1-3. (a) E na anua ka wee kwaloo ye nwīgbagbara nwiī ɛɛrɛ ani? (b) E na anua Jɛhova gbī kɔ pya ye nɛɛ a tɔɔ̄ ɛɛ a?

NAA kɛɛrɛ bu ka a wereloo ye nwiī a gaa ye kwaloo lɛɛ lo nwiī gae kii tɔkpa. A bire ye maā sa muɛ̄ kɔ bɛloo a ye yere loo ɛɛ sa biaɛ naa le bu. Lo ama doo kɔ lo nwiī a le bu nwanaloo sa a tɔgɛ kɔ ye tɛ le ye ka gaa ye kuūdɛɛ̄loo.

² I Tɛ Jɛhova gbī kɔ i le ɛɛ sa loga. (Le-yɔɔ 18:26) A suā kɔ tɔɔ̄ ɛɛ edɔbiī i nɛ. E sɔ̄ i le ɛɛ, i su  ka nua loo Jɛhova.—Ezekiel 36:22; buū 1 Pita 2:12.

³ E na a kura tɔɔ̄ ɛɛ a? E tɔɔ̄ ɛɛ lee i loo doodoo wa? Sɔ̄ i gaa ɛp ture ebip ama, i dap muɛ̄ pio nyaa alu ebɛɛ̄ kɔ i doo bu i loo.

4, 5. (a) E na anua alu ebɛɛ̄ kɔ i tɔɔ̄ ɛɛ a? (b) E na pya nu alu edɛm i tɔgɛ akiiloo kɛ̄ Jɛhova ɛmadɛɛ̄ tɔɔ̄ ɛɛ doo a?

⁴ I nɔ etɔɔ̄ ɛɛ sa loga aā bah Jɛhova. (Levitikɔs 11:44, 45) Taɛ nu anua alu ebɛɛ̄ kɔ i loga na kɔ i gbī e “nɔ Bari.”—Pya Ɛfɛsɔs 5:1.

⁵ Pya nu alu edɛm tɔgɛ i kɛ̄ Jɛhova ɛmadɛɛ̄ tɔɔ̄ ɛɛ doo. Jɛhova bee doo kɔ pya nu a dɛm a tɛ̄na lo a doo kɔ efɔp le maā a ɛɛ. (Jeremia 10:12) Naa kɛɛrɛ kɛ̄ kɛnɛkɛ̄ obia kwa aba ɛɛ doo sɔ̄ miɔŋɔ nɛɛ egbeera ye sah. Bu edoba, Jɛhova bee dɛm pya nu a le dum a tera gbɛnɛ alu ekue microbes, lo a dap lu emuɛ̄ tɛ̄maloo aba kpe ɛma nu a kura microscope. Microbes dap nyaana pya nu ebee i yɔ doo kɔ aa i yɔ. Lo ama dooa bu sīdee a kuī. Pya saɛns esu nage pio microbes ama nyaana taāŋa ebee sira sɔ̄ alu egbee ziī kɛ̄.—Pya Rom 1:20.

6, 7. Bu mɛ sīdee na lok Mozis tɔgɛ kɔ pya ba taāŋabah Jɛhova ɛrɛ etɔɔ̄ ɛɛ a?

⁶ Lok Jɛhova bee nɛ pya Izrɛl tɛ̄mabah Mozis tɔgɛ nage kɛ̄ tɔɔ̄ ɛɛ lu gbɛnɛ doo. Bu edoba, ba ɛrɛ ele ɛɛ bu namloo lokwa Jɛhova su wa taāŋabah. Nyɔɔ dee Doonu Uu Pɔrɔ, nɛɛ tɛsī ewɔp ɛrɛ  ebira maā baɛ sɔ̄. (Levitikɔs 16:4, 23, 24) E lɛɛ pya dɔɔ̄na nɛɛ ewɔp gae waara zɔɔ, ba ɛrɛ eloga bah le tɔ wa. (A’aa 30:17-21; 2 Nu a bee lu edoo 4:6) Bu pio kɛ̄tɔɔ̄, lo ba naa gbaɛ̄tɔ̄loo lok akiiloo tɔɔ̄ ɛɛ, ba e u.—Levitikɔs 15:31; Buā 19:17-20.

⁷ E nii’ee ni a? I dap nɔ gbɛnɛ-edo nu aāloo lo lok. (Malaki 3:6) A sirapie kɔ, alu ebɛɛ̄ kɔ pya ba taāŋabah Jɛhova a tɔɔ̄ ɛɛ. Daakuu Jɛhova sii nyaa. A lege gaa ɛmadɛɛ̄ aābah pya ba ye taāŋabah kɔ ba a tɔɔ̄ ɛɛ sa loga loo.—Jemes 1:27.

8. Bu pya amunu sīdee na i ɛrɛ etɔɔ̄ ɛɛ a?

⁸ Dookɛ̄ Jɛhova ɛmadɛɛ̄ doo, lu nɛɛ a tɔɔ̄ ɛɛ eenyɔɔ aba sere i ekpaloo, bɛloo, le i be ɛɛrɛ. Tɔɔ̄ ɛɛ ina loo dɛ̄dɛɛ̄ gah loo i tɔɔ̄dum. Gbaā nage loo i taāŋabah, i dogo, le nu i kɛɛrɛ. Aiī, lɛɛ Jɛhova gae ɛma i dɛɛ̄ nua pya a tɔɔ̄ ɛɛ, i ɛrɛ e’ɛɛ sa loga bu dɛ̄dɛɛ̄ i sīdee tɔɔ̄dum.

9, 10. E na a kura kɔ i ɛɛ bu i taāŋabah a?

⁹ Logaloga taāŋabah. Ii le eyere bee bu ekwɔ sīdee taāŋabah bu lɔgɔ sīdee. Sɔ̄ pya Izrɛl bee le kpɔgɔrɔ li Babilɔn, pya ba bee wa tɛɛ̄ ɛŋɛnɛ bee le pya a taāŋabah yɔ sa kunagā. Aisaia bee mɔmanudɛɛ̄ kɔ pya Izrɛl e’obia kii wa buɛ̄ sa sikɛ̄ wu logaloga taāŋabah. Jɛhova bee wa kɔ nɛ kɔ: “Aaraa, Aaraa, Aaraa a kɛ̄ ama; bui aa daabaloo lɔgɔ nu a naa ɛɛ! Aaraa ye taɛ yɛɛ, ɛɛraa  ɔŋia.” Ba naale edap su tɔgɛnu, dogo, ale doonu yigabari pya Babilɔn yere yɛɛ taāŋabah Jɛhova.—Aisaia 52:11.

¹⁰ Pya kaka Nɛɛ Kraist anii’ee kpoora nage loo lɛɛloo ekwɔ sīdee taāŋabah. (Buū 1 Pya Kɔrint 10:21.) Tɛɛ̄ ɛŋɛnɛ nyɔuwe, gbɛnɛ-edo doonu kɛnɛkɛ̄, doonu ziī ziī barasī, le yiga dɛɛa nyɔɔ tɔgɛnu pya ekwɔ sīdee taāŋabah. Bu edoba, bu doonu gbɛnɛ-edo barasī, pya nɛɛ yiga kɔ a ɛrɛ nu a i le bu a kiisī lo etɔɔ̄dum sɔ̄ i u, e a ɛrɛ gbɛnɛkpo doonu a dɛɛa nyɔɔ yiga ama. (Eklisiastis 9:5, 6, 10) Lu ebɛɛ̄ kɔ pya Nɛɛ Kraist a kiī dua doonu ama. Pya i butɔ dap i su bah ekpo aā kɔ i gbaa wa loo bu pio nu ama. Mɛ nyɔɔbee i gbī kɔ Jɛhova a ɛma i dɛɛ̄ nua pya a tɔɔ̄ ɛɛ a, ii yiga edoo wo.—Doonu pya Nɛɛ lɛɛratam 5:29.

11. E na a kura tɔɔ̄ ɛɛ bu i dogo a?

¹¹ Dogo a ɛɛ. Lokwa Jɛhova i ɛmadɛɛ̄ nua pya a ɛɛ, i ɛrɛ ekiī ɛrɛgeba bee kunagā. (Buū Pya Ɛfɛsɔs 5:5.) Bu Baibol, Jɛhova kɔ i nɛ kɔ i “teera aaloo kue wa.” A doo kɔ i suā leere kɔ pya ba kunagā sa naa kiiya “naa ɛrɛ eyii Buɛ̄-mɛnɛ Bari.”—1 Pya Kɔrint 6:9, 10, 18; buū 22 Ue ale dumɛ.

12, 13. E na anua alu ebɛɛ̄ kɔ i ɛɛ bu i ekɛɛrɛ a?

¹² Ekɛɛrɛ a loga. Pya nu nɛɛ kɛɛrɛ na a wee daā dogo a. (Matiu 5:28; 15:18, 19) Ekɛɛrɛ a loga edoo kɔ i doo dogo bu sīdee a loga. Kɛādoo, ii mmana, nyɔɔwo i wee ɛrɛ pɔrɔ ekɛɛrɛ aā ziī  sɔ̄ yii ziī. Lee kɔ i kiī pɔrɔ ekɛɛrɛ aba sɔ̄ a i yii bu. Lo ii doo wo, sɔ̄ sɔ̄ gaa kiisī i dap muɛ̄ kɔ i beenyiɛ naa ɛɛ na. I dap gbī edoo pya nu i gaa bee kɛɛrɛ a. Taāwo, i ɛrɛ edoo kɔ logaloga ekɛɛrɛ a mma i bu beenyiɛ. (Buū Pya Filipai 4:8.) Nyɔɔwo, i kiī pya nu a doodoo kunagā ale sīdee ɛrɛ ekpeloo a tɔgɛ dogo lumiī. I nwaɛ̄dɛɛ̄ sɔ̄ i gaa sagɛ nu i buū, si ee sa kɔ ue kumaloo.—Le-yɔɔ 19:8, 9.

¹³ Lo etɔɔ̄ bia bu wereloo Bari, i ɛrɛ eloga bu i taāŋabah, i dogo, le nu i kɛɛrɛ. Mɛ Jɛhova gbī nage kɔ i tɔɔ̄ ɛɛ bu namloo.

14. E na anua alu ebɛɛ̄ kɔ i tɔɔ̄ ɛɛ bu namloo a?

¹⁴ Sɔ̄ i doo kɔ i ekpaloo le kɛ̄ i tɔɔ̄ a ɛɛ, ili le pya nɛɛ le ii le e’ɛrɛ biī aāloo. Loo i esukɛ̄ sa enia pya dɔɔ̄na ele i kpaɛ̄. Mɛ a ɛrɛ gbɛnɛ nu anua i tɔɔ̄ ɛɛ bu namloo. I tɔɔ̄ ɛɛ su ka nua loo Jɛhova. Naa kɛɛrɛ bu kɔ: Lo o muɛ̄ ziī gbagbara nwiī alu biaɛ loo dɛ̄dɛɛ̄ sɔ̄, bu a naale e’ɛɛ loo ye tɛ le ye ka. Bu aba lo sīdee, lo ii kuūdɛɛ̄loo aba ii leere sa kwaaloo i, bu pya nɛɛ dap biira loo Jɛhova. Pɔɔl bee kɔ: “Ili ii doo lɔgɔ nu a edoo kɔ nɛɛ a wɛɛa dɔ, lokwa lɔgɔ beebee naa lu egbī muɛ̄ bu i esiatam.”—2 Pya Kɔrint 6:3, 4.

15, 16. E na i dap doo lo etɔɔ̄ ɛɛ a?

¹⁵ I ekpaloo le nu i yaa. Lu ebɛɛ̄ kɔ i wee  kwaaloo i dɛ̄dɛɛ̄ dee. Bu edoba, i bira maā dɛ̄dɛɛ̄ dee. I su sop le maā loŋa bah, eetɔɔ̄ na lɛɛ i gae bui nuede ale sɔ̄ i de nu, sa i aa lɔɛ edoo wo sɔ̄ i aa bu uwe ale sɔ̄ i daabaloo nu alu biaɛ. Loga bah etɔɔ̄ i loo bee nu a tera, mɛ alu ebɛɛ̄ lokwa i doo kɔ bacteria le dumɛnu aa yaara. Dap nage kpɔā dum. Lo ii ɛrɛ tɔ bi, i dap nage kpoogeloo i bu uwe bu le sīdee. Pya Izrɛl a dee kere naa wee ɛrɛ tɔ bi, nyɔɔwo ba wee li kɛ̄ a binia aa kpaɛ̄ wa be le kɛ̄ maā le.—Deuteronomi 23:12, 13.

¹⁶ Naa lu ebɛɛ̄ kɔ pya bɛloo i yaa a kpedɛɛ̄ gbɛnɛ, sidu, ale lu aā. Mɛ, a le ɛɛ sa ɔŋia loo.  (Buū 1 Timɔti 2:9, 10.) I gbī kɔ kɛ̄ i mɛā doo dɛ̄dɛɛ̄ sɔ̄ a nua ka loo Jɛhova.—Taitɔs 2:10.

17. E na anua i gbī kɔ i be le kɛ̄ i tɔɔ̄ a ɛɛ a?

¹⁷ I be le kɛ̄ i tɔɔ̄. Kaɛlɛɛ kɛ̄ i tɔɔ̄, i kwa i be doo kɔ a tɔɔ̄ ɛɛ. I muɛ̄ nage kɔ i fah, kpe, ale ɛrɛgeba gbɛnɛ fah i teera a le ɛɛ, eetɔɔ̄ na lo i wee siā nɔnu le uwe zue ue. Nyɔnɛbee sɔ̄ i gaa zue ue i wee kɔ nu akiiloo tɔɔ̄dum bu paradais a ɛɛ. (Luk 23:43; Mumuuna 11:18) Kɛ̄ i be le kɛ̄ i tɔɔ̄ mɛā doo dap tɔgɛ kɔ i gaa kpɛ̄naloo baɛ dum bu aā nyɔuwe a ɛɛ.

18. E na anua i gbī kɔ kɛ̄ i tɔɔ̄ taāŋabah a le ɛɛ a?

¹⁸ Kɛ̄ i tɔɔ̄ taāŋabah. I tɔgɛ kɔ tɔɔ̄ ɛɛ lu i gbɛnɛ loo sɔ̄ i kwa kɛ̄ i tɔɔ̄ nɔnu, ale Tɔ Nɔnu Buɛ̄-mɛnɛ ale kɛ̄ i tɔɔ̄ ɛrɛ asɛmbli ɛɛrɛ. Tua sɔ̄ pya nɛɛ lu Tɔ Nɔnu Buɛ̄-mɛnɛ, ba wee muɛ̄ kɛ̄ a le ɛɛ doo. Lo ama wee su ka nua loo Jɛhova. Doodoo nɛɛ a le bu bɔŋanaloo, dɛ̄dɛɛ̄ ii ɛrɛ dee lo ekwa Tɔ Nɔnu Buɛ̄-mɛnɛ doo kɔ a tɔɔ̄ ɛɛ sa kwa kɛ̄ a gbe a le loo.—2 Nu a bee lu edoo 34:10.

19. E na alu ebɛɛ̄ kɔ i kpooraloo lɛɛloo a?

¹⁹ Kere Baibol naa kue bee dɛ̄dɛɛ̄ dogo a naa ɛɛ, a nɛ i pya daakuu lo a i yerebah nɛ kɔ i dābeeloo kɛ̄ pio dogo tɔɔ̄loo Jɛhova doo. A naa gbī kɔ i ɔ̄ sɔɔ̄, ɔ̄ miī tɛɛā dɛɛ̄ ale ɔ̄ pɔrɔ pie. Doodoo pya alu gbo Bari, i kpooraloo aaloo pya dogo ama. E na anua a? Nyɔnɛbee i tɔgɛ kaāna enwadɛɛ̄ loo dɔɔ̄nu dum. Pya dogo ama dap  kpuree i dum, i yere dumɛnu loo, sa yere muū loo pya le ii le. Gbɛnɛ-edo nɛɛ piiga lo e’ɔbɛ pya dogo ama nyɔɔbee wa dum nwanaloo. Kerewo, doodoo pya gbo Jɛhova, taɛ nu anua i ɔbɛ na nyɔɔbee i were ye loo. Ziī nwiī nɛɛwa bee kɔ: “Tɛ̄maloo yerebah Jɛhova, m bee sere na dum ɛɛrɛ lɛɛloo ɔ̄ pɔrɔ pɔrɔ pie. . . . M kɛɛrɛ kɔ mm le ebee dap doo pya lo nyaa nyɔɔ na loo.” Doo i naa kɛɛrɛbu o’oo daakuu a le bu Baibol lo edap yerebah nɛ nɛɛ kɔ a ɔbɛ pya pɔrɔ dogo ama.

20, 21. Pya amunu dogo na Jɛhova gbī kɔ i kpooraloo lɛɛloo a?

²⁰ “Kɛ̄ i ɛrɛ yii ama doo, pya na wereloo, doolo i loga ilii loo aaloo dɛ̄dɛɛ̄ nu a gbee ekpaloo le edɔɔ̄, sa doo nu kaɛ mmɛ bu bɔɔ loo Bari.” (2 Pya Kɔrint 7:1) Jɛhova gbī kɔ i ɔbɛ pya dogo a dap gbee i ekpaloo le i ekɛɛrɛ beenyiɛ.

²¹ Ziī gbɛnɛ nu anua “i loga ilii loo aaloo dɛ̄dɛɛ̄ nu a gbee” nɛɛ lu ekɔ bu 2 Pya Kɔrint 6:17, 18. Jɛhova kɔ i nɛ kɔ: “Bui aa daabaloo lɔgɔ nu a naa ɛɛ.” Lɛɛ a yira yii kɔ: “E mda esu i bɔɔlo leere. E mda elu Tɛ i nɛ, e bɔɔlo elu pya na miɔŋɔ-nɛɛdam le miɔŋɔ-nɛɛwa.” Bu kaka, Jɛhova ewere i loo dookɛ̄ tɛ wee wereloo pya ye miɔŋɔ doo, lo i kpooraloo lɛɛloo pya nu egbee i sa doo kɔ i aa ɛɛ kiikɛ̄ a le.

22-25. Pya amunu daakuu Baibol na a i dap yerebah nɛ kɔ i kpooraloo lɛɛloo dogo a naa ɛɛ a?

²² “Wereloo Nɛɛ-a-i-ɛrɛ o Bari bu dɛ̄dɛɛ̄ o  beenyiɛ le dɛ̄dɛɛ̄ o piogi, le dɛ̄dɛɛ̄ o ekɛɛrɛ.” (Matiu 22:37) Lo ama na a kuī ee dɛ̄dɛɛ̄ lok a. (Matiu 22:38) Jɛhova gbī kɔ i were ye loo aābu dɛ̄dɛɛ̄ i beenyiɛ. I tɔgɛge kɔ i were ye loo lo i doo nu ekpuree i dum sa gbee i ekɛɛrɛ ni? Taāwo, i doo dɛ̄dɛɛ̄ nu i dap doo lo etɔgɛ enwadɛɛ̄ loo dum Bari i nɛ.

²³ “[Jɛhova] nɛ dɛ̄dɛɛ̄ nɛɛ dum le piogi le dɛ̄dɛɛ̄ nu.” (Doonu pya Nɛɛ lɛɛratam 17:24, 25) Lo o gbo nɛ a ziī le dɔɔ̄nu, o topge bie ale gbee ye sī ni? Dum lu ziī nyɛŋia dɔɔ̄nu Jɛhova i nɛ. I tɔgɛ kaāna nia loo dɔɔ̄nu ama. Nyɔɔwo, i gbī esu i dum daānu bu sīdee enɛ ye ka.—Le-yɔɔ 36:9.

²⁴ “O wereloo o nɛɛ yɔrɔ le doodoo oloo loo.” (Matiu 22:39) Dogo a naa ɛɛ naa yere muū loo aba ili. Ba dap nage yere muū loo pya dɔɔ̄na, lo a dap lu pya i wereloo kaāna. Bu edoba, nɛɛ a nyɔɔnɛ nɛɛ a wee ɔ̄ sɔɔ̄ tɔɔ̄ aba tɔ dap ɛrɛ eyɔloo aāloo zuura ye sɔɔ̄miā. Mɛ sɔ̄ i ɔbɛ pɔrɔ dogo, i tɔgɛ pya le ii le kɔ i weree wa loo.—1 Jɔn 4:20, 21.

²⁵ “Nyɛŋia wa bu kɔ ba a sere wa loo kɛɛ̄ pya a wa bɛɛ, lo pya a ɛrɛ ekpo, lo egbaɛ̄ wa tɔ̄loo.” (Taitɔs 3:1) Bu gbɛnɛ-edo buɛ̄, lok naa yerekpotɛ̄ kɔ nɛɛ a ɛrɛ ale su pio pie daā nu. Kuma sɔ̄ Jɛhova nɛ lok kɔ i nwadɛɛ̄ pya a gaa bɛɛ a, i gbaɛ̄tɔ̄ pya lok ba sere.—Pya Rom 13:1.

26. (a) E na i doo lokwa Jɛhova su i taāŋabah a? (b) E na anua tɔɔ̄ ɛɛ kɛ̄ dɛɛ̄ Bari lu kaāna sīdee tɔɔ̄dum a?

 ²⁶ Lo i gbī eyii gbo Jɛhova, i muɛ̄ kɔ a bɔloo kɔ i nyaana pio i dogo. Lo a le wo, ii le epee sɔ̄ lo enyaana. Naa wee aadee waɛ enyaana pɔrɔ elap dogo, mɛ i dap wa nyaana! Jɛhova yira yii kɔ eyeree bah i nɛ. A kɔ: “Mda na Jɛhova o Bari a, lo a a tɔgɛ kɛ̄ e’ɛrɛ biī doo, lo a a ture bu dee o ɛrɛ ekii.” (Aisaia 48:17) Sɔ̄ i piiga lo etɔɔ̄ ɛɛ sa loga, i dap suā leere kɔ i gaa su ka nua loo Bari.