Pya ba iya ziī aā ɛrɛ bɛābu kɔ ɛɛbu ba bee ɛrɛ dee ba iya ziī a ebiɛ̄. E a dap biɛ̄. Pya Nɛɛ Kraist ba e’iya ziī bu nyɔɔnyɔɔ sɔ̄ sa aa piiga lo esu zuurabahtɔ̄ a le bu Baibol yere bu dogo emɔna kɔ lo ama dap waɛ.

1. Amunu zuurabahtɔ̄ na Baibol nɛ pya dam a?

Jɛhova etubobaloo dam nua ekobee loo butɔ. (Buū Pya Ɛfɛsɔs 5:23.) Jɛhova gbī kɔ tɛ bee tɔ a biaɛ nu fii bu sīdee edɔ biī nɛ pya ye butɔ. Baibol zuurabahtɔ̄ pya dam kɔ: “Wereaaloo bui wa.” (Pya Ɛfɛsɔs 5:25) Ena lo ama kura ani? Dam a wereloo ye wa aara ye wa bu fɛgɛ bie tɔ le kɛ̄ pya nɛɛ mma. A piiga lo ekpega ye wa, ye kuūdɛɛ̄loo sa doo kɔ a le bu ɛɛbu. (1 Timɔti 5:8) Lo a kuī eera na bee, a yerebah ye nɛ kɔ a ɛrɛ le gbanialoo kiikɛ̄ Jɛhova le. (Matiu 4:4) Bu edoba, a dap gbaaloo ye wa yere kara sa buū Baibol. Sɔ̄ dam kuūdɛɛ̄loo ye wa bu wereloo, a kiisī lo e’ɛrɛ le gbanialoo kumaloo Jɛhova.—Buū 1 Pita 3:7.

2. Amunu zuurabahtɔ̄ na Baibol nɛ pya wa a?

Muɛ̄ Ue Bari kɔ wa “a ɛrɛ enwadɛɛ̄ loo ye dam.” (Pya Ɛfɛsɔs 5:33) Edoo lo ama doodoo wa? A dap kɛɛrɛbu loo pya lele elap ye dam ɛrɛ, le kɛ̄ aa piiga lo ekuūdɛɛ̄loo gbomiɔŋɔ le ɛɛ doo. Wa dapnage nɛ enwadɛɛ̄ ye dam tɛ̄maloo eyerekpotɛ̄ biaɛfii a doo, ye kɔ ue nɛ bu fɛgɛ kere ye dam naale bu kaka.

3. Bu mɛ sīdee na dam le wa dap agɛrɛtɛ̄ wa iya dam le wa a?

Baibol kɔ ue kumaloo pya ba e’iya ziī kɔ: “Baɛ aba elu aba namloo.” (Matiu 19:5) Lo ama kura kɔ ba ɛrɛ ebebeloo ɛrɛgeba nu a gbī ekpoora wa lɛɛloo ziī. Ba doo lo ama tɛ̄maloo e’ɛrɛ sɔ̄ nɛ ziī, sa gbaa kɔnia kɛ̄ nu wa tɔɔ̄loo doo bu sīdee wereloo le loo. Ba naa lɛɛbaloo kɔ lɔgɔ nu ale lɔgɔ nɛɛ a naale Jɛhova a kuī wa loo ee wa dam ale wa wa. Ba nwaɛ̄dɛɛ̄ lokwa ba naa yiiloo lɔgɔ dɔɔ̄na nɛɛ ee kɛ̄ a bɔloo doo.

 NƆ YERELOO

4. Pya dam—wereaaloo bui wa sa ye kuūdɛɛ̄loo

5. Pya wa—wereaaloo bui dam sa ye nɛ enwadɛɛ̄

Baibol yere mɛm loo wa kɔ a nwadɛɛ̄ ye dam, kere a taāŋabah Jɛhova ale a naa taāŋa. Buū 1 Pita 3:1, 2, lɛɛ o agara pya ebip ama:

• Lo o dam naale bu kaka, baɛbaɛ beenyiɛ naale loo kɔ a taɛ a kɔ a taāŋabah Jɛhova. Ena o kɛɛrɛ kɔ edoo kɔ a taāŋabah Jɛhova a, kiisī lo ezue ue ye nɛ aā ziī sɔ̄ yii ziī, sɛh ɛrɛ le elap ye kumaloo sa ye nɛ enwadɛɛ̄ ni? Ena anua a?

Dam le wa dap gbaaloo biaɛ nu fii leere. Kerewo, a ɛrɛ sɔ̄ wa naa wee gbī esu nu ye  dam biaɛfii. Lo a sira doo wo, wa dap kɔ alɛɛ ekɛɛrɛ bu efɛɛloo le enwadɛɛ̄, mɛ wa ɛrɛ eyere nukuādɛɛ̄loo kɔ Jɛhova enɛā ekpo dam lo edoo biaɛfii edɔbiī nɛ ye butɔ. A piiga kumakɛ̄ a dap doo lo eyerekpotɛ̄ biaɛfii ye dam. Lo a doo wo, edoo kɔ wa butɔ a le bu ɛɛbu. Buū 1 Pita 3:3-5, lɛɛ o agara ebip ama:

• Tɔɔ̄loo Jɛhova doodoo wa sɔ̄ wa nɛ enwadɛɛ̄ ye dam?

6. O dap be eebah taāŋa bu o iya dam le wa

 TƐƐ̄NYƆƆ

Dam le wa dap le bu ɛɛbu lo ba wereloo ziī, nɛ enwadɛɛ̄ ziī sa su zuurabahtɔ̄ a le bu Baibol yere bu wa dum.

Ebip Tɛ̄ma Nyɔɔ

• Bu mɛ sīdee na dam edap doo kɔ wa iya dam le wa a le bu ɛɛbu a?

• Bu mɛ sīdee na wa edap doo kɔ wa iya dam le wa a le bu ɛɛbu a?

• Lo o e’iya ale o e’ira, amunu daakuu Baibol na o dap su agɛrɛtɛ̄ o iya dam le wa a?