Tɛɛ̄ ɛŋɛnɛ nyɔuwe, pya nɛɛ ɛrɛ keekee ekɛɛrɛ akiiloo ɔ̄ mii. Siga nɛɛ sagɛ lo enyɔɔnɛ pya ye gbo gbaa ɔ̄ mii pio sɔ̄. Siga nɛɛ sagɛ kɔ ba naale e’ɔ̄e mii doo pippip. E pio nɛɛ ɔ̄ mii mmɛ sɔ̄ ebūmɛ wa. Baibol ɛp ɔ̄ mii doodoo wa?

1. A beege piya lo e’ɔ̄ pya mii a wee būmɛ nɛɛ ni?

Baibol naa gbaɛ̄nu dɛɛ̄ ɔ̄ mii a wee būmɛ nɛɛ. Taāwo, sɔ̄ a gaa kɔ booboo dɔɔ̄nu lo Bari enɛa i, Baibol kɔ nu akiiloo “mii-vine lo a nɛ ɛɛbu beenyiɛ nɛɛ.” (Le-yɔɔ 104:14, 15) A ɛrɛ siga pya nɛɛdam le nɛɛwa alu ekue wa bee bu Baibol lo ba bee ɔ̄nage mii a wee būmɛ nɛɛ.—1 Timɔti 5:23.

2. Amunu zuurabahtɔ̄ na Baibol nɛ pya a sagɛ lo e’ɔ̄ mii a?

Jɛhova baaloo ɔ̄ gbɛnɛ mii le ɔ̄ mii tɛɛā dɛɛ̄. (Pya Galetia 5:21) Ye Muɛ̄ Ue kɔ: “O a tɔɔ̄ yɛɛ pya ɔ̄ gbɛnɛ mii vine.” (Kam 23:20) Lo a le i sagɛ lo e’ɔ̄ mii—kere kɛ̄ lɔgɔ nɛɛ naale, ii ɛrɛ e’ɔ̄ mii mmɛ kɛ̄ ii le edapna kɛɛrɛ nu leere, doo nu le kɔ ue leere, ale bu sīdee eyere i eyɔloo loo. Lo a le ii le edap nwaɛ̄dɛɛ̄ loo kɛ̄ i ɔ̄ mii doo, a lee i aadee ɔbɛ e’ɔ̄.

3. Bu mɛ sīdee na i dap nɛ enwadɛɛ̄ biaɛfii pya dɔɔ̄na akiiloo ɔ̄ mii a?

Ziī ziī nɛɛ na ebiaɛfii lo e’ɔ̄ mii a wee būmɛ nɛɛ ale a naale e’ɔ̄ a. Ii ɛrɛ ebiaɛ nɛɛ a sagɛ lo e’ɔ̄ mii bu sīdee a kuūnadɛɛ̄, ale su bah ekpo aā nɛɛ a naa gbī e’ɔ̄ kɔ a ɛrɛ e’ɔ̄. (Pya Rom 14:10) Lo i muɛ kɔ ɔ̄ mii edoo kɔ pya dɔɔ̄na a tɛɛ̄ i nyɔɔ dɔ, i lɛɛbaloo e’ɔ̄. (Buū Pya Rom 14:21.) Ii le egbī “[ilii] nu, mɛ nu a lee nɛ nɛɛ [le ii] le.”—Buū 1 Pya Kɔrint 10:23, 24.

 NƆ YERELOO

4. Biaɛfii lo a le o ɔ̄

Jizɔs bee ɛp ɔ̄ mii doodoo wa? Lo esuā ye ture, buū tua nyɛŋiatam a bee si. Buū Jɔn 2:1-11, lɛɛ o agara pya ebip ama:

• Aāloo nyɛŋiatam ama, ena i dap nɔ aāloo kɛ̄ Jizɔs ɛp mii le pya a ɔ̄ doo a?

• Kuma sɔ̄ Jizɔs naa bee ɛp kɔ ɔ̄ mii bee piya a, mɛ sīdee na Pya Nɛɛ Kraist e’ɛp pya nɛɛ ba biaɛfii lo e’ɔ̄ a?

Kere adoo ziī Nɛɛ Kraist lu puɛ lo e’ɔ̄ mii, lo ama naa kura kɔ suānu le bu lo a le a ɔ̄ mii dɛ̄dɛɛ̄ sɔ̄. Buū Kam 22:3, lɛɛ o ɛp kɛ̄ pya ue a le kɛɛ̄ ama dap ɛrɛ pah nyɔɔ o biaɛfii lo a le o ɔ̄ mii ale oo le e’ɔ̄ doo:

• Lo a le o gaa gbī e’ɔb fah, ale su gbɛnɛka nutam siātam.

• Bu le a loo.

• Dɔktɔ ezuura a bahtɔ̄ kɔ o waa ɔ̄na mii a wee būmɛ nɛɛ.

• A aga a loo ebaɛbee kɛ̄ o ɔ̄ doo.

• Lok barasī kɛ̄ o tɔɔ̄ naa yiga kɔ o ɔ̄ mii.

• Sɔ̄ o le kpaɛ̄ nɛɛ elɛrabah loo ɔ̄ mii nyɔɔbee a wee ye agabah ebaɛbee kɛ̄ a ɔ̄ doo sɔ̄ akii adumɛ.

Ekɔ o dɔɔ̄ge mii a wee būmɛ nɛɛ bie o doonu iya dam le wa, ale bie dɔɔ̄na gbaa bɔŋia ni? Lokwa o dap biaɛfii leere, bira lo VIDIO.

Buū Pya Rom 13:13 le 1 Pya Kɔrint 10:31, 32. Sɔ̄ bui ebuna ziī ziī dɔ kpa kaɛ ama sah, bui kɔnia ue nyɔɔ ebip ama:

• Bu mɛ sīdee na su pya daakuu ama yerebu o dum eyerebah a nɛ kɔ o biaɛfii lo edoo nu enia Jɛhova a?

 5. Biaɛfii dua kɛ̄ o ɔ̄ doo

Lo a le o sagɛ lo e’ɔ̄ mii a wee būmɛ nɛɛ, nyɛŋiabu kɔ: Kere adoo Jɛhova naa gbaɛ̄nu dɛɛ̄ ɔ̄ mii, a baaloo sɔ̄ nɛɛ ɔ̄ gbɛnɛ mii ale ɔ̄ yeekɛ̄. Ena anua a? Buū Hosea 4:11, 18, lɛɛ o agara ebip ama:

• Ena a dap sira sɔ̄ nɛɛ ɔ̄ gbɛnɛ mii a?

Ena eyerebah i nɛ lokwa ii ɔ̄ mii yeekɛ̄ a? I ɛrɛ elu nɛɛ a kuūnadɛɛ̄, sa suā kɛ̄ i ekpo ina yira. Buū Kam 11:2, lɛɛ o agara ebip ama:

• Ena anua alu nu a lee kɔ o suā kuma mii o ɔ̄ a?

6. Be eebah su mii daānu yemakɛ̄

 TƐƐ̄NYƆƆ

Jɛhova bee i nɛ mii lokwa i su ɛā ekpeloo, mɛ a baaloo ɔ̄ mii yeekɛ̄ le ɔ̄ mii tɛɛā dɛɛ̄.

Ebip Tɛ̄ma Nyɔɔ

• Baibol ɛp ɔ̄ mii doodoo wa?

• Pya amunu pɔrɔ na a le bu ɔ̄ mii yemakɛ̄ a?

• Bu mɛ sīdee na i dap nɛ enwadɛɛ̄ biaɛfii pya dɔɔ̄na kiiloo ɔ̄ mii a?