ue. Nyɔɔwo, susuā kaka ue akiiloo luh kpega i lɛɛ loo pya gbo-yɔ. Jɛhova zuura i bahtɔ̄ kɔ i aa nyɔɔnɛ pya gbo-yɔ kɔnia ue nyɔɔbee a suā kɔ nyɔnyɔɔnɛ wa kɔnia ue egbee i nu loo.—Buū Deuteronomi 18:10-12.

3. Nɔ kaka akiiloo kɛ̄tɔɔ̄ pya e’ua

Tɛɛ̄ ɛŋɛnɛ nyɔuwe, pya nɛɛ ɛrɛ keekee nu ba yiga akiiloo nu a i siraloo sɔ̄ i u. Kaka na kɔ, naale yube nu ba yiga ama na alu kaka a.

• Ena gbɛnɛ-edo nɛɛ yiga kiiloo kɛ̄tɔɔ̄ pya e’ua bie o barasī a?

 4. Kaka ue akiiloo luh dɔbiī i nɛ

Susuā kaka akiiloo luh doo kɔ bɔɔ aa i aa loo pya e’ua. Buū Eklisiastis 9:10, lɛɛ o agara ebip ama:

• Pya e’ua dapge i doo ziī piya nu loo ni?

Kaka ue Baibol kpega i lɛɛ loo keekee yiga pya nɛɛ ɛrɛ, kɔ a bɔloo etaāŋabah ale bara nu pya e’ua. Buū Aisaia 8:19 le Mumuuna 4:11, lɛɛ o agara ebip ama:

• O kɛɛrɛ kɔ a tɔɔ̄loo Jɛhova doodoo wa sɔ̄ ziī nɛɛ taāŋabah ale a gbī yerebah aābah nɛɛ a e’ua ni?

5. Kaka akiiloo luh gbɔ̄ i nyiɛ

Elua etɔgɛ gbɛnɛ-edo nɛɛ kɔ elu etɔg wa sɔ̄ ba e’u nyɔɔ pɔrɔ nu ba bee doo. Mɛ a gbɔ̄ i nyiɛ lo esuā kɔ lɔgɔ nɛɛ naa tɔga sɔ̄ e’ua sah, kere nɛɛ a bee doo gbɛnɛ pɔrɔ nu. Buū Pya Rom 6:7, lɛɛ o agara ebip ama:

• Baibol kɔ nɛɛ a u e’agia aabah pɔrɔ. Nyɔɔwo, olo kɛɛrɛge kɔ a ɛrɛ ziī nɛɛ a bee u aa tɔga nyɔɔbee pɔrɔ nu a bee doo ni?

Kuma kɛ̄ i kiisī lo esuāloo Jɛhova doo, kɛ̄ i suānage kɔ a naa lɛɛbaloo pya e’ua kɔ ba a tɔga doolo. Buū Deuteronomi 32:4 le 1 Jɔn 4:8, lɛɛ o agara pya ebip ama:

• Bari a ɛrɛ lele elap alu ekue bee bu pya dɔ ama etɔg ge pya e’ua ni?

• Kaka ue akiiloo luh gbɔ̄ge a nyiɛ ni, ena anua a?

 TƐƐ̄NYƆƆ

Dum nɛɛ ina kuma sɔ̄ a u. Pya e’ua naa tɔga na, e ba naa dapnage doo lɔgɔ nu loo pya a le dum.

Ebip Tɛ̄ma Nyɔɔ

• Ena a i siraloo sɔ̄ i u a?

• Kaka ue i suā akiiloo luh dɔbiī i nɛ doodoo wa?

• Bu mɛ sīdee na kaka ue akiiloo luh i gbɔ̄nyiɛ a?