Jɛhova lu “Bari ɛɛbu.” (1 Timɔti 1:11, NWT) A gbī kɔ i ɛrɛ ɛɛbu sa ɛrɛ ekpeloo loo dum. A nia ye sɔ̄ i su sɔ̄ aāloo i tam sa seea. Bu ekobee ue ama, i muɛ kɛ̄ i dap su i sɔ̄ seseea daānu bu sīdee ekpe i loo, i nɛ iīnaloo sa nianage Jɛhova doo.

1. Ena i nyɛŋiabu sɔ̄ i gaa sagɛ sīdee ɛrɛ ekpeloo a?

Ena a wee a nia edoo sɔ̄ o gaa seea a? Wee nia pio nɛɛ esu wa sɔ̄ seea tɔma tɔ sa buū kpa, gbaɛ̄ma tɔ̄loo yɔɔ, ɛp fim, ale si nyɔɔ intanɛt. Wee nia pya dɔɔ̄na etɔɔ̄ kpaɛ̄ pya wa gbo sa wa nyɔɔnɛ bira bii laɛgɛloo, yɔb maā, ale bira game. Ɛrɛgeba sīdee ɛrɛ ekpeloo a i nia, i ɛrɛ emuɛ kɔ alu lo “a enia Nɛɛ-a-i-ɛrɛ.” (Pya Ɛfɛsɔs 5:10) Alu ebɛɛ̄ kɔ i dābeeloo lo ama nyɔnɛbee pya sīdee ɛrɛ ekpeloo a le anii’ee tɔgɛ pya nu Jɛhova baaloo doodoo dogo lumiī, kunagā le doo yɔ. (Buū Le-yɔɔ 11:5.) Ena eyerebah i nɛ kɔ i dap sagɛ kaāna sīdee ɛrɛ ekpeloo a?

Lo i yii gbo pya nɛɛ a wereloo Jɛhova, ba eyerebah i nɛ kɔ i doo nu a lee le kɔ i biaɛ nu fii leere kiiloo sīdee ɛrɛ ekpeloo i doo. Dookɛ̄ i bee nɔ doo bu ekobee ue i aa a, “nɛɛ a nyɔɔnɛ pya suānu kiā gaa le suā nu.” Mɛ lo i yii gbo pya a naa wereloo daakuu Jɛhova, i “ɛrɛ muɛ pɔrɔ.”—Kam 13:20.

2. Ena anua alu ebɛɛ̄ kɔ i nwaɛ̄dɛɛ̄ loo kuma sɔ̄ i su ɛā ekpeloo a?

Kere sīdee ɛrɛ ekpeloo i sagɛ lu lo a lee, alu ebɛɛ̄ kɔ i nwaɛ̄dɛɛ̄ lokwa ii su gbɛnɛkpo sɔ̄ daā. Lo ii doo wo, ii le emuɛ sɔ̄ edaā pya nu a kuī eera. Baibol yere i mɛm loo kɔ i su i “sɔ̄ leere.”—Buū Pya Ɛfɛsɔs 5:15, 16.

 4. Su o sɔ̄ daānu leere

Bira lo VIDIO, lɛɛ o agara ebip a nyɔɔnɛ ama.

5. Sagɛ sīdee ɛrɛ ekpeloo a lee

Kere pio sīdee ɛrɛ ekpeloo naa nia Jɛhova, a ɛrɛ pya nu ɛā ekpeloo a naa bɛā ye. Buū Eklisiastis 8:15 le Pya Filipai 4:8, lɛɛ o agara ebip ama:

• Amunu sīdee ɛrɛ ekpeloo na a wee a kpeloo a?

 TƐƐ̄NYƆƆ

Jɛhova gbī kɔ i ɛrɛ ekpeloo bu sīdee a lee.

Ebip Tɛ̄ma Nyɔɔ

• Amunu sīdee ɛrɛ ekpeloo na Pya Nɛɛ Kraist ekpooraloo lɛɛ loo a?

• Ena anua i nwaɛ̄dɛɛ̄ loo kuma sɔ̄ i su ɛā ekpeloo a?

• Ena anua o gbī esagɛ pya nu ɛā ekpeloo a nia Jɛhova a?