Jizɔs bee nɛ lok kɔ pya a wee ye nyɔɔnɛ dumɛ aa “le loo nyɔuwe.” (Jɔn 15:19) Lo ama kura kɔ i tɔɔ̄ kee, sa ii le e’ɛrɛ lɔgɔ nu edoo bu bira bɛbɛɛ le benɔ̄. Tɔɔ̄ kee naa aadee lu nu a waɛ edoo. Sɔ̄ i tɔɔ̄ kee, pya nɛɛ dap i kɛgɛ. Bu mɛ sīdee na i dap tɔɔ̄ kee sa tɔɔ̄ nɛ aba Jɛhova a?

1. Pya kaka Nɛɛ Kraist ɛp bɛbɛɛ miɔŋɔ nɛɛ doodoo wa?

Pya Nɛɛ Kraist nɛ enwadɛɛ̄ pya bɛbɛɛ. I doo dookɛ̄ Jizɔs bee kɔ doo tɛ̄maloo esu “nu siza nɛ siza”—lo a kura kɔ, i gbaɛ̄tɔ̄loo lok a bɛɛ buɛ̄ i tɔɔ̄, doodoo kpɛ tax. (Maak 12:17) Baibol tɔgɛ i kɔ nu anua bɛbɛɛ miɔŋɔ nɛɛ aa kiisī na bee Jɛhova lɛɛ wa bahloo kɔ ba a bɛɛ. (Pya Rom 13:1) Nyɔɔwo, i suā kɔ bɛbɛɛ pya miɔŋɔ nɛɛ naa ɛrɛ ekpo bee lo Jɛhova. Ɛɛ aba Bari le ye Buɛ̄-mɛnɛ a le bunyɔɔ na elɛɛ dɛ̄dɛɛ̄ taāŋa miɔŋɔ nɛɛ a.

2. Bu mɛ sīdee na i dap tɔgɛ kɔ i tɔɔ̄e kee a?

Doodoo Jizɔs, ii yiibu bira bɛbɛɛ. Sɔ̄ pya nɛɛ bee muɛ ziī nyɛŋiatam Jizɔs bee si, ba bee piiga lo esu bah ekpo ye aā nua wa mɛnɛ, mɛ Jizɔs naa bee wa yiga nɛ. (Jɔn 6:15) Ena anua a naa bee yiga ani? Nyɔɔbee Jizɔs bee kɔ, “mdaa Buɛ̄-mɛnɛ naa aa bu lo nyɔuwe ama.” (Jɔn 18:36) Doodoo pya a wee nyɔɔnɛ dumɛ Jizɔs, i tɔgɛ kɔ i tɔɔ̄e kee bu gbɛnɛ-edo sīdee. Bu edoba, ii wee si uwe be. (Buū Maika 4:3.) I nwadɛɛ̄ nu a tɔɔ̄dɔ ziī edo, doodoo tekaɛ̄, mɛ ii wee wa taāŋabah. (1 Jɔn 5:21) E ii wee yerekpotɛ̄ ale be ziī eku bɛbɛɛ, ale nɛɛ a gaa gbī ebɛɛ. Bu pya sīdee ama le pya lo dɔɔ̄na na i tɔgɛ i mmɛɛ tɔɔ̄nɛ bɛbɛɛ Bari a, lo a le ye Buɛ̄-mɛnɛ.

 NƆ YERELOO

3. Pya kaka Nɛɛ Kraist wee tɔɔ̄ kee

Jizɔs le pya a wee ye nyɔɔnɛ dumɛ sere kaāna edoba i nɛ. Buū Pya Rom 13:1, 5-7 le 1 Pita 2:13, 14. Lɛɛ, o bira lo VIDIO sa agara pya ebip a nyɔɔnɛ ama.

• Ena anua i nɛ enwadɛɛ̄ bɛbɛɛ miɔŋɔ nɛɛ a?

• Pio amunu sīdee na i dap tɔgɛ kɔ i gbaɛ̄e wa tɔ̄loo a?

Sɔ̄ nɔ̄ dɔ, pio edonyɔɔ wee kɔ ba tɔɔ̄e kee, mɛ ba ɛrɛ bah bu lo be tɛ̄maloo eyerekpotɛ̄ baɛ barasī a gaa bebe a. Ena kaāna tɔɔ̄ kee kura a? Buū Jɔn 17:16. Lɛɛ, o bira lo VIDIO sa agara ebip a nyɔɔnɛ ama.

• Ena tɔɔ̄ kee kura a?

Ena o doo lo pya bɛbɛɛ gbī kɔ o doo nu Bari baaloo a? Buū Doonu pya Nɛɛ lɛɛratam 5:28, 29. Lɛɛ, o bira lo VIDIO sa agara pya ebip a nyɔɔnɛ ama.

• Lo lok miɔŋɔ nɛɛ be lok Bari, amunu na i gbaɛ̄tɔ̄loo a?

• O dapge kɛɛrɛbu loo pio kɛ̄tɔɔ̄ lo Pya Nɛɛ Kraist naale egbaɛ̄tɔ̄loo pya aa bɛɛ ni?

 4. Tɔɔ̄ kee bu o ekɛɛrɛ le bu dogo

Buū 1 Jɔn 5:21. Lɛɛ, o bira lo VIDIO sa agara pya ebip a nyɔɔnɛ ama.

• Bu vidio ama, ena anua Ayenge bee biaɛfii kɔ a naale e’ɛrɛe bah bu bira bɛbɛɛ ale sudɔ bu doonu a nɛ ka wa edonyɔɔ, doodoo kana muɛ̄ tekaɛ̄ a?

• O kɛɛrɛge kɔ suānu le bu ye biaɛfii ama ni?

Dɔɔ̄na pya amunu kɛ̄tɔɔ̄ na a dap doā-ɛp i tɔɔ̄ kee a? Bira lo VIDIO, lɛɛ o agara pya ebip a nyɔɔnɛ ama.

• Bu mɛ sīdee na i dap tɔɔ̄ kee sɔ̄ baɛ keekee edo aa bira pya bii laɛgɛ loo a?

• Mɛ sīdee na i dap tɔɔ̄ kee kere sɔ̄ biaɛfii pya bɛbɛɛ i ɛrɛ pah nyɔɔ a?

• Pya kɛ̄ i dā yereue aā ale pya i gbo dap ɛrɛ pah nyɔɔ i tɔɔ̄ kee doodoo wa?

 TƐƐ̄NYƆƆ

Pya Nɛɛ Kraist piiga kaāna lo etɔɔ̄ kee aaloo bira bɛbɛɛ bu wa ekɛɛrɛ, bu nu ba kɔ, le bu wa dogo.

Ebip Tɛ̄ma Nyɔɔ

• Amunu kɔm na pya bɛbɛɛ i ɛrɛ bee a?

• Ena anua i tɔɔ̄ kee aaloo bira bɛbɛɛ a?

• Pya amunu kɛ̄tɔɔ̄ na a dap doā-ɛp i tɔɔ̄ kee a?