Buɛ̄-mɛnɛ Bari ebɛɛra. Bia nwīgbagbara sɔ̄, enyaana baloo gbɛnɛ-edo nu a nyɔɔ kɛnɛkɛ̄. Doo i naa kɔ nu akiiloo pio nu o dap ɛmadɛɛ̄ bu Buɛ̄-mɛnɛ Bari.

1. Bu mɛ sīdee na Buɛ̄-mɛnɛ Bari esu efɛɛloo le kaāna biaɛ nua kɛnɛkɛ̄ a?

Jizɔs, alu Mɛnɛ loo Buɛ̄-mɛnɛ Bari egbeesī pya bag dogo le bɛbɛɛ miɔŋɔ nɛɛ bu nɔ̄ Amagidɔn. (Mumuuna 16:14, 16) Lo sɔ̄ na yii a le bu dɔ Baibol ama edooa gbɔ̄mɛɛ a, lo a kɔ: “bia kunɛ nwī-gbagbara sɔ̄ nɛɛ bag dogo naale lena.” (Le-yɔɔ 37:10) Jizɔs edoo kɔ efɛɛloo le kaāna biaɛ a le nyɔɔ kɛnɛkɛ̄ tɛ̄maloo lo Buɛ̄-mɛnɛ.—Buū Aisaia 11:4.

2. Dum emɛā doodoo wa sɔ̄ ekɛɛrɛ Bari edooa a nyɔɔ kɛnɛkɛ̄?

Kɛɛ̄ bɛbɛɛ Buɛ̄-mɛnɛ Bari, “pya kaāna dogo e’ɛrɛ kɛnɛkɛ̄, sa tɔɔ̄ bu ina deedee.” (Le-yɔɔ 37:29) Naa kɛɛrɛ kɛ̄ dum ekpeloo doo sɔ̄ dɛ̄dɛɛ̄ nɛɛ elu pya a kaāna sa wereloo Jɛhova le ɛnia aba! Loo lɔgɔ nɛɛ naale edumɛ sa dɛ̄dɛɛ̄ nɛɛ etɔɔ̄dum ina deedee.

3. Ena Buɛ̄-mɛnɛ Bari edoo sɔ̄ elua egbeesī pya bag dogo a?

Sɔ̄ elua egbeesī pya bag dogo sah, Jizɔs ebɛɛ doodoo Mɛnɛ loo 1,000 zua. Bu lo sɔ̄, 144,000 pya ba enyɔɔnɛ ye bɛɛ eyerebah nɛ dɛ̄dɛɛ̄ nɛɛ kɔ ba alu pya a mmana. Sɔ̄ wa bɛbɛɛ e’ina kuma, nyɔuwe ama elu paradais, sa dɛ̄dɛɛ̄ nɛɛ ele bu ɛɛbu nyɔɔbee ba gbaɛ̄tɔ̄loo lok Jɛhova. Lɛɛ Jizɔs su bɛbɛɛ nɛ ye Tɛ, Jɛhova. Lo sɔ̄ na “bee [Jɛhova ele] kaɛ” ee ɛrɛgeba dɔɔ̄na sɔ̄ a. (Matiu 6:9, 10) Bu sɔ̄ ama, elua etɔgɛ kɔ Jɛhova na kaāna nɛɛ a bɛɛ lo a kuūdɛɛ̄loo pya a ye le kɛɛ̄ a. Jɛhova egbeesī Setan le pya ye gbo-yɔ, le dɛ̄dɛɛ̄ pya a ye gbaaloo lɛɛbeekɛɛ̄ bɛbɛɛ Jɛhova. (Mumuuna 20:7-10) Kɛ̄tɔɔ̄ a mmana lo Buɛ̄-mɛnɛ Bari esu nua loo miɔŋɔ nɛɛ etɔɔ̄ mmɛ deedee.

 NƆ YERELOO

4. Buɛ̄-mɛnɛ Bari esu kuma mmɛ loo bɛbɛɛ miɔŋɔ nɛɛ

“Nɛɛ ɛrɛ ekpo loo nɛɛ yɛrɛ le loo edoo ye.” (Eklisiastis 8:9) Jɛhova esu ye Buɛ̄-mɛnɛ lɛma pɔrɔ miɔŋɔ nɛɛ edoora ama.

Buū Daniel 2:44 le 2 Pya Tɛsalɔnaika 1:6-8, lɛɛ o agara pya ebip ama:

• Ena Jɛhova le ye Nwiī Jizɔs edoo loo bɛbɛɛ miɔŋɔ nɛɛ le dɛ̄dɛɛ̄ pya a wa yerekpotɛ̄ a?

• Bu mɛ sīdee na nu o enɔā akiiloo Jɛhova le Jizɔs doo kɔ o dɛrɛ nyiɛ nyɔɔ kɔ ba edoo dogo bu kaāna sīdee a?

5. Jizɔs na Mɛnɛ a lee eera a

Doodoo Mɛnɛ loo Buɛ̄-mɛnɛ Bari, Jizɔs edoo gbɛnɛ-edo nu edɔbiī nɛ pya nɛɛ ele kɛɛ̄ ye bɛbɛɛ. Bira lo VIDIO lo emuɛ kɛ̄ Jizɔs tɔgɛ kɔ a ɛrɛe taɛ sa ɛrɛnage ekpo Bari ye nɛe lo eyeābah nɛ pya nɛɛ doo.

Nu Jizɔs bee doo sɔ̄ a bee le a kɛnɛkɛ̄ bee lu edoba loo nu lo Buɛ̄-mɛnɛ gaa le doo. Yɛɛ pya leelee alu e’ɛm ama, pya amunu na o gaa ɛmadɛɛ̄ a? Buū pya dɔ kpa kaɛ a le kpaɛ̄ lo a i yerebah nɛ kɔ i suā nu akiiloo pya lo leelee.

6. Buɛ̄-mɛnɛ Bari esu gbɛnɛ-edo leelee nua li deesī

 TƐƐ̄NYƆƆ

Buɛ̄-mɛnɛ Bari edoo gbɔ̄mɛɛ ekɛɛrɛ Bari. E nyaana kɛnɛkɛ̄ ama nua paradais lo aba pya kaāna nɛɛ ba etaāŋabah Jɛhova mmɛ deedee etɔɔ̄.

Ebip Tɛ̄ma Nyɔɔ

• Bu mɛ sīdee na Buɛ̄-mɛnɛ Bari edoo kɔ bee Jɛhova a le kaɛ a?

• Ena anua i yiga kɔ Buɛ̄-mɛnɛ Bari edoo kɔ pya yii a le bu Baibol a dooa a?

• Taɛ amunu a le yɛɛ dɛ̄dɛɛ̄ le nu Buɛ̄-mɛnɛ Bari edoo na o gaa ɛmadɛɛ̄ a?