50 NUENƆ
Bu Mɛ Sīdee Na O Butɔ Dap Le Bu Ɛɛbu A?—2 Gah
Gbomiɔŋɔ lu dɔɔ̄nu a aabah Jɛhova. A gbī kɔ tɛ le ka a kuū wa dɛɛ̄loo leere. Jɛhova enɛa zuurabahtɔ̄ suānu le loo tɛ le ka lokwa ba dap doo lo ama. Ye zuurabahtɔ̄ tɔgɛnage gbomiɔŋɔ nu ba dap doo lokwa butɔ le bu ɛɛbu.
1. Amunu zuurabahtɔ̄ na Jɛhova nɛ pya tɛ le ka a?
Jɛhova gbī kɔ pya tɛ le ka a wereloo pya wa miɔŋɔ sa wa su sɔ̄ tɔ̄ma kpaɛ̄. A gbīnage kɔ pya tɛ le ka a kpega pya wa miɔŋɔ lɛɛloo nu a egbee wa sa wa kpɔā tɛ̄maloo pya daakuu Baibol. (Kam 1:8) A kɔ nɛ pya tɛ kɔ: “Su [pya o miɔŋɔ] leere nɛ nyɔɔ bu zuurabahtɔ̄ . . . Nɛɛ-a-i-ɛrɛ.” (Buū Pya Ɛfɛsɔs 6:4.) Bu Jɛhova ɛɛ sɔ̄ tɛ le ka nyɔɔnɛ ye zuurabahtɔ̄ sɔ̄ ba aa kpɔā pya wa miɔŋɔ, sa ba naa lɛa lo tam bah nɛ dɔɔ̄na nɛɛ.
2. Amunu zuurabahtɔ̄ na Jɛhova nɛ pya miɔŋɔ a?
Jɛhova zuurabahtɔ̄ pya miɔŋɔ kɔ: “Gbānaatɔ̄ ue pya bui tɛ le ka.” (Buū Pya Kɔlɔsi 3:20.) Sɔ̄ pya miɔŋɔ gbaɛ̄tɔ̄loo wa tɛ le ka sa wa nɛ enwadɛɛ̄, ba doo kɔ bu Jɛhova le bu pya wa nɛɛ a ɛɛ. (Kam 23:22-25) Jizɔs bee sere kaāna le edoba sɔ̄ a bee le nwiī. Kere alɛ bee lu nɛɛ a mmana, a bee nɛ enwadɛɛ̄ ye tɛ le ka lo ba naa bee mmana sa wa gbaɛ̄tɔ̄loo.—Luk 2:51, 52.
3. Bu mɛ sīdee na bui dap tɔɔ̄ waɛloo Bari doodoo ziī butɔ a?
Lo o lu tɛ ale ka, bu kaka, o gbī kɔ pya o miɔŋɔ a wereloo Jɛhova dookɛ̄ olo doo. O doo lo ama doodoo wa? Tɛ̄maloo edoo nu Baibol kɔ: “O agɛrɛloo tɔgɛ [ue Jɛhova] pya o miɔŋɔ, sa kɔ nu a wa kiiloo sɔ̄ o le e’ɛŋɛtɛ̄ bu o tɔ, le sɔ̄ o kiā nyɔɔ dee.” (Deuteronomi 6:7) Nu bee ue “tɔgɛ” kura na sɔ̄ alu etɛɛ̄nyɔɔ ziī nu gbɛnɛ-edo sɔ̄. Naadaba o suā kɔ o ɛrɛ ewee tɛɛ̄nyɔɔ ziī nu nɛ pya o miɔŋɔ lokwa ba dap nyɛŋiabu. Nu dɔ kpa kaɛ ama aa kɔ na bee o gbī pya sɔ̄ a bɔloo sa wee tɔgɛ nu akiiloo Jɛhova pya o miɔŋɔ. A lee kɔ dɛ̄dɛɛ̄ nɛɛ a le butɔ a gbaa ɛrɛ enɔānu butɔ ziī ziī kaɛ. Lo a le oo ɛrɛ nwiī, edɔnage biī a nɛ lo o sere sɔ̄ ziī ziī kaɛ sa nɔ Muɛ̄ Ue Bari.
