Pya gbo a i tɔɔ̄ waɛloo wee doo kɔ i ɛrɛ ɛɛbu sɔ̄ nu lele, e ba wee i yere mɛm loo sɔ̄ i le bu e’aga kɛ̄tɔɔ̄. Mɛ Baibol zuura i bahtɔ̄ kɔ naale dɛ̄dɛɛ̄ nɛɛ na alu le gbo a. Lo a le wo, bu mɛ sīdee na o dap sagɛ le gbo a? Naa kɛɛrɛbu pya ebip ama.

1. Pya gbo o yii dap a ɛrɛ pah nyɔɔ doodoo wa?

I wee gbī ebee pya nɛɛ i su gbɛnɛ-edo sɔ̄ tɔ̄ma kpaɛ̄. Pah ba e’ɛrɛ i nyɔɔ dap lu lo pɔrɔ ale lo le, e lo ama lu kaka kere i nyɔɔnɛ pya nɛɛ ama kɔnia ue sī le sī ale nyɔɔ intanɛt. Baibol kɔ: “Nɛɛ a nyɔɔnɛ pya suānu kiā gaa le suānu, mɛ nɛɛ a nyɔɔnɛ pya ezu [pya a naa wereloo Jɛhova] kiā gaa le ɛrɛ muɛ pɔrɔ.” (Kam 13:20) Pya gbo a wereloo Jɛhova sa ye taāŋabah dap a yerebah nɛ kɔ o tɔɔ̄ ye waɛloo le kɔ o biaɛ nu fii bu le sīdee. Mɛ yii gbo pya nɛɛ a naa wereloo Jɛhova ezuura i lɛɛloo Jɛhova. Kɛ̄ adoo a lo Baibol yere i mɛm loo kɔ i su suānu sāŋɛ pya nɛɛ i yii gbo! Sɔ̄ i yii gbo pya a wereloo Bari, ili ɛrɛ biī wa aāloo sa alaba e’ɛrɛnage biī i aāloo. Lo ama doo kɔ i dap “agɛrɛ beenyiɛ ɛnia [ii] sa wu ɛnia [ii] agɛrɛ.”—1 Pya Tɛsalɔnaika 5:11.

2. Pya gbo o yii tɔɔ̄loo Jɛhova doodoo wa?

Jɛhova sagɛ pya ye gbo leere. “Pya a yira kaāna na a ture nyiɛ loo a.” (Kam 3:32) Etɔɔ̄ loo Jɛhova doodoo wa lo i yii gbo pya a naa were ye loo. Bu ye ebiira gbɛnɛ! (Buū Jemes 4:4.) Bu dɔɔ̄na sīdee, bu Jɛhova e’ɛɛ sa eyii i gbo lo i kiī pɔrɔ gbo sa yii gbo pya a ye wereloo.—Le-yɔɔ 15:1-4.

 NƆ YERELOO

4. Pya nɛɛ i nama ale pya nɛɛ a i nama dapnage lu i gbo

Baibol kɔ nu akiiloo baɛ nɛɛ a bee tɔɔ̄ Izrɛl a dee kere, lo a le Devid le Jonatan. Jonatan bee lu nwiī mɛnɛ e a bee nama Devid kaāna; kerewo, baɛ aba bee lu le gbo. Buū 1 Samuel 18:1, lɛɛ o agara ebip ama:

• Ena anua a naalee kɔ aba pya alu i sīkoh, pya a siābee ale pya a ɛrɛ gbɛnɛ dɔ na i yii gbo a?

Buū Pya Rom 1:11, 12, lɛɛ o agara ebip ama:

• Bu mɛ sīdee na pya gbo a wereloo Jɛhova eyere mɛm loo ziī a?

Bu vidio elu ebira ama, muɛ kɛ̄ ziī wuga nɛɛdam ɛrɛ gbo bie kɛ̄ a naa bee ɛmadɛɛ̄ doo. Bira lo VIDIO, lɛɛ o agara pya ebip a nyɔɔnɛ ama.

• Bu lo vidio, ena anua tɛ le ka Akil bee ɛrɛ ekɛɛrɛ kiiloo pya nɛɛ wa nwiī yii gbo bie tɔkpa a?

• Ena anua a bee gbī eyii gbo pya lo miɔŋɔ a?

• Ena a bee ye yerebah nɛ kɔ a sikɛ̄ ɛrɛ gbo a?

 5. Sīdee edap yii le gbo

 TƐƐ̄NYƆƆ̄

Sɔ̄ i yii le gbo, i doo kɔ bu Jɛhova a ɛɛ sa a dɔnage biī nɛ ili.

Ebip Tɛ̄ma Nyɔɔ

• Ena anua pya gbo i yii kuī loo Jɛhova a?

• Ba mɛɛ na ii le e’yii gbo a?

• Bu mɛ sīdee na o dap yii le gbo a?