1. E na alu ebɛɛ̄ kɔ i doo lokwa Jɛhova su i taāŋabah a, e e na anua a?

JIZƆS bee kɔ: “Pya a tuabah kɛ̄ bu kaka etuabah kɛ̄ nɛ Tɛ bu edɔɔ̄ le kaka, nyɔnɛbee dua pya lo ba ama na Tɛ gbī kɔ ba a tuabah kɛ̄ ye nɛ a.” (Jɔn 4:23; 6:44) Ziī ziī ii ɛrɛ e “ɛp leere nu a enia Nɛɛ-a-i-ɛrɛ.” (Pya Ɛfɛsɔs 5:10) Lo ama naa wee aa dee waɛ dɛ̄dɛɛ̄ sɔ̄. Setan wee gbī edag i lokwa i doo nu a bɛā Jɛhova.—Mumuuna 12:9.

2. Naa baatɛ̄ nu a bee sira kpaɛ̄ Kpokɛ̄ Sinai.

² Bu mɛ sīdee na Setan gbī edag i a? Ziī sīdee na tɛ̄maloo ekwɔɔgɛ i lɛɛ loo suā nu a lee le nu a bee piya. Yere nukuādɛɛ̄ loo nu a bee sira loo pya Izrɛl sɔ̄ ba bee bɔŋia kpaɛ̄ Kpokɛ̄ Sinai. Mozis ebee kii nyɔɔ kpokɛ̄, sa pya nɛɛ gaa bee ye yira baɛ kɔ a obia lu. Ɛrɛ kɛ̄ a ina a mma wa etɔɔ̄ ye baɛ sa ba kɔ nɛ Erɔn kɔ a kwa bari wa nɛ. A bee su gold kwaā nam nua nwīnɛɛpie wa nɛ. Lɛɛ pya lo nɛɛ doo doonu. Ba bee yep tɛɛ̄ ɛŋɛnɛ lo nam sa ye uubeekɛ̄ nɛ. Ba yiga kɔ sɔ̄ ba uubeekɛ̄ nɛ lo nam,  taɛ Jɛhova na ba gaa taāŋae bah a. Mɛ kɔ pya nɛɛ ama ɛmadɛɛ̄ doonu ama nua “doonu . . . Jɛhova,” naa doo kɔ a lee. Jɛhova bee ɛmadɛɛ̄ nua taāŋabah yɔ, sa gbɛnɛ-edo aba bee u. (A’aa 32:1-6, 10, 28) E na i nɔ aāloo a? O aa yiga kɔ alu edag a. O aa “daabaloo lɔgɔ nu a naa ɛɛ,” e doolo Jɛhova a tɔgɛ nu a lee le nu a bee piya.—Aisaia 52:11; Ezekiel 44:23; Pya Galetia 5:9.

3, 4. E na anua a bɔloo kɔ i suā kɛ̄ doonu gbɛnɛ-edo nɛɛ gaa doo bee bɔātɛ̄ doo a?

³ Sɔ̄ Jizɔs bee le a kɛnɛkɛ̄, a bee kpɔā pya ye nɛɛ lɛɛratam kɔ ba a sere le edoba bu taāŋabah bu sīdee a ɛɛ. Sɔ̄ Jizɔs e’ua sah, pya nɛɛ lɛɛratam bee kiisī lo etɔgɛ pya nu Jɛhova gbī, nɛ pya aā nɛɛ a nyɔɔnɛ dumɛ Jizɔs. Mɛ sɔ̄ dɛ̄dɛɛ̄ pya nɛɛ lɛɛratam e’ua sah, pya esah tɔgɛnu bee bɔātɛ̄ su esah le doonu yɔ le pya dɔɔ̄na doonu yere bu bɔŋanaloo. Ba bee nyaana nage bee pio lo doonu yɔ lokwa a bee lo pya Nɛɛ Kraist. (2 Tɛsalɔnaika 2:7, 10; 2 Jɔn 6, 7) Gbɛnɛ-edo nɛɛ lege gaa doo gbɛnɛkpo doonu ama mmɛ anii’ee, sa lenage gaa nyimɛ ekwɔ yiga le doo-yɔ. *—Mumuuna 18:2-4, 23.

