38 NUENƆ
Tɔgɛ Nia Loo Dɔɔ̄nu Dum
Dum ɛrɛ gbɛnɛ-edo pya nu alu nyɛŋia. Kere sɔ̄ i kpesī taāŋa, i dap ɛrɛ pio ekpeloo bu dum. Bu mɛ sīdee na i dap tɔgɛ kɔ i tɔgɛe nia loo dɔɔ̄nu dum a? E ena anua alu ebɛɛ̄ kɔ i doo wo a?
1. Ena anua i tɔgɛ nia loo dum a?
I tɔgɛ nia loo dum nyɔnɛbee alu dɔɔ̄nu a aabah i wereloo Tɛ Jɛhova. Alɛ na “ezi-maā dum” lo a bee dɛm dɛ̄dɛɛ̄ nu a. (Le-yɔɔ 36:9) “Alɛɛ loo nɛ dɛ̄dɛɛ̄ nɛɛ dum le piogi le dɛ̄dɛɛ̄ nu.” (Doonu pya Nɛɛ lɛɛratam 17:25, 28) Jɛhova nɛ i nu a i bɛɛ̄ lokwa i dap tɔɔ̄dum. Mɛ lo a eetɔɔ̄ na, a doo kɔ a waɛ i bah e’ɛrɛ ekpeloo dum.—Buū Doonu pya Nɛɛ lɛɛratam 14:17.
2. Bu mɛ sīdee na i dap doo kɔ Jɛhova a suā kɔ i tɔgɛe nia loo dɔɔ̄nu dum a?
Jɛhova bee a kuūdɛɛ̄loo aā taɛ sɔ̄ o ka bee a su bu loo. Tɛ̄maloo kaɛ edɔɔ̄, ziī nɛɛ a wee si tam nɛ Bari a kura Devid bee ye kɔ nɛ kɔ: “Baɛ dɛɛ̄ a bee mɛ muɛ sɔ̄ na ekpaloo sii mma.” (Le-yɔɔ 139:16) O dum kuī loo Jɛhova kaāna. (Buū Matiu 10:29-31.) Alu nu a ye kiɛ̄ gbɛnɛ sɔ̄ ziī nɛɛ fɛ nɛɛ, ale a fɛ aba ɛɛ. a (A’aa 20:13) A kiɛ̄nage Jɛhova sɔ̄ i yere i dum bu bɔɔ sɔ̄ a naa bɔloo ale ii su zuurabahtɔ̄ lo ekpega dum pya dɔɔ̄na. Sɔ̄ i kuūdɛɛ̄loo i dum sa nwadɛɛ̄ dum pya dɔɔ̄na, i gaa tɔgɛ kɔ i tɔgɛe nia loo dɔɔ̄nu dum a kuī ama.
NƆ YERELOO
Ɛp pya sīdee o dap tɔgɛ nia loo dɔɔ̄nu dum.
3. Kuūdɛɛ̄loo o kɛ̄tɔɔ̄ nwanaloo leere
Pya Nɛɛ Kraist eliamaā su dɛ̄dɛɛ̄ wa dum siātam nɛ Jɛhova. A le doodoo bee ba su wa ekpaloo waāna zɔɔ nɛ Bari. Buū Pya Rom 12:1, 2, lɛɛ o agara pya ebip ama:
-
Ena eyerebah a nɛ kɔ o kuūdɛɛ̄loo o kɛ̄tɔɔ̄ nwanaloo a?
-
Bu pya amunu sīdee na o dap doo wo a?
4. Nwaɛdɛɛ̄ lokwa oo doo lɔgɔ nu eyere a muū loo ale nu elɛɛ o dum
Baibol yere i mɛm loo kɔ i kpooraloo lɛɛ loo pya dogo a i dap yere muu loo. Bira lo VIDIO lo enɔ pio nu o dap doo lokwa o tɔɔ̄ bu kpoogaloo.
Buū Kam 22:3, lɛɛ o ɛp sīdee olo le pya dɔɔ̄na dap le bu kpoogaloo . . .
-
bie o be.
-
bie o kɛ̄tam.
-
sɔ̄ o gaa bira bii laɛgɛloo.
-
sɔ̄ aba ii aa ɔp fah ale sɔ̄ i yaa ɔp pya dɔɔ̄na bu fah.
5. Tɔgɛ enwadɛɛ̄ loo nwiī a le bu ka
Bu ziī ye yɔɔ, Devid bee kɔ kɛ̄ Jɛhova ɛrɛ taɛ bu dum nwiī a sii mɛā doo. Buū Le-yɔɔ 139:13-17, lɛɛ o agara ebip ama:
-
Aāloo kɛ̄ Jɛhova ɛp nu doo, mɛ sɔ̄ na dum nwiī bɔātɛ̄ a, sɔ̄ a le bu ka sɛh sɔ̄ emɛā?
Lok Jɛhova bee nɛ pya Izrɛl bee kpega nwiī a le bu ka le ye ka. Buū A’aa 21:22, 23, lɛɛ o agara pya ebip ama:
-
Jɛhova ɛp nɛɛ a fɛ nwiī a le bu ka sɔ̄ a naa suā doodoo wa?
-
Etɔɔ̄ ye loo doodoo wa lo nɛɛ ɛmɛnɛbee fɛ nwiī a le bu ka? b
-
Kɛ̄ Jɛhova ɛp nu doo ama tɔɔ̄ a loo doodoo wa?
Kere wa a tɔgɛ nia loo dum dap kɛɛrɛ kɔ lɛa bu loo na aba nu a dabe doo a. Buū Aisaia 41:10, lɛɛ o agara pya ebip ama:
-
Lo ziī wa aa kpesī ezū lo elɛa bu loo, mɛɛ na egbī yerebah aābah a? Ena anua a?
PIO NƐƐ KƆ: “Wa bu le loo na a ɛrɛ ekpo lo ebiaɛfii sɛh elɛa bu loo a, ɛɛ alɛɛ ekpaloo.”
-
Ena a doo kɔ o suā kɔ dum nwiī a le bu ka le lo ye ka kuī loo Jɛhova a?
TƐƐ̄NYƆƆ
Baibol tɔgɛ i kɔ i wereloo, nɛ enwadɛɛ̄ sa kpega dɔɔ̄nu dum Jɛhova i nɛ. Pya nu a le bu lo ama na ilii dum le dum pya dɔɔ̄na.
Ebip Tɛ̄ma Nyɔɔ
-
Ena anua dum pya nɛɛ kuī loo Jɛhova a?
-
Tɔɔ̄loo Jɛhova doodoo wa sɔ̄ ziī nɛɛ ɛmɛnɛbee fɛ nɛɛ?
-
Ena anua o tɔgɛ nia loo dɔɔ̄nu dum a?
GBĪTƐ̄ NU
I doo yaa Jɛhova loo dɔɔ̄nu dum doodoo wa?
Gbī ture ebip a kɔ, Bari e’aageloo nɛ wa a bee lɛa bu loo ni?
“Ena Baibol Kɔ Akiiloo Lɛa Bu Loo A?” (Ekobee ue a le nyɔɔ intanɛt)
Nɔ kɛ̄ sīdee Bari ɛp dum doo edoo kɔ o aa ɛrɛ bah bu lɔgɔ sīdee ɛrɛ ekpeloo edap a nua piya nu loo.
“O Birage ‘Bii Laɛgɛloo A Yeekɛ̄’ Ni?” (Awake!, October 8, 2000)
E lo ziī nɛɛ gbī efɛ aba ɛɛ a? Naa ɛp kɛ̄ Baibol dap yerebah doo.
a Jɛhova kuūdɛɛ̄loo pya wa beenyiɛ baara. (Le-yɔɔ 34:18) A dābeeloo ezialoo kɛ̄tɔɔ̄ a dap doo kɔ nɛɛ a gbī efɛ aba ɛɛ, sa a gbī eyerebah. Lo emuɛ kɛ̄ ye yerebah dap nyaana kɛ̄tɔɔ̄ doo, buū ekobee ue a kɔ, “M Gbī E’u—Baibol Dapge Mɛ Yerebah Nɛ Sɔ̄ M Ɛrɛ Ekɛɛrɛ Lo Efɛ Aba Mm Ni?” a le kɛ̄ a kure “Gbītɛ̄ Nu” bu nuenɔ ama.
b Naa bɔloo kɔ pya ebee lɛa bu loo a bege ue aba aba yeekɛ̄, Jɛhova dap wa aaloo nɛ. Lo esuā yereloo, buū ekobee ue a kɔ “Ena Baibol Kɔ Akiiloo Lɛa Bu Loo A?” a le kɛɛ̄ Gbītɛ̄ Nu bu nuenɔ ama.
