55 NUENƆ
Yerekpotɛ̄ O Bɔŋanaloo
Gbɛnɛ-edo miliɔn pya nɛɛ aa su ɛɛbu taāŋabah Jɛhova bu booboo bɔŋanaloo a le tɛɛ̄ ɛŋɛnɛ nyɔuwe. Ba tɔgɛ nia loo zuurabahtɔ̄ le leredeebah alu enɛ wa, e ba kpɛ̄naloo eyerekpotɛ̄ wa bɔŋanaloo bu gbɛnɛ-edo sīdee. Lege kɛ̄ o gbī edoo nɛ o bɔŋanaloo lo ni?
1. Pio pya amunu sīdee na o dap su o sɔ̄ le mɛm yeākpotɛ̄ o bɔŋanaloo a?
Dɛ̄dɛɛ̄ ii ɛrɛ nu i dap doo bu bɔŋanaloo. Bu edoba, ekɔ pya nama nɛɛ ale pya a ɛrɛ boh le bu o bɔŋanaloo ni? O dapge wa yerebah nɛ kɔ ba a si enɔānu ni? Ale o dapge yerebah bu pio pya dɔɔ̄na sīdee doodoo si kɛ̄du wa nɛ ale yerebah loo tam tɔ wa nɛ ni? (Buū Jemes 1:27.) I dapnage su loo nɛ lo ekwaloo i Tɔ Nɔnu Buɛ̄-mɛnɛ sa doo kɔ a bia ɛɛ. Lɔgɔ nɛɛ naa wee i su bah ekpo aā kɔ i doo pya nu ama. Wereloo i ɛrɛ loo Bari le loo pya i wuga nɛɛdam le nɛɛwa zū i kɔ i “su loo [i] nɛ bu yɔrɔ.”—Le-yɔɔ 110:3.
A ɛrɛ pya dɔɔ̄na sīdee lo Pya Ekeebee ba eliamaā dap yerekpotɛ̄ wa bɔŋanaloo. Pya wuga nɛɛdam a nyim tura dap si tam doodoo pya yerebahtam ale pya kanɛɛ. Pya wuga nɛɛdam le nɛɛwa dap su mɛm yeākpotɛ̄ tam zue le yereue tɛ̄maloo eyii bu tam sɛmdee. Pio Pya Ekeebee dapnage yerebah lo ewu pya tɔ etɔɔ̄ taāŋabah Bari, ale tɛ̄maloo ekii bɔŋanaloo a le kɛ̄ ebɛɛ̄ le lo eyerebah wa nɛ.
2. Bu mɛ sīdee na i dap su i kpugi le pya nu i ɛrɛ yeākpotɛ̄ bɔŋanaloo a?
I dap “nwadɛɛ̄ Jɛhova tɛ̄maloo nu [i] ɛrɛ.” (Kam 3:9) I ɛp nua dee a i kpaā nɛ lo etura i kpugi le pya dɔɔ̄na nu i ɛrɛ lo eyeākpotɛ̄ i bɔŋanaloo le tam zue ue a gaa kiisī tɛɛ̄ ɛŋɛnɛ nyɔuwe. (Buū 2 Pya Kɔrint 9:7.) Pya nu i tura lunage esu yeābah nɛ pya i wuga bugia siranu siraloo. Gbɛnɛ-edo nɛɛ nɔɔ̄ “sa kpoogeloo” nu ba ewee tura aā ziī sɔ̄ yii ziī. (Buū 1 Pya Kɔrint 16:2.) I dap su pya nu i tura ama yerebu ekpo lɛra nu yerebu a wee le pya i kɛ̄ etɔɔ̄ taāŋabah, ale nyɔɔ intanɛt bie kɛ̄ a kura donate.pr418.com. Jɛhova nɛ i dee kɔ i tɔgɛ dua wereloo i ye ɛrɛ kumaloo tɛ̄maloo kɛ̄ i sagɛ lo esu i zɔ le i kpugi daānu doo.
NƆ YERELOO
Naa ɛp pio sīdee o dap yerekpotɛ̄ o bɔŋanaloo.
3. I dap su nu i ɛrɛ daānu leere
Jɛhova wereloo nɛɛ a su ɛɛbu nɛa, e kɛ̄ Jizɔs doonage lo. Bu edoba, Jizɔs bee kaɛgɛ ziī wa ye dam e’ua a bee lu kporo sa naa bee ɛrɛ gbɛnɛkpo kpugi, kerewo a bee dɔɔ̄nage nu a ɛrɛ nɛ Jɛhova. Buū Luk 21:1-4, lɛɛ o agara pya ebip ama:
-
A luge ebɛɛ̄ kɔ kpugi i tura a kuīkpo lɛɛ a enia Jɛhova ni?
-
Pya nu i tura aābu nyiɛ i tɔɔ̄loo Jɛhova le Jizɔs doodoo wa?
Lo esuā kɛ̄ alu esu pya nu i tura daānu doo, bira lo VIDIO. Lɛɛ o agara ebip a nyɔɔnɛ ama.
-
Bu mɛ sīdee na a wee lu esu pya nu i tura daānu lokwa a dɔbiī nɛ pya i wuga a le tɛɛ̄ ɛŋɛnɛ nyɔuwe a?
4. I dap su loo nɛ lo eyerebah
Bu sɔ̄ a bee lu e’ɛm Baibol, pya a gaa bee taāŋabah Jɛhova wee su mɛm siātam lo ekuūdɛɛ̄loo pya wa kɛ̄ etɔɔ̄ taāŋabah Bari. Kerewo, lo ama naale aba tura kpugi lɛabah. Buū 2 Nu a bee lu edoo 34:9-11, lɛɛ o agara ebip ama:
-
Bu mɛ sīdee na dɛ̄dɛɛ̄ pya Izrɛl bee yerebah lo ekuūdɛɛ̄loo tɔ Jɛhova ale wa kɛ̄ etɔɔ̄ taāŋabah Bari a?
Lo emuɛ kɛ̄ Pya Ekeebee Jɛhova aa nyɔɔnɛ edoba a bee lu esere kɛ̄ bu Baibol doo, bira lo VIDIO. Lɛɛ o agara pya ebip a nyɔɔnɛ ama.
-
Ena anua alu nu a kuī lo edoo kɔ i Tɔ Nɔnu Buɛ̄-mɛnɛ a tɔɔ̄ ɛɛ sa le le a?
-
Pio amunu sīdee na olo dap yerebah a?
5. Pya wuga nɛɛdam dap nyim tura lokwa ba dap doo gbɛnɛ-edo nu bu bɔŋanaloo
Baibol yere mɛm loo pya nɛɛdam ba lu Pya Nɛɛ Kraist kɔ ba a nyim tura esiatam bu bɔŋanaloo. Lo emuɛ edoba kɛ̄ edoo lo ama doo, bira lo VIDIO. Lɛɛ o agara ebip a nyɔɔnɛ ama.
-
Bu lo vidio, mɛ sīdee na Ryan bee nyim tura lokwa a dap yerekpotɛ̄ bɔŋanaloo a?
Baibol baatɛ̄ pya nu alu e’ɛmadɛɛ̄ aābah pya wuga nɛɛdam lokwa ba dap nyim tura lo esitam doodoo pya yerebahtam le pya kanɛɛ. Buū 1 Timɔti 3:1-13, lɛɛ o agara pya ebip ama:
-
Ena alu e’ɛmadɛɛ̄ aābah pya wuga nɛɛdam a nyim tura lokwa ba dap si tam doodoo pya yerebahtam le pya kanɛɛ a?
-
Ena alu e’ɛmadɛɛ̄ aābah pya wa butɔ a?—Ɛp 4 le 11 barakpaɛ̄.
-
Sɔ̄ pya wuga nɛɛdam piiga lo enyim tura pya nu alu e’ɛmadɛɛ̄ wa aābah, edɔbiī nɛ dɛ̄dɛɛ̄ nɛɛ a le bu bɔŋanaloo doodoo wa?
ZIĪ NƐƐ DAP BIP KƆ: “Mɛ kɛ̄ na Pya Ekeebee Jɛhova wee aā kpugi ba su siā wa tam a?”
-
O agara doodoo wa?
TƐƐ̄NYƆƆ
Jɛhova tɔgɛ kaāna nia loo i epiaga lo eyerekpotɛ̄ bɔŋanaloo tɛ̄maloo i sɔ̄, i mɛm, le pya nu i ɛrɛ.
Ebip Tɛ̄ma Nyɔɔ
-
Bu mɛ sīdee na i dap su i sɔ̄ le i mɛm yeākpotɛ̄ bɔŋanaloo a?
-
Bu mɛ sīdee na i dap su pya i zɔ yeākpotɛ̄ bɔŋanaloo a?
-
Bu pya amunu sīdee na enia a eyerekpotɛ̄ bɔŋanaloo a?
GBĪTƐ̄ NU
Muɛ nu anua Bari naa gbīna kɔ pya a ye taāŋabah a kpɛ ziī nyɔɔ lop.
“Ena Baibol Kɔ Akiiloo Kpɛ Ziī Nyɔɔ Lop A?” (Ekobee ue a le nyɔɔ intanɛt)
Suā nu “nyim tura esiatam” bu bɔŋanaloo kura.
“Dādābeeloo Ekpo Pya Kanɛɛ Ɛrɛ Bu Bɔŋanaloo” (Tɔ Baɛloo, Baɛ Enɔɔ̄ 2021)
Muɛ kɛ̄ pio Pya Ekeebee alu pya nɛɛdam a ɛrɛ e’agaloo su loo nɛ lo eyere kpa ma pya wa wuga bu yira doo.
Gbītɛ̄ kɛ̄ i wee tɛɛ̄ doo ɛrɛ kpugi i siā pya i tam lo alu kee loo kɛ̄ pya dɔɔ̄na yigabari wee doo.
“Mɛ̄ Kɛ̄ Na Pya Ekeebee Jɛhova Wee Aā Kpugi Ba Su Siā Wa Tam A?” (Ekobee ue a le nyɔɔ intanɛt)