⁴ Tɛɛ̄ ɛŋɛnɛ nyɔuwe, sere doonu dee seseea lu nu a kuī bu dum pya nɛɛ. Mɛ kuma sɔ̄ o kiisī lo enɔ kɛ̄ Jɛhova ɛmadɛɛ̄ nu doo, o dap muɛ̄ kɔ alu  ebɛɛ̄ kɔ o nyaana o ekɛɛrɛ akiiloo pya doonu ama. Edap a aga bah, mɛ suā leere kɔ Jɛhova eyerebah a nɛ. Doo i naa ɛp kɛ̄ pio gbɛnɛ doonu bee bɔātɛ̄ doo lokwa i suā kɛ̄ Jɛhova wa ɛmadɛɛ̄ doo.

5. E na a tɔgɛ kɔ Jizɔs naa bee mɛā 25 biradee bu Lop Le Baɛ Enɔɔ̄ a?

⁵ Gbɛnɛkpo barasī wee doo doonu Krismas 25 biradee bu Lop Le Baɛ Enɔɔ̄, lo gbɛnɛ-edo nɛɛ kɛɛrɛ kɔ ɛɛ dee Jizɔs bee mɛā. Baibol naa kɔ biradee ale enɔɔ̄ Jizɔs bee mɛā, mɛ a kɔ ue kumaloo sɔ̄ a bee mɛā bu zua. Luk ɛm kɔ Jizɔs bee mɛā bie Bethlehem, sɔ̄ “pya awee tɔɔ̄loo naana pee bee le bu wii gaa ɛp wa pee bu edɛɛ̄.” (Luk 2:8-11) Bu Lop Le Baɛ Enɔɔ̄, tɔɔ, boo, le snow wee le buɛ̄ Bethlehem, mmɛ lo kɛ̄ ba naale edap le ee kpaɛ̄ wa naana pee uunɛ. E na i nɔ aāloo lo ama ani? Jizɔs bee mɛā sɔ̄ bu dee bee le le, e a naale bu Lop Le Baɛ Enɔɔ̄. Baibol le eloh kere tɔgɛ kɔ a bee mɛā dee bu Enɔɔ̄ ili kure Ɛrɛnia le Lop Enɔɔ̄.

6, 7. (a) Gbɛnɛ-edo nu ba doo bu Krismas bee bɔātɛ̄ doodoo wa? (b) E na anua i dɔɔ̄nu nɛ pya dɔɔ̄na a?

⁶ Nyɔɔwo, Krismas bee bɔātɛ̄ aā mɛ kɛ̄? A aaloo pio doonu yɔ, doodoo doonu pya Rom a kura Saturnalia ba wee doo nɛ wa bari Saturn ba kure bari a nɛ leelee nu alu efoh. The Encyclopedia Americana kɔ: Pya nu ba wee doo lo e ɛā ekpeloo bu doonu pya Rom a kura “Saturnalia a wee lu edoo kuna kuna bah Lop Le Baɛ Enɔɔ̄ a, na ba ɛp su daā  doonu Krismas a. Bu edoba, aāloo doonu ama na alu e’ɛrɛ gbɛnɛ de nuede, dɔɔ̄gi nu nɛ nɛɛ, le muī kandle a.” Gbaāloo wo, dee ba kɔ bari zue pya Pesia a kura Mithra bee mɛā na 25 biradee bu Lop Le Baɛ Enɔɔ̄.

⁷ Kerewo, gbɛnɛ-edo nɛɛ a doo doonu Krismas anii’ee naa suā kɔ a bee bɔātɛ̄ aāloo doonu yɔ. Ba aadee ɛmadɛɛ̄ Krismas nua sɔ̄ ele kpaɛ̄ pya wa  butɔ, sɔ̄ de le nuede, sa dɔɔ̄nu nɛ pya nɛɛ. Kɛādoo, i wereloo pya i butɔ le pya i gbo, e Jɛhova gbī nage kɔ pya ye zooro a dɔɔ̄nu nɛ pya dɔɔ̄na. Dookɛ̄ 2 Pya Kɔrint 9:7 i kɔ nɛ doo, “Bari wereloo nɛɛ a su ɛɛbu nɛā.” Jɛhova naa gbī kɔ i dɔɔ̄nu nɛ pya nɛɛ aba nyɔɔ dee keebee doonu. Wee ɛɛrɛ bu pya nɛɛ Jɛhova lo edɔɔ̄nu sa nyɔɔnɛ pya wa butɔ ɛrɛ ekpeloo dɛ̄dɛɛ̄ sɔ̄ bu zua, sa ii ɛmadɛɛ̄ kɔ ba a sikɛ̄ i dɔɔ̄nu nɛ. Ba wee dɔɔ̄nu nyɔɔbee ba wereloo pya dɔɔ̄na.—Luk 14:12-14.

