Bu pio barasī, pya nɛɛ kɛɛrɛ kɔ nɛɛdam ale nɛɛwa naale edap ɛrɛ ɛɛbu lo a naa iya dam ale ii wa lo. Kerewo, naale dɛ̄dɛɛ̄ pya a ii ale iya na a ɛrɛ ɛɛbu a, e a naale dɛ̄dɛɛ̄ pya a le aba aba na ba naa ɛrɛ ɛɛbu a. Kaka ue a le kɛ̄ na bee, Baibol kɔ lele aba ɔɔ le iya dam ale ii wa lu dɔɔ̄nu.

1. Pya amunu biī na a le bu lele aba ɔɔ a?

Baibol kɔ: “Nɛɛ a ii nwiī emuā doo leere, e nɛɛ a aaloo e’ii leenage ee wo.” (Buū 1 Pya Kɔrint 7:32, 33, 38.) Bu mɛ sīdee na nɛɛ a le aba ɛɛ “leenage ee wo” a? Pya Nɛɛ Kraist ba le aba aba naa ɛrɛ ebɛɛ̄ lo ekuūdɛɛ̄loo wa dam ale wa wa. Ba wee ɛrɛ wa loo gbɛnɛkpo sɔ̄. Bu edoba, pio aba dap yɛgɛ wa esiatam yereloo bu gbɛnɛ-edo sīdee, doodoo kii dɔɔ̄na buɛ̄ uwe zue le yereue. E lo a eetɔɔ̄ na bee, ba dap su gbɛnɛ-edo sɔ̄ daānu edoo kɔ ba a tɔɔ̄ waɛloo Jɛhova.

2. Pio amunu biī na a le bu ii wa ale iya dam bu sīdee lok yerekpotɛ̄ a?

Iya dam le wa ɛrɛnage alɛɛ biī dookɛ̄ a doo sɔ̄ nɛɛ le aba ɛɛ. Baibol kɔ “baɛ aba lee ee ziī.” (Eklisiastis 4:9) Lo ama lu kaka kiiloo Pya Nɛɛ Kraist ba su pya daakuu Baibol yerebu wa iya dam le wa. Dam le wa ba iya ziī bu sīdee lok yerekpotɛ̄, yira yii nɛ ziī kɔ ba ewereeloo, nɛ enwadɛɛ̄, sa ɛp ziī leere. Lo ama wee doo kɔ loo wa a sukɛ̄ ee pya ba aadee tɔɔ̄ kpaɛ̄ ziī. E pya wa miɔŋɔ e’ɛrɛnage kpoogaloo.

3. Jɛhova ɛp iya dam le wa doodoo wa?

Sɔ̄ Jɛhova bee bɔātɛ̄ tua iya dam le wa, a bee kɔ: “Nɛɛ elɛɛbaloo ye tɛ le ye ka sa dabaloo ye wa.” (Jɛnɛsis 2:24) Jɛhova gbī kɔ dam le wa a wereloo sa dabaloo ziī kuma sɔ̄ ba le dum. A kɔ aba nu edoo kɔ ba a lɛa ziī bah na lo ziī aba si nɛɛ bie ziī. Sɔ̄ a sira doo wo, Jɛhova nɛ dee lo nɛɛ a naa doo lɔgɔ nu a kɔ a biaɛfii lo a le elɛa ye dam ale ye wa bah. a (Matiu 19:9) Jɛhova naa nɛ dee Pya Nɛɛ Kraist kɔ ba a ii gbɛnɛ-edo wa.—1 Timɔti 3:2.

 NƆ YERELOO

5. Su suānu saŋɛ nɛɛ o ii ale nɛɛ o iya

Sagɛ nɛɛ e’ii sa iya lu ziī nu a kuī eera o dap biaɛfii. Buū Matiu 19:4-6, 9, lɛɛ o agara ebip ama:

• Ena anua Nɛɛ Kraist naale egbara lo e’iya dam ale ii wa a?

Baibol dap a yerebah nɛ kɔ o suā pya elap dogo o dap ɛp bu nɛɛ o gaa gbī e’ii ale iya. E lo a kuī eera, gbī nɛɛ o ii ale nɛɛ o iya a wereloo Jɛhova. b Buū 1 Pya Kɔrint 7:39 le 2 Pya Kɔrint 6:14. Lɛɛ o agara pya ebip ama:

• Ena anua i ii sa iya aba pya i wuga alu Nɛɛ Kraist a?

• O kɛɛrɛ kɔ a tɔɔ̄loo Jɛhova doodoo wa sɔ̄ i ii sa iya nɛɛ a naa taāŋa ye bah ni?

 6. Ɛp iya dam le wa dookɛ̄ Jɛhova ɛp doo

Bie Izrɛl a dee kere, pio nɛɛ wee lɛa wa wa bah nyɔɔ nu a naa bɔloo. Buū Malaki 2:13, 14, 16, lɛɛ o agara ebip ama:

• Ena anua Jɛhova baaloo lɛa wa bah nyɔɔ nu Baibol naa yerekpotɛ̄ a?

Bira lo VIDIO, lɛɛ o agara ebip a nyɔɔnɛ ama.

• Lo o wa ale o dam naa taāŋabah Jɛhova, ena o dap doo lokwa o iya dam le wa le bu ɛɛbu a?

7. Su pya daakuu Jɛhova yerebu o iya dam le wa

 TƐƐ̄NYƆƆ

Tɔɔ̄ aba ɔɔ le iya dam le wa lu dɔɔ̄nu a aabah Jɛhova. Pya a le aba aba le pya e’iya sa ii dap le bu ɛɛbu le iīnaloo lo ba kiisī lo edoo nu dookɛ̄ Jɛhova gbī doo.

Ebip Tɛ̄ma Nyɔɔ

• Nɛɛ esu ye le aba ɛɛ daānu leere doodoo wa?

• Ena anua Baibol kɔ i ii sa iya aba nɛɛ aa taāŋabah Jɛhova a?

• Aba ena Baibol kɔ ziī nɛɛ dap le nyɔɔ lɛa ye wa bah ale aaloo ye dam a?