Luh wee nua ekiɛ̄nu le biirabu. Nu anua Baibol su luh kure nɛɛ baa lo. (1 Pya Kɔrint 15:26) Bu 27 Nuenɔ, o bee nɔ kɔ Jɛhova ebe eebah lo nɛɛ baa. Mɛ ena esira loo pya ebee u a? Bu ekobee ue ama, o nɔ dɔɔ̄na yii Jɛhova alu nyɛŋia, lo a le obara booboo pya ebee u sere dum kɔ ba a tɔɔ̄dum mmɛ deedee. Bari elɛɛ wa kɛ̄ bu luh! Lo ama edapge sira ni? Elu elɛɛ wa kɛ̄ bu luh kɔ ba a tɔɔ̄ bunyɔɔ sɛh nyɔɔ kɛnɛkɛ̄ ama?

1. Ena Jɛhova gbī edoo loo pya ebee u a?

A taɛ Jɛhova elɛɛ pya ebee u kɛ̄ bu luh. Gbara a kura Job a bee ɛrɛ yira bee dɛrɛ nyiɛ nyɔɔ kɔ Bari naale e’iberee ye lo a u e. A bee kɔ nɛ Bari kɔ: “Olo ekue, e mda eture a nɛ [aābu bana luh].”—Buū Job 14:13-15.

2. I tɛɛ̄ doodoo wa suā kɔ elu elɛɛ pya e’ua kɛ̄ bu luh ni?

Sɔ̄ Jizɔs bee le a kɛnɛkɛ̄, Bari bee ye nɛ ekpo elɛma pya nɛɛ kɛ̄ bu luh. Jizɔs bee lɛɛ saaro ziī waa ua dam le nwiīnɛɛwa a bee le 12 zua kɛ̄ bu luh. (Maak 5:41, 42; Luk 7:12-15) Sɔ̄ esaa, gbo Jizɔs a kura Lazarɔs bee u. Kere ebee lu nia biradee Lazarɔs bee u sa alu eli ye, Jizɔs bee ye lɛɛ kɛ̄ bu luh. Sɔ̄ Jizɔs eyere kara nɛ Bari sah, a bee to bie kpaɛ̄ kpoli a, lɛɛ a kɔ: “Lazarɔs, aabu sira ee!” E “nɛɛ a e’ua aabu sira”—le dum! (Jɔn 11:43, 44) Naa ɛp kɛ̄ bu pya gbo Lazarɔs le pya ye butɔ bee ɛɛ doo a!

3. Amunu bɛābu na a le nɛ pya o nɛɛ ebee u a?

Baibol kɔ: “Aakɛ̄ bu luh . . . ele.” (Doonu 24:15) Pya nɛɛ Jizɔs bee lɛɛ kɛ̄ bu luh sɔ̄ akii adumɛ sii kii bunyɔɔ. (Jɔn 3:13) Bu wa bee ɛɛ sɔ̄ a bee wa lɛɛ kɛ̄ bu luh sere a kɛnɛkɛ̄. Bu aba lo sīdee, sɔ̄ sɔ̄ naa binia, Jizɔs elɛɛ booboo pya nɛɛ kɛ̄ bu luh lokwa ba tɔɔ̄ bu paradais a kɛnɛkɛ̄ mmɛ deedee. A bee kɔ “dɛ̄dɛɛ̄ pya a le bu li” kere pya nɛɛ a bee kɔ elua e’ibere mɛ ba le bu nyɛŋiabu Jɛhova elu elɛɛ kɛ̄ bu luh.—Jɔn 5:28, 29.

 NƆ YERELOO

4. Jizɔs bee tɔgɛ kɔ a dabe lɛɛ pya e’ua kɛ̄ bu luh

Nɔ nu Jizɔs bee doo nɛ ye gbo Lazarɔs. Buū Jɔn 11:14, 38-44, lɛɛ o agara pya ebip ama:

• I tɛɛ̄ doodoo wa suā kɔ Lazarɔs bee u kaāna ni?—Ɛp 39 barakpaɛ̄.

• Lo Lazarɔs bee kii bunyɔɔ sɔ̄ a u sah, o kɛɛrɛge kɔ Jizɔs ebee ye lɛɛ kɛ̄ bu luh sa obara nua a kɛnɛkɛ̄ ni?

Bira lo VIDIO.

5. Elu elɛɛ gbɛnɛ-edo nɛɛ kɛ̄ bu luh!

Buū Le-yɔɔ 37:29, lɛɛ o agara ebip ama:

• Mɛ kɛ̄ na gbɛnɛ-edo pya e’aa kɛ̄ bu luh etɔɔ̄ a?

Jizɔs elɛɛnage gbɛnɛ-edo pya a naa bee taāŋabah Jɛhova kɛ̄ bu luh. Buū Doonu pya Nɛɛ lɛɛratam 24:15, lɛɛ o agara ebip ama:

• Mɛɛ na enia a emuɛ sɔ̄ e’aa kɛ̄ bu luh a?

• Bu mɛ sīdee na bɛābu aakɛ̄ bu luh nɛ egbɔ̄nyiɛ sa yere mɛm loo ka le tɛ Phelicity a?

 TƐƐ̄NYƆƆ

Baibol kɔ elu elɛɛ pya ebee u kɛ̄ bu luh. Jɛhova gbī kɔ ba a sikɛ̄ tɔɔ̄dum, e enɛa ekpo Jizɔs kɔ a lɛɛ wa kɛ̄ bu luh.

Ebip Tɛ̄ma Nyɔɔ

• A tɔɔ̄loo Jɛhova le Jizɔs doodoo wa lo elɛɛ pya ebee u kɛ̄ bu luh ni?

• Mɛ kɛ̄ na pya elu elɛɛ kɛ̄ bu luh etɔɔ̄ a, ba etɔɔ̄ bunyɔɔ sɛh kɛnɛkɛ̄ ni? Ena anua o kɛɛrɛ doo wo a?

• Ena a doo kɔ o yiga kɔ pya o nɛɛ ebee u esikɛ̄ tɔɔ̄dum a?