41 NUENƆ
Ena Baibol Kɔ Akiiloo Maniakɛ̄ A?
Kɛɛ wee bɔp gbɛnɛ-edo nɛɛ ekɔ nu akiiloo maniakɛ̄. Kerewo, sɔ̄ Baibol kɔ ue kumaloo maniakɛ̄, a doo wo bu sīdee ka le loo. Nu a kɔ dɔbiī i nɛ, e suānu le bu. Sɔ̄ Jɛhova lu Nɛɛ a bee i dɛm a, a suā nu elee i loo. A tɔgɛ i kɛ̄ nu i doo dap doo kɔ bu ye a ɛɛ doo, le nu eyerebah i nɛ kɔ i ɛrɛ ekpeloo dum mmɛ deedee.
1. Jɛhova ɛp maniakɛ̄ doodoo wa?
Maniakɛ̄ lu dɔɔ̄nu a aabah Jɛhova. A gbī kɔ pya a e’iya ziī a ɛrɛ ekpeloo aāloo. Naale aba nyɔɔ kɔ dam le wa a ɛrɛ nwiī na a doo kɔ alu enɛ dɔɔ̄nu ama a, mɛ lokwa dam le wa dap tɔgɛ wereloo kiikɛ̄ ziī le bu sīdee a lee sa kpeloo. Nu anua Muɛ̄ Ue Bari kɔ: “Ɛrɛ ɛɛbu loo wa o bee ii o dee zuguru.” (Kam 5:18, 19) Jɛhova emadɛɛ̄ aābah dam le wa alu Pya Nɛɛ Kraist kɔ ba a tɔɔ̄nɛ ziī lokwa ba naa si nɛɛ bie ziī.—Buū Pya Hibru 13:4.
2. Ena maniakɛ̄ a naa ɛɛ a?
Baibol kɔ i nɛ kɔ “pya kue wa . . . naale eyii Buɛ̄-mɛnɛ Bari.” (1 Pya Kɔrint 6:9, 10) Pya a ɛm Baibol bee su bee ue Grik a kura por·neiʹa su baātɛ̄ maniakɛ̄ a naa ɛɛ. Pya nu a kura na (1) Maniakɛ̄ a a le yɛɛ baɛ nɛɛ ba sii iya ziī, (2) maniakɛ̄ a le yɛɛ nɛɛdam le nɛɛdam, le nɛɛwa le nɛɛwa, le (3) sɔ̄ nɛɛ maloo nam. I doo kɔ bu Jɛhova a ɛɛ, e i ɛrɛ biī nɛ i loo sɔ̄ i “aaloo kunagā.”—1 Pya Tɛsalɔnaika 4:3.
NƆ YERELOO
Nɔ kɛ̄ o dap kpooraloo lɛɛloo maniakɛ̄ a naa ɛɛ doo, le pya biī o ɛrɛ sɔ̄ o tɔɔ̄ ɛɛ bu dogo.
3. Teera aaloo maniakɛ̄ a naa ɛɛ
Josɛf a bɔ ture nyiɛ loo bee piiga lo etɔɔ̄ ɛɛ bu dogo. Buū Jɛnɛsis 39:1-12, lɛɛ o agara pya ebip ama:
-
Ena anua Josɛf bee teera a? —Ɛp 9 barakpaɛ̄.
-
Nu Josɛf bee doo ama leege ni? Ena anua o kɛɛrɛ doo wo a?
Bu ilii dee ama, mɛ sīdee na pya zege dap nɔ edoba Josɛf sa teera aaloo maniakɛ̄ a naa ɛɛ a? Bira lo VIDIO.
Jɛhova gbī kɔ dɛ̄dɛɛ̄ ii i kiī maniakɛ̄ a naa ɛɛ. Buū 1 Pya Kɔrint 6:18, lɛɛ o agara pya ebip ama:
-
Pya amunu kɛ̄tɔɔ̄ na edap ture nɛɛ mmɛ loo maniakɛ̄ a naa ɛɛ a?
-
Ena o dap doo lo eteera aaloo kunagā a?
4. O dap be eebah doā-ɛp
Ena a dap doo kɔ a aga i bah lo ebe eebah doā-ɛp lo ekunagā a? Bira lo VIDIO, lɛɛ o agara ebip a nyɔɔnɛ ama.
-
Sɔ̄ wuga nɛɛdam bu lo vidio bee suā kɔ ye ekɛɛrɛ le dogo edoo kɔ aa tɔɔ̄na nɛ ye wa, ena a bee doo a?
Siga Pya Nɛɛ Kraist a bɔ ture nyiɛ loo piiganage lo edoo kɔ wa ekɛɛrɛ a bia ɛɛ. Mɛ sīdee na o dap ɔbɛ kɛɛrɛ nu akiiloo pya nu a naa ɛɛ ani? Buū Pya Filipai 4:8, lɛɛ o agara pya ebip ama:
-
Pya amunu nu na i ɛrɛ ekɛɛrɛ nyɔɔ a?
-
Buū Baibol le si tam nɛ Jɛhova dap i yerebah nɛ lo ebe eebah doā-ɛp lo esi pɔrɔ doodoo wa?
