31 NUENƆ

Ena A Kura Buɛ̄-mɛnɛ Bari A?

PLAY

Yereue a kuī eera a le bu Baibol kiiloo Buɛ̄-mɛnɛ Bari. Jɛhova esu lo Buɛ̄-mɛnɛ daā gbɔ̄mɛɛ ekɛɛrɛ a bee ɛrɛ kumaloo kɛnɛkɛ̄ aā bɔātɛ̄. Ena alu lo Buɛ̄-mɛnɛ a? I doodoo wa suā kɔ e’ina aa bɛɛ anyaawo? Ena edoora gbɔ̄mɛɛ a? E ena a gaa le doo li deesī a? Nuenɔ ama le baɛ lo a nyɔɔnɛ e’agara pya ebip ama.

1. Ena a kura Buɛ̄-mɛnɛ Bari a, e mɛɛ na alu ye Mɛnɛ a?

Lo Buɛ̄-mɛnɛ na ziī bɛbɛɛ lo alu ewu tɛ̄mabah Jɛhova Bari. Jizɔs Kraist alu Mɛnɛ lo Buɛ̄-mɛnɛ ebɛɛ aā li bunyɔɔ. (Matiu 4:17; Jɔn 18:36) Baibol kɔ ue kumaloo Jizɔs kɔ: “A ebɛɛ . . . mmɛ dee a naatah.” (Luk 1:32, 33) Doodoo Mɛnɛ loo Buɛ̄-mɛnɛ Bari, Jizɔs ebɛɛ bee dɛ̄dɛɛ̄ nɛɛ a nyɔɔ kɛnɛkɛ̄.

2. Ba mɛɛ na enyɔɔnɛ Jizɔs bɛɛ a?

Naale aba Jizɔs na ebɛɛ a. Pya nɛɛ ba aa “dɛ̄dɛɛ̄ eku le edɛm, le dɛ̄dɛɛ̄ pya nɛɛ, le edo nyɔuwe . . . ebɛɛ bu nyɔuwe.” (Mumuuna 5:9, 10) Ku nɛɛ na enyɔɔnɛ Kraist bɛɛ a? Aā sɔ̄ Jizɔs bee lu a kɛnɛkɛ̄, gbɛnɛ-edo miliɔn Pya Nɛɛ Kraist elua pya a ye nyɔɔnɛ dumɛ. Mɛ aba 144,000 na ba ekii bunyɔɔ sa ye nyɔɔnɛ bɛɛ a. (Buū Mumuuna 14:1-4.) Dɛ̄dɛɛ̄ dɔɔ̄na Pya Nɛɛ Kraist lo ba ele a kɛnɛkɛ̄ ele kɛɛ̄ lo Buɛ̄-mɛnɛ.—Le-yɔɔ 37:29.

3. Ena anua Buɛ̄-mɛnɛ Bari lee ee bɛbɛɛ miɔŋɔ nɛɛ a?

Kere sɔ̄ pya aa bɛɛ gbī edoo nu a lee, ba naa ɛrɛ ekpo esu daā pya nu ba gbī edoo. E pio sɔ̄ pya lo a sikɛ̄ su wa dɔ naa ɛrɛ taɛ lo eyerebah nɛ pya dɔɔ̄na. Mɛ kiiloo Jizɔs alu nɛɛ a ebɛɛ bu Buɛ̄-mɛnɛ Bari, lɔgɔ nɛɛ naale esudɔ ye lɛɛbah. Baibol kɔ Bari ewua “ziī buɛ̄-mɛnɛ sere lo a naale dap lu egbee.” (Daniel 2:44) Jizɔs gaa le bɛɛ bee kɛnɛkɛ̄ ama, sa e’aara dɛ̄dɛɛ̄ nɛɛ bu sīdee alu kunakuna. A ɛrɛ wereloo, lu fɛgɛ, sa kaāna, a gaa le tɔgɛ pya dɔɔ̄na kɔ ba a aaranage ɛnia aba bu aba lo sīdee.—Buū Aisaia 11:9.

NƆ YERELOO

Suā nu anua Buɛ̄-mɛnɛ Bari lee ee ɛrɛgeba bɛbɛɛ miɔŋɔ nɛɛ.

4. Ziī bɛbɛɛ a ɛrɛ ekpo ebɛɛ bee dɛ̄dɛɛ̄ nyɔuwe

Jizɔs Kraist ɛrɛ ekpo ebɛma ee ɛrɛgeba nɛɛ a e bee bɛɛ. Buū Matiu 28:18, lɛɛ o agara ebip ama:

Bu mɛ sīdee na ekpo Jizɔs ɛrɛ lo ebɛɛ eenyɔɔ lo ɛrɛgeba miɔŋɔ nɛɛ a?

Bɛbɛɛ miɔŋɔ nɛɛ wee nyaa aā ziī sɔ̄ yii ziī, e ziī ziī aba wee bɛɛ bu aba ziī barasī nyɔuwe. E kiiloo Buɛ̄-mɛnɛ Bari ni a? Buū Daniel 7:14, lɛɛ o agara pya ebip ama:

Ena anua a lee kɔ a “naale lu egbee” sī Buɛ̄-mɛnɛ Bari a?
Ena anua a lee kɔ ebɛɛ bee dɛ̄dɛɛ̄ nyɔuwe a?

5. Ɛrɛ elu esu dɔɔ̄na bɛbɛɛ nyaana loo bɛbɛɛ miɔŋɔ nɛɛ

Ena anua elu esu Buɛ̄-mɛnɛ Bari nyaana loo bɛbɛɛ miɔŋɔ nɛɛ a? Bira lo VIDIO, lɛɛ o agara ebip a nyɔɔnɛ ama.

VIDIO: Ena Akura Buɛ̄-mɛnɛ Bari Ani?—Sigaloo (1:41)

Ena esira aabu bɛbɛɛ miɔŋɔ nɛɛ a?

Buū Eklisiastis 8:9, lɛɛ o agara pya ebip ama:

O gbīge kɔ Buɛ̄-mɛnɛ Bari a sudɔ bɛbɛɛ miɔŋɔ nɛɛ ni? Ena anua a?

6. Buɛ̄-mɛnɛ Bari ɛrɛ pya nɛɛ a ebɛɛ lo ba i dābeeloo

Nyɔɔbee Jizɔs alu i Mɛnɛ ebee tɔɔ̄dum a kɛnɛkɛ̄ doodoo nɛɛ a, a dap i “nyɔɔnɛ muɛ pɔrɔ loo i e’ɔaloo.” (Pya Hibru 4:15) Jɛhova esagɛ 144,000 pya nɛɛdam le nɛɛwa ba yira agɛrɛ “aā dɛ̄dɛɛ̄ eku, le edɛm, le dɛ̄dɛɛ̄ pya nɛɛ, le edo” nua pya enyɔɔnɛ Kraist bɛɛ.—Mumuuna 5:9.

Nɛge a egbɔ̄nyiɛ lo esuā kɔ Jizɔs le pya enyɔɔnɛ ye bɛɛ dābeeloo kɛ̄tɔɔ̄ miɔŋɔ nɛɛ ni? Ena anua a?

Jɛhova esagɛ pya nɛɛdam le nɛɛwa aā keekee barasī nyɔuwe nua pya enyɔɔnɛ Jizɔs bɛɛ

7. Lok a le kɛɛ̄ Buɛ̄-mɛnɛ Bari lee eera

Pya aa bɛɛ wee nɛ lok lo ebee lu kpega sa dɔbiī nɛ pya a wa le kɛɛ̄. Buɛ̄-mɛnɛ Bari ɛrɛnage lok lo pya a ye le kɛɛ̄ ɛrɛ egbaɛ̄tɔ̄loo. Buū 1 Pya Kɔrint 6:9-11, lɛɛ o agara pya ebip ama:

O kɛɛrɛ kɔ nyɔuwe emɛā doodoo wa sɔ̄ dɛ̄dɛɛ̄ nɛɛ egbaɛ̄tɔ̄loo lok Bari? a
O kɛɛrɛge kɔ Jɛhova ɛrɛ ekpo lo ekɔ nɛ pya ele bu ye Buɛ̄-mɛnɛ kɔ ba a gbaɛ̄tɔ̄loo pya lok i buū bu dɔ ama ni? Ena anua a?
Ena a tɔgɛ kɔ pya nɛɛ ba naa gaa gbaɛ̄tɔ̄loo lok ama dap nyaa a?—Ɛp 11 barakpaɛ̄.