59 NUENƆ
O Dap Egerebu Kɛ̄bah Tɛ̄ŋaloo
Sɔ̄ sɔ̄ naa binia, aa le lu etɛ̄ŋaloo dɛ̄dɛɛ̄ Pya Nɛɛ Kraist sa wa gbānasī. Ekɔ lo ama edooge kɔ bɔɔ a aa i ni?
1. Ena anua i ɛmadɛɛ̄ tɛ̄ŋaloo a?
Baibol kɔ i nɛ kɔ: “Elu etɛ̄ŋaloo dɛ̄dɛɛ̄ pya a gbī etɔɔ̄ dum enwadɛɛ̄ Bari bu Kraist Jizɔs.” (2 Timɔti 3:12) Bee lu etɛ̄ŋaloo Jizɔs nyɔɔbee a naa bee nuūna nyɔuwe Setan. Ili ii nuūna nage nyɔuwe ama, nyɔɔwo a naa lu i nyɛŋia loo sɔ̄ pya a gaa bɛɛ le pya tɔbari i tɛ̄ŋaloo.—Jɔn 15:18, 19.
2. Mɛ sīdee na i dap kpɛ̄naloo baɛ tɛ̄ŋaloo a?
Alu ebɛɛ̄ kɔ i agɛrɛtɛ̄ kɛ̄ i dɛrɛ nyiɛ nyɔɔ Jɛhova doo anyaawo. Sere sɔ̄ esu yeā kara sa buū ziī dɔ a le bu ye Muɛ̄ Ue dɛ̄dɛɛ̄ dee. Si enɔānu bu bɔŋanaloo eree sɔ̄ loo. Pya nu ama enɛ a mɛm a a bɛɛ̄ lokwa o dap su e’agaloo beā eebah tɛ̄ŋaloo, kere a aabah pya o butɔ. Nɛɛ lɛɛratam Pɔɔl a bee lu etɛ̄ŋaloo gbɛnɛ-edo sɔ̄ bee ɛm kɔ: “[Jɛhova] na mdaa nɛɛ yerebah a, bɔɔ naale e’aa mɛ.”—Pya Hibru 13:6.
I dapnage ɛrɛ e’agaloo tɛ̄maloo ezue ue dɛ̄dɛɛ̄ sɔ̄. Zue ue yerebah i nɛ kɔ i dɛrɛ nyiɛ nyɔɔ Jɛhova sa ɔbɛ e’ɛrɛ bɔɔ loo nɛɛ. (Kam 29:25) Lo o su e’agaloo zuema ue anyaawo, ewaɛ a bah ezue ue kere pya bɛbɛɛ kpaɛ̄ i tam.—1 Pya Tɛsalɔnaika 2:2.
3. Tɔɔ̄ agara nɛ Jɛhova kɛ̄bah tɛ̄ŋaloo dɔbiī i nɛ doodoo wa?
Bu kaka, naa nia i sɔ̄ alu etɛ̄ŋa i loo, sɔ̄ i egerebu tɛ̄ŋaloo sa kiisī leere, i yira e’agaloo. Sɔ̄ loo i ɔ, Jɛhova yerebah i nɛ, e lo ama doo kɔ i agɛrɛbah ye tɔɔ̄ waɛloo. (Buū Jemes 1:2-4.) A kiɛ̄ Jɛhova sɔ̄ a muɛ kɔ i gaa tɔga, mɛ bu ye ɛɛ sɔ̄ a muɛ kɔ i egerebu. Baibol kɔ: “Lo a le sɔ̄ bui doo le sa bui muɛ pɔrɔ nyɔɔ bui su egerebu suā bui ɛrɛ ka a aa bah Bari.” (1 Pita 2:20) Ekpɛanu Jɛhova enɛ dɛ̄dɛɛ̄ pya a egerebu bu bɔloo ture nyiɛ loo na dum a naatah bu nyɔuwe a naale elu etɛ̄ŋaloo pya a taāŋabah Bari bu kaka sīdee.—Matiu 24:13.
NƆ YERELOO
Nɔ nu anua a waɛ lo etɔɔ̄ agara nɛ Jɛhova kaɛlɛɛ tɛ̄ŋaloo le kɛ̄ alɛ enɛ i ekpɛanu doo.
4. O dap egerebu gbānasī a aa butɔ
Jizɔs bee suā leere kɔ pio pya i butɔ naale egbī kɔ i taāŋabah Jɛhova. Buū Matiu 10:34-36, lɛɛ o agara ebip ama:
-
Ena a dap sira lo a le ziī nɛɛ a le butɔ biaɛfii lo etaāŋabah Jɛhova a?
Lo emuɛ ziī edoba a tɔgɛ lo ama, bira lo VIDIO, lɛɛ o agara ebip a nyɔɔnɛ ama.
-
Ena o doo lo a le ziī nɛɛ bu o tɔ ale o gbo gbī e’ɔbɛ a lɛɛ loo etaāŋabah Jɛhova a?