5. Pya daakuu Jɛhova dɔbiī i nɛ
Jɛhova suā nu a i lee loo. A kɔ i nɛ kɛ̄ i dap bia ɛɛ bu dogo le pya leelee i ɛrɛ lo i doo wo. Buū Kam 7:7-27 ale bira lo VIDIO, lɛɛ o agara pya ebip a nyɔɔnɛ ama.
-
Bu mɛ sīdee na lo zege nɛɛdam bee kiā yii bu kɛ̄tɔɔ̄ a ye doā-ɛp a?—Ɛp Kam 7:8, 9.
-
Dookɛ̄ a le bu Kam 7:23, 26 doo, amunu pɔrɔ nu na a dap sira aabu maniakɛ̄ a naa ɛɛ a. Lo i tɔɔ̄dum a ɛɛ, pya amunu taāŋa na ii le eyii bu a?
-
Bu mɛ sīdee na tɔɔ̄dum a ɛɛ eyerebah i nɛ lo e’ɛrɛ ekpeloo dum mmɛ deedee a?
Siga nɛɛ kɛɛrɛ kɔ wereloo naale bu sɔ̄ Baibol kɔ nɛɛdam le nɛɛdam ale nɛɛwa le nɛɛwa aa maloo ziī. Mɛ Jɛhova, Bari wereloo gbī kɔ dɛ̄dɛɛ̄ nɛɛ a ɛrɛ ekpeloo dum mmɛ deedee. Lokwa i ɛrɛ lo leelee, i ɛrɛ etɔɔ̄dum dookɛ̄ pya ye daakuu le doo. Buū 1 Pya Kɔrint 6:9-11, lɛɛ o agara ebip ama:
-
Aāloo kɛ̄ Bari ɛp nu doo, lege aba sīdee maniakɛ̄ a bee piya na sɔ̄ nɛɛdam le nɛɛdam maniakɛ̄ ale sɔ̄ nɛɛwa le nɛɛwa maniakɛ̄ ni?
Lokwa i dap doo kɔ bu Bari a ɛɛ, dɛ̄dɛɛ̄ ii ɛrɛ enyaana bahloo i sīdee tɔɔ̄dum. Dodoo wo edɔge biī i nɛ ni? Buū Le-yɔɔ 19:8, 11, lɛɛ o agara pya ebip ama:
-
O kɛɛrɛge kɔ suānu le bu pya daakuu Jɛhova lo etɔɔ̄dum a ɛɛ ni? Ena anua o kɛɛrɛ doo wo a?
Jɛhova eyerebah nɛ booboo nɛɛ lo egbaɛ̄tɔ̄loo ye lok nyɔɔ tɔɔ̄dum a ɛɛ. A dapnage yerebah nɛ olo
PIO NƐƐ KƆ: “Ɛrɛgeba sīdee maloo ziī lee, lo a le baɛ lo nɛɛ weregeloo ziī lo.”
-
Ena olo kɛɛrɛ a?
TƐƐ̄NYƆƆ
Jɛhova nɛ dɔɔ̄nu maniakɛ̄ dam le wa lokwa ba ɛrɛ ekpeloo aāloo.
Ebip Tɛ̄ma Nyɔɔ
-
Pya ena a le bu maniakɛ̄ a naa ɛɛ a?
-
Ena eyerebah i nɛ lo e’ɔbɛ maniakɛ̄ a naa ɛɛ a?
-
Bu mɛ sīdee na i ɛrɛ biī sɔ̄ i nyɔɔnɛ daakuu Jɛhova nyɔɔ tɔɔ̄dum a ɛɛ a?
GBĪTƐ̄ NU
Nɔ nu anua Bari gbī kɔ nɛɛdam le nɛɛwa ba gbī etɔɔ̄ kpaɛ̄ ziī a dasī iya ziī.
“Ena Baibol Kɔ Akiiloo Tɔɔ̄ Loo Nɛɛ O Sii Ii ale Iya A?” (Ekobee ue a le nyɔɔ intanɛt)
Ɛp nu anua daakuu Baibol akiiloo sɔ̄ nɛɛdam le nɛɛdam ale nɛɛwa le nɛɛwa maniakɛ̄ naa nyimɛ baaloo.
“Ekɔ Sɔ̄ Baɛ Nɛɛdam Ale Baɛ Nɛɛwa Maloo Ziī Bee Piya Ni?” (Ekobee ue a le nyɔɔ intanɛt)
Nɔ kɛ̄ pya lok Bari akiiloo dɛ̄dɛɛ̄ sīdee maniakɛ̄ a naa ɛɛ i kpega doo.
“Ekɔ Su Ziī Tɛ̄mabu Egā Beege Piya Ni?” (Ekobee ue a le nyɔɔ intanɛt)
Bu ekobee ue a kura “Ba Bee Mɛ Yere Ka Loo” buū nu a bee zū ziī nɛɛdam a wee maloo nɛɛdam kɔ a kiiya sa tɔɔ̄dum a nia Bari.
a Pya gbaniāloo a naa lee ama na, maloo ziī, su ziī tɛ̄mabu egā, tɛ̄ma nu tɛ̄, ale dagi bahloo pya kɛ̄ gɔā loo nɛɛdam le nɛɛwa bu taɛ eyɔ ye maniakɛ̄.
