Jɛhova gbī kɔ i ɛrɛ ekpeloo dum sa doo doonu siga sɔ̄. Mɛ a lege dɛ̄dɛɛ̄ doonu le dee seseea na a nia Bari a? Bu mɛ sīdee na i dap tɔgɛ i wereloo kiikɛ̄ Jɛhova le bu pya doonu i doo a?

1. Ena anua gbɛnɛ-edo doonu naa nia Jɛhova a?

Dap a deege lo esuā kɔ gbɛnɛ-edo doonu naa dɛɛa nyɔɔ nu Baibol tɔgɛ, le kɔ wa bɔātɛ̄ aaloo doonu taāŋabah yɔ. Siga pya doonu a le doo wo dap ɛrɛ nu edoo kiiloo ekwɔ sīdee taāŋabah. Ba dap kiiloo doo edɔɔ̄, ale kɔ piogi nɛɛ naa u. Siga doonu dɛɛa nyɔɔ nu a naa lu kaka ale alu ɛrɛ yira bu le gbɔɔsī. (Aisaia 65:11) Jɛhova zuurabahtɔ̄ pya a ye taāŋabah kɔ ba a: “Tɔɔ̄ kee wa aa yɛɛ . . . e bui aa daabahloo lɔgɔ nu a naa ɛɛ.”—2 Pya Kɔrint 6:17. a

2. Pya doonu a su ka a naa kuu miɔŋɔ nɛɛ wa nɛ tɔɔ̄loo Jɛhova doodoo wa?

Jɛhovah zuura i bahtɔ̄ kɔ i aa “ture nyiɛloo nɛɛ.” (Buū Jeremia 17:5.) Siga doonu lu edoo lo enɛ ka pya bɛbɛɛ ale pya nɔ̄. Pya lo dɔɔ̄na lu edoo lo eyere ka loo edo ale dee wa edo bee ɛrɛ wa loo. (1 Jɔn 5:21) E pya lo dɔɔ̄na doonu nyimɛ bira bɛbɛɛ ale gbɛnɛ gbɛnɛ bɔŋanaloo. E tɔɔ̄loo Jɛhova doodoo wa lo i su ka a naa kuu ziī nɛɛ ale bɔŋanaloo wa nɛ, lo a eetɔɔ̄ na lo a nyimɛ nu alu kee loo ye ekɛɛrɛ ni?

3. Pya ena a dap doo kɔ ziī doonu a bee piya a?

Baibol gbaɛ̄ nu dɛɛ̄ ‘ɔ̄ miī tɛɛā dɛɛ̄, yep-nwī-esɔgɔ-yep, le ɔ̄ gbɛnɛ-edo ɔ̄ miī.’ (1 Pit 4:3) Siga doonu aara dogo kūnagā le pya dogo a naa bɔloo. Lokwa i dap kiisī lo elu gbo Jɛhova, alu ebɛɛ̄ kɔ i teera aaloo pya dogo a naa ɛɛ.

 NƆ YERELOO

 5. Yerebah nɛ pya dɔɔ̄na kɔ ba a nɛ enwadɛɛ̄ nu o yiga

6. Jɛhova gbī kɔ i ɛrɛ ɛɛbu

Jɛhova gbī kɔ i nyɔɔnɛ pya i butɔ le pya i gbo gbaa ɛrɛ ekpeloo bu dum. Buū Eklisiastis 8:15, lɛɛ o agara ebip ama:

• Mɛ sīdee na dɔ kpa kaɛ ama tɔgɛ kɔ Jɛhova gbī kɔ i ɛrɛ ɛɛbu a?

Jɛhova gbī kɔ pya ye nɛɛ a gbaa ɛrɛ ekpeloo le ɛɛbu. Bira lo VIDIO lokwa o muɛ kɛ̄ lo ba ama elua etɔgɛ bie i international kɔnvɛnsɔn doo.

Buū Pya Galetia 6:10, lɛɛ o agara pya ebip ama:

• Ekɔ sɔ̄ i doo pya doonu dee seseea na a tɔgɛ kɔ i gaa si “tam a lee” kiikɛ̄ pya dɔɔ̄na le ani?

• Amunu sīdee dɔɔ̄ nu lɛabah na enɛ a ɛɛbu a—lege sɔ̄ o ɛrɛ edoo nyɔɔbee ziī doonu, sɛh sɔ̄ o nɛ aābu beenyiɛ a?

• Gbɛnɛ-edo Pya Ekeebee wee tɔ̄ sɔ̄ sa doo ziī nu alu keebee nɛ pya wa miɔŋɔ, sa wa yaɛnu nɛ sɔ̄ ba naa bee ɛmadɛɛ̄. Lo o ɛrɛ pya miɔŋɔ, siga pya e alu keebee na o dap wa doo nɛ a?

 TƐƐ̄NYƆƆ

Jɛhova gbī kɔ i nyɔɔnɛ pya i butɔ le pya i gbo gbaa ɛrɛ ekpeloo. Mɛ a gbīnage kɔ i ɔbɛ pya doonu a naa nia ye.

Ebip Tɛ̄ma Nyɔɔ

• Pya amunu ebip na i dap bip lokwa i suā lo a le ziī doonu bɛā Jɛhova a?

• Bu mɛ sīdee na i dap yerebah nɛ pya i butɔ le pya i gbo lo edābeeloo i biaɛfii kiiloo doonu a?

• O tɛɛ̄ doodoo wa suā kɔ Jɛhova gbī kɔ o ɛrɛ ɛɛbu le ekpeloo?