Buū Le-yɔɔ 27:10 le Maak 10:29, 30. Sɔ̄ o ebūna ziī ziī dɔ kpa kaɛ ama sah, agara ebip ama:
-
Yii ama eyerebah a nɛ doodoo wa lo a le pya o butɔ ale pya o gbo gbāna a sī?
5. Kiisī lo etaāŋabah Jɛhova kaɛlɛɛ tɛ̄ŋaloo
A gbī e’agaloo lo etaāŋabah Jɛhova sɔ̄ pya dɔɔ̄na gbī e’ɔbɛ i lɛɛloo edoo wo. Bira lo VIDIO, lɛɛ o agara ebip a nyɔɔnɛ ama.
-
E a le bu vidio ama na a a yere mɛm loo a?
Buū Doonu pya Nɛɛ lɛɛratam 5:27-29 le Pya Hibru 10:24, 25. Sɔ̄ o ebūna ziī ziī dɔ kpa kaɛ ama sah, agara ebip ama:
-
Ena anua alu ebɛɛ̄ kɔ i kiisī lo etaāŋabah Jɛhova kere alu ekpaɛ̄ i tam zue ue ale alu ekpaɛ̄ i lɛɛ loo esi enɔānu a?
6. Jɛhova eyerebah a nɛ kɔ o egerebu
Pya Ekeebee Jɛhova ba le zege ale ba e’ana lo ba aa keekee barasī a le bu nyɔuwe ekirasī lo etɔɔ̄ agara sa taāŋabah Jɛhova kere alu etɛ̄ŋa wa loo. Lo emuɛ nu a wa yerebah nɛ, bira lo VIDIO. lɛɛ o agara ebip a nyɔɔnɛ ama.
-
Ena a yerebah nɛ Pya Ekeebee a le bu lo vidio kɔ ba a egerebu a?
Buū Pya Rom 8:35, 37-39 le Pya Filipai 4:13. Sɔ̄ o ebūna ziī ziī dɔ kpa kaɛ ama sah, agara ebip ama:
-
Bu mɛ sīdee na dɔ kpa kaɛ ama doo kɔ o suā leere kɔ o dabe egerebu ɛrɛgeba doā-ɛp a?
Buū Matiu 5:10-12, lɛɛ o agara ebip ama:
-
Ena anua o dap ɛrɛ ɛɛbu kaɛlɛɛ tɛ̄ŋaloo a?
Gbɛnɛ-edo pya zooro Jɛhova ekirasī lo etaāŋa ye bah bu bɔ ture nyiɛ loo kaɛlɛɛ gbānasī. Olo dapnage doo wo!
PIO NƐƐ KƆ: “Mm le edap egerebu kɛ̄bah tɛ̄ŋaloo.”
-
Pya amunu dɔ kpa kaɛ na edap wa yerebah nɛ kɔ ba a egerebu a?
TƐƐ̄NYƆƆ
Jɛhova tɔgɛ nia loo kɛ̄ i piiga lo esitam ye nɛ doo kaɛlɛɛ tɛ̄ŋaloo. Tɛ̄maloo ye yerebah, i dap kiisī lo e’egerebu!
Ebip Tɛ̄ma Nyɔɔ
-
Ena anua Pya Nɛɛ Kraist e’ɛmadɛɛ̄ tɛ̄ŋaloo a?
-
Ena o dap doo anyaawo lo ekpɛ̄naloo baɛ tɛ̄ŋaloo a?
-
Ena eyerebah a nɛ kɔ o suā leere kɔ o dabe taāŋabah Jɛhova kaɛlɛɛ ɛrɛgeba doā-ɛp o kpesī a?
GBĪTƐ̄ NU
Ɛp kɛ̄ ziī wuga nɛɛdam baatɛ̄ kɛ̄ Jɛhova bee ye yerebah nɛ kɔ a egerebu sɔ̄ a bee lu eyere ye kpɔgɔrɔ nyɔɔ tɔɔ̄ kee doo.
Muɛ nu a bee yerebah nɛ ziī dam le wa kɔ ba a taāŋabah Jɛhova bu bɔloo ture nyiɛ loo bu gbɛnɛ-edo zua kaɛlɛɛ gbanasī.
Nɔ kɛ̄ o dap ɛrɛ e’agaloo sɔ̄ o waa kpesī tɛ̄ŋaloo doo.
“Kpɛ̄naloo Anyaawo Baɛ Tɛ̄ŋaloo” (Tɔ Baɛloo Ɛrɛba Enɔɔ̄ 2019)
I ɛp gbānasī a aa butɔ doodoo wa, e ena i doo lo esere efɛɛloo sa bianage bu bɔloo ture nyiɛ loo nɛ Jɛhova a?
“Kaka Ue Nua ‘Gɛ̄nɔ̄, Naale Efɛɛloo’” (The Watchtower, October 2017)