NƆ YERELOO
Nɔ lo esuā pya nu a dap doo kɔ butɔ a le bu ɛɛbu le kpoogaloo.
4. Kpɔā pya o miɔŋɔ bu wereloo
Kpɔā nwiī dap aga. Bu mɛ sīdee na Baibol dap yerebah a? Buū Jemes 1:19, 20, lɛɛ o agara pya ebip ama:
-
Pya tɛ le ka etɔgɛ wereloo loo pya wa miɔŋɔ sɔ̄ ba gaa wa nyɔɔnɛ kɔnia ue doodoo wa?
-
Ena anua a naa lee kɔ tɛ ale ka a su saŋ kāmɛnɛ ye nwiī a? a
5. Kpega pya o miɔŋɔ
Lo ekpega pya o miɔŋɔ, alu ebɛɛ̄ kɔ o kɔ nu akiiloo maniakɛ̄ nɛ ziī ziī aba. Dodoo lo ama dap aga. Bira lo VIDIO, lɛɛ o agara pya ebip a nyɔɔnɛ ama.
-
Ena anua a agabah pio tɛ le ka lo ekɔ nu akiiloo maniakɛ̄ nɛ pya wa miɔŋɔ a?
-
Ena pio tɛ le ka esua daānu sɔ̄ ba aa tɔgɛ nu akiiloo maniakɛ̄ pya wa miɔŋɔ a?
Dookɛ̄ e bee lu ekɔ serekɛ̄ doo, nyɔuwe Setan aa agɛrɛbah bee piya. Buū 2 Timɔti 3:1, 13, lɛɛ o agara ebip ama:
-
Pio pya piya nɛɛ alu ekɔ nu akiiloo bu ye 13 barakpaɛ̄ wee gbee gbomiɔŋɔ. Nyɔɔwo, ena anua alu nu a kuī kɔ pya tɛ le ka a tɔgɛ nu akiiloo maniakɛ̄ pya wa miɔŋɔ, le kɛ̄ ba edap kpega wa loo lɛɛ loo pya a wee gbee nɛɛ ama doo a?
O suāge ni?
Pya Ekeebee Jɛhova e’ɛma gbɛnɛ-edo kpa a yerebah nɛ pya tɛ le ka lo etɔgɛ nu akiiloo maniakɛ̄ pya wa miɔŋɔ, sa wa kpega lɛɛloo pya a wee gbee gbomiɔŋɔ. Bu edoba, ɛp:
-
Kpega Pya O Miɔŋɔ (vidio)
-
“Tɔgɛ O Nwiī Nu Akiiloo Maniakɛ̄” (Awake! No. 5 2016)
6. Nwadɛɛ̄ o tɛ le o ka
Pya gbagbara nwiī le pya zege dap nɛ enwadɛɛ̄ wa tɛ le ka tɛ̄maloo kɛ̄ ba wa kɔ ue nɛ doo. Bira lo VIDIO, lɛɛ o agara pya ebip a nyɔɔnɛ ama.
-
Ena anua biī le bu sɔ̄ nwiī kɔ ue nɛ ye tɛ le ka bu enwadɛɛ̄ a?
-
Bu mɛ sīdee na nɛɛ a le zege edap tɔgɛ kɔ a nɛ enwadɛɛ̄ ye tɛ le ye ka bu kɛ̄ a wa kɔ ue nɛ doo a?
Buū Kam 1:8, lɛɛ o agara ebip ama:
-
Nɛɛ a le zege edoo dogo doodoo wa sɔ̄ ye tɛ le ka kɔ nu edoo ye nɛ a?
7. Gbaaraa taāŋabah Jɛhova doodoo ziī butɔ
Pya butɔ Pya Ekeebee Jɛhova wee sere sɔ̄ ba egbaa ɛā enɔānu butɔ bu ziī ziī kaɛ. Enɔānu butɔ ama dap mɛā doodoo wa? Bira lo VIDIO, lɛɛ o agara pya ebip a nyɔɔnɛ ama.
-
Bu mɛ sīdee na ziī butɔ dap ɛrɛ enɔānu butɔ eree sɔ̄ loo a?
-
Ena tɛ le ka dap doo lo edoo kɔ enɔānu butɔ a kiisī leere sa kpeloo a?—Ɛp foto a le bɔātɛ̄ nuenɔ ama.
-
Ena a dap doo kɔ a agabah pya o butɔ lo egbaa ɛrɛ enɔānu butɔ a?
Bu Izrɛl a dee kere a, Jɛhova bee gbī kɔ pya butɔ a gbaa kɔnia nu a le bu Kpa Kaɛ eree sɔ̄ loo. Buū Deuteronomi 6:6, 7, lɛɛ o agara ebip ama:
-
O dap su zuurabahtɔ̄ ama yere bu dogo doodoo wa?
Keekee nu edoo bu enɔānu butɔ:
-
Kpɛ̄naloo loo enɔānu bu bɔŋanaloo.
-
Buū sa nyɔɔnɛ pya o butɔ kɔnia ziī e’ɛma a le bu Baibol lo ekpe wa loo.
-
Lo pya o miɔŋɔ lege etera, kuɛ̄ nu edoo a le nɛ pya miɔŋɔ aā nyɔɔ jw.org.
-
Lo pya o miɔŋɔ eyera lop zua, nyɔɔnɛ wa kɔnia ekobee ue a le nɛ miɔŋɔ ba elua lop le taa mmɛ lop le ɛrɛnia zua a le nyɔɔ jw.org.
-
Pya o miɔŋɔ le ɔɔ gbaaraa bira ziī eloh a le bu Baibol.
-
Gbaaraa si ee sa kɔnia ue nyɔɔ ziī vidio a le nyɔɔ jw.org.
PIO NƐƐ KƆ: “Baibol agabah pya miɔŋɔ edābeeloo.”
-
Ena olo kɛɛrɛ a?
TƐƐ̄NYƆƆ
Jɛhova gbī kɔ pya tɛ le ka a wereloo, kpɔā, sa kpega pya wa miɔŋɔ. A gbī kɔ pya gbomiɔŋɔ a gbaɛ̄tɔ̄loo wa tɛ le ka sa wa nɛ enwadɛɛ̄; le kɔ pya butɔ a gbaa ɛrɛ enɔānu butɔ.
Ebip Tɛ̄ma Nyɔɔ
-
Bu mɛ sīdee na pya tɛ le ka dap kpɔā pya wa miɔŋɔ sa wa kpega a?
-
Mɛ sīdee na gbomiɔŋɔ dap nɛ enwadɛɛ̄ wa tɛ le ka a?
-
Pya amunu biī na a le bu sɔ̄ alu esere sɔ̄ bu ziī ziī kaɛ ɛā enɔānu butɔ a?
GBĪTƐ̄ NU
Pya amunu nuenɔ na edap kpɛ̄naloo o nwiī bɛma sɔ̄ enyim tura nɛɛ a?
Nɔ zuurabahtɔ̄ Baibol nɛ pya aa kuūdɛɛ̄loo pya wa tɛ le ka a e’ana.
“Ena Baibol Kɔ Akiiloo Kuūdɛɛ̄loo I Tɛ Le I Ka Ba E’ana Ani?” (Ekobee ue a le nyɔɔ intanɛt)
Muɛ kɛ̄ ziī gbara lo a naa bee suā kɛ̄ ekpɔā pya ye miɔŋɔ doo bee sikɛ̄ kiisī leere doo.
Buū nu akiiloo kɛ̄ pya tɛ dap agɛrɛtɛ̄ gbanialoo ba ɛrɛ loo pya wa miɔŋɔ nɛɛdam doo.
“Bu Mɛ Sīdee Na Pya Tɛ Dap Tɔɔ̄ Waɛloo Pya Wa Miɔŋɔ Nɛɛdam A?” (The Watchtower, November 1, 2011)