8. E kɔ pya suānu bee nɛge dɔɔ̄nu Jizɔs aba sɔ̄ a mɛā aā ni? Naa baatɛ̄.

⁸ Lo eyere kpotɛ̄ kɔ a bɔloo edɔɔ̄ nu sɔ̄ Krismas, gbɛnɛ-edo nɛɛ kɔ taa pya suānu bee su dɔɔ̄nu ma Jizɔs sɔ̄ a bee mɛā bie bu tɔ naana pee. Lu kaka kɔ a ɛrɛ pya ba bee inaloo Jizɔs sa ye dɔɔ̄nu nɛ. Bu sɔ̄ a bee lu e’ɛm Baibol, pya nɛɛ wee dɔɔ̄nu nɛ nɛɛ a lu gbɛnɛ. (1 Pya Mɛnɛ-Buɛ̄ 10:1, 2, 10, 13) Mɛ o suāge kɔ Baibol kɔ pya nɛɛ ama wee ɛp sī bunyɔɔ, pya doo edɔɔ̄ lo ba naa wee taāŋabah Jɛhova ni? Gbaā nage loo wo, ba naa bee inaloo Jizɔs sɔ̄ a bee mɛā bie bu tɔ naana pee. Ba bee ye inaloo sɔ̄ esaa, sɔ̄ ebee lu zege “nwiī” bie tɔ.—Matiu 2:1, 2, 11.

9. Pya amunu doonu dee nɛɛ bee mɛā na Baibol i kɔ nɛ a?

⁹ Dee nwiī mɛā wee lu dee ɛɛbu. (Le-yɔɔ 127:3) Mɛ lo ama naa kura kɔ i nyɛŋiabu dee nɛɛ bee mɛā. Naa kɛɛrɛ lo ama: Aba baɛ ka doonu dee nɛɛ  bee mɛā alu ekɔ nu kumaloo bu Baibol. Ziī aba na nyɛŋiabu dee Fɛro Mɛnɛ Ijipt bee mɛā, sa lo dɔɔ̄na na nyɛŋiabu dee Mɛnɛ Herod Antipas bee mɛā. (Buū Jɛnɛsis 40:20-22; Maak 6:21-29.) Baɛ mɛnɛ ama naa wee taāŋabah Jɛhova. Bu kaka, i sii buū aābu Baibol kɔ ziī nɛɛ a wee taāŋabah Jɛhova bee doo doonu dee nɛɛ bee mɛā.

10. Bu mɛ sīdee na pya tuatua Nɛɛ Kraist bee ɛmadɛɛ̄ sere doonu dee nɛɛ bee mɛā a?

¹⁰ Kpa a kura The World Book Encyclopedia kɔ pya tuatua Nɛɛ Kraist “bee ɛmadɛɛ̄ sere doonu dee ɛrɛgeba nɛɛ bee mɛā nua doonu yɔ.” Dua doonu ama aaloo ekwɔ yiga. Bu edoba, pya Grik a dee kere bee yiga kɔ dɛ̄dɛɛ̄ nɛɛ ɛrɛ edɔɔ̄ a wa baɛloo lo alu edɔɔ̄ a bee le kɛ̄ dee lo nɛɛ bee mɛā. E ba kɛɛrɛ kɔ lo edɔɔ̄ aaloo ziī bari a mɛā aba biradee lo nɛɛ bee mɛā. Kaɛlɛɛ dua ekwɔ sīdee yiga ama, sere doonu dee nɛɛ bee mɛā ɛrɛ nage nu edoo kiiloo ɛp sī bunyɔɔ le ɛp sī dee kɔā nu esira loo nɛɛ.

