Sɔ̄ i le yɛɛ pya wuga bu bɔŋanaloo, a tɔɔ̄ i loo dookɛ̄ a bee tɔɔ̄ loo Mɛnɛ Devid doo sɔ̄ a kɔ: “Ɛp kɛ̄ a lee sa kpenage doo sɔ̄ pya wuga tɔɔ̄ bu kumaloo loo ziī!” (Le-yɔɔ 133:1) I gbaaloo naa aadee bugia le. Ziī ziī ii ɛrɛ edoo nu edoo kɔ gbaaloo a le.

1. Ena alu emuɛ yɛɛ pya nɛɛ Bari ani?

Lo o si enɔānu bie dɔɔ̄na barasī, dap a agabah edābeeloo muɛ̄ ue ba kɔ, mɛ elu ewere a loo kaāna sa loo a esukɛ̄. Ena anua a? Nyɔɔbee i gbaa nɔ aba kpa a dɛɛa nyɔɔ Baibol. E i piiga lo etɔgɛ wereloo kumaloo ɛnia ii. Kaɛlɛɛ kɛ̄ i tɔɔ̄, dɛ̄dɛɛ̄ ii “kue bee Jɛhova sa ye si tam nɛ bu aba beenyiɛ.”—Zefania 3:9.

2. Ena o dap doo lo enyimɛ gbaaloo ani?

“Wereaaloo ɛnia bui agɛrɛ aā bu beenyiɛ.” (1 Pita 1:22) O su zuurabahtɔ̄ ama yerebu dogo doodoo wa? Taā alu kɔ o bie ekɛɛrɛ nyɔɔ kɛ̄ pya dɔɔ̄na naa doo leere, gbī pya le elap dogo ba ɛrɛ. Taā o yii gbo aba pya nɛɛ a wee doo nu a a nia, piiga lo esuāloo pya wuga nɛɛdam le nɛɛwa ba aa keekee barasī. I piiganage lo elɛa baaloo bu i.—Buū 1 Pita 2:17. a

3. Ena o doo sɔ̄ ziī o wuga bu bɔŋanaloo Kraist le ɔɔ ɛrɛ taāŋa ani?

Ii mmana, kerewo i tɔɔ̄ bu gbaaloo. Pio sɔ̄ i lɔgara ɛnia ii ale i doo piya nu loo ziī. Nu anua lo sa Muɛ̄ Ue Bari kɔ i nɛ kɔ “suaa esaɛ̄ beenyiɛ lɛɛbaloo nɛ ɛrɛgeba nɛɛ,” a kɔ gbaāloo kɔ: “Dookɛ̄ Nɛɛ-a-i-ɛrɛ su esaɛ̄ i lɛɛmabaloo nɛ doo, bɔɔlo bui doonage wo.” (Buū Pya Kɔlɔsi 3:13.) I edoora piya nu loo Jɛhova gbɛnɛ-edo sɔ̄, kerewo a aaloo i nɛ. Nyɔɔwo, a gbī kɔ i aaloo pɔrɔ nɛ pya i wuga. Lo o suā kɔ o edora piya nu loo ziī nɛɛ, dasī gbī kɛ̄ edoo sere efɛɛloo.—Buū Matiu 5:23, 24. b

 NƆ YERELOO

4. Waa ɛp sī nɛɛ

I gbī ewereloo dɛ̄dɛɛ̄ pya i wuga. Mɛ a dap i agabah eyii loo nɛɛ a aa dɔɔ̄na barasī. Ena edap i yerebah nɛ a? Buū Doonu pya Nɛɛ lɛɛratam 10:34, 35, lɛɛ o agara pya ebip ama:

• Jɛhova su dɛ̄dɛɛ̄ nɛɛ a aa keekee kɛ̄ nua pya ye Ekeebee. Mɛ sīdee na lo ama e’ɛrɛ pah nyɔɔ kɛ̄ olo ɛp pya nɛɛ a aa dɔɔ̄na barasī doo ani?

• Mɛ dua ɛp sī nɛɛ na a boakɛ̄ barasī o tɔɔ̄ lo o gbī ekpooraloo aaloo ani?

Buū 2 Pya Kɔrint 6:11-13, lɛɛ o agara ebip ama:

• O kɛɛrɛ kɔ o dabe tɔɔ̄ waɛloo pya wuga nɛɛdam le nɛɛwa ba aa keekee barasī doodoo wa?

5. Aaloo nɛ aābu nyiɛ a sa sere efɛɛloo

Jɛhova su esaɛ̄ beenyiɛ i lɛmabaloo nɛ kereadoo a naa lu ebɛɛ̄ kɔ ili i aaloo ye nɛ. Buū Le-yɔɔ 86:5, lɛɛ o agara pya ebip ama:

• Kɛ̄ Jɛhova aaloo pɔrɔ doo lu gbɛnɛ doodoo wa?

• Ena anua kɛ̄ a aaloo pɔrɔ doo nia a a?

• Ena a dap doo kɔ a aga i bah enyɔɔnɛ pya dɔɔ̄na tɔɔ̄ bu efɛɛloo le gbaaloo a?

Bu mɛ sīdee na i dap nɔ Jɛhova sa nyɔɔnɛ pya i wuga nɛɛdam le nɛɛwa tɔɔ̄ bu gbaaloo ani? Buū Kam 19:11, lɛɛ o agara ebip ama:

• Sɔ̄ ziī nɛɛ a biirebu ale a doo a piya nu loo, ena o doo lo ekwa lo kɛ̄tɔɔ̄ a?

 Siga sɔ̄ i doo nu a biirebu pya dɔɔ̄na. Sɔ̄ a sira doo wo, ena i doo a? Bira lo VIDIO, Lɛɛ o agara ebip a nyɔɔnɛ ama.

• Bu vidio ama, ena lo wuga nɛɛwa doo lo esere efɛɛloo a?

 TƐƐ̄NYƆƆ

O dap nyimɛ gbaaloo bu bɔŋanaloo tɛ̄maloo elu nɛɛ a aaloo pɔrɔ le tɔtɔgɛ wereloo kumaloo dɛ̄dɛɛ̄ pya o wuga nɛɛdam le nɛɛwa.

Ebip Tɛ̄ma Nyɔɔ

• O dap doodoo wa lu nɛɛ a naa ɛp sī nɛɛ ni?

• Ena o doo lo ziī o wuga bu bɔŋanaloo le ɔɔ ɛrɛ taāŋa a?

• Ena anua o gbī enɔ kɛ̄ Jɛhova aaloo pɔrɔ nɛ pya dɔɔ̄na doo a?