11. Tɔɔ̄loo Jɛhova doodoo wa sɔ̄ i para dɔɔ̄ nu?

¹¹ Gbɛnɛ-edo nɛɛ kɛɛrɛ kɔ dee ba bee mɛā lu keebee dee lo a bɔloo kɔ ba a tɔgɛ nia loo sa wereloo. Mɛ i dap tɔgɛ wereloo kumaloo pya i butɔ le pya i gbo dɛ̄dɛɛ̄ sɔ̄ bu zua, taā alu aba ziī keebee biradee. Jɛhova gbī kɔ i lu fɛgɛ sa dɔɔ̄nu nɛ pya nɛɛ dɛ̄dɛɛ̄ sɔ̄. (Buū Doonu pya Nɛɛ lɛɛratam 20:35.) I doo ye yaa dɛ̄dɛɛ̄ biradee kɔ a nɛ i dum a kuī, naale aba nyɔɔ dee i bee mɛā.—Le-yɔɔ 8:3, 4; 36:9.

12. Bu mɛ sīdee na dee i u lee ee dee i bee mɛā a?

 ¹² Kpa Eklisiastis 7:1 kɔ: “Le bee lee eenyɔɔ nɔɔ̄ elɛra a si gbɛnɛ du, e dee luh nɛɛ lee ee dee a bee mɛā.” Bu mɛ sīdee na dee i u lee ee dee i bee mɛā a? Sɔ̄ i bee mɛā i sii bee su i dum daā lɔgɔ nu, kere le ale pɔrɔ. Mɛ sɔ̄ i su i dum siātam nɛ Jɛhova  sa doo le loo pya dɔɔ̄na, i gaa kwa “le bee,” ale nu i lu, e Jɛhova e nyɛŋia i bu kere sɔ̄ i e’ua. (Job 14:14, 15) Pya nɛɛ Jɛhova naa wee nyɛŋiabu dee ba bee mɛā ale dee Jizɔs bee mɛā. Bu kaka, aba doonu Jizɔs bee i nɛ lok kɔ i doo na Nyɛŋiabu loo ye luh.—Luk 22:17-20; Pya Hibru 1:3, 4.

13, 14. E na doonu Easter kiiloo a?

¹³ Gbɛnɛ-edo nɛɛ kɛɛrɛ kɔ ba gaa seree doonu aakɛ̄ bu luh Jizɔs sɔ̄ ba doo doonu Easter. Mɛ bu kaka, doonu Easter aaloo Eostre, bari nɛɛwa pya America le Britain, lo ba kɛɛrɛ kɔ a kuūdɛɛ̄loo lɔɔrɛ le sɔ̄ a le taɛ yɛɛ sɔ̄ tɔɔ le sɔ̄ zue. Kpa a kura, The Dictionary of Mythology baatɛ̄ kɔ a bee lunage bari leelee nu. Pio nu alu edoo bu doonu Easter tɔgɛ lo ama. Bu edoba, kpa a kura Encyclopædia Britannica kɔ “wee lu esu kɛ̄kɔɔ̄ nua nu a yira dɔ aā dum le aakɛ̄ bu luh.” Gbaāloo wo, wee lu ekɔ nuū-beke tɔɔ̄dɔ leelee nu bu taāŋabah yɔ. A sirapie kɔ Easter naa kiiloo aakɛ̄ bu luh Jizɔs.

¹⁴ Sɔ̄ Jɛhova muɛ̄ sɔ̄ pya nɛɛ su ekwɔ sīdee taāŋabah gwaloo aakɛ̄ bu luh ye Nwiīnɛɛdam, ɛɛrɛge ye bu ni? Eeye. (2 Pya Kɔrint 6:17, 18) Bu kaka, Jɛhova naa kɔ i sere doonu aakɛ̄ bu luh Jizɔs.

15. Halloween bee bɔātɛ̄ doodoo wa?

¹⁵ Halloween, lunage ekure All Hallows’ Eve ale Uunɛ Dɛ̄dɛɛ̄ Dee Pya Kaɛ, ɛrɛ nu edoo kiiloo pya  ebɛŋ, pya taa, le pya edɔɔ̄. Doonu ama naa lu aā. Sɔ̄ enɔɔ̄ ekpugere loo waɛloo 1 biradee bu Lop Le Eziī Enɔɔ̄, pya Celts a kere li Britain le Ireland wee doo doonu a kura Samhain. Ba yiga kɔ bu doonu ama, edɔɔ̄ pya e’ua wee obia lu nyɔuwe. Pya nɛɛ wee tɛrɛ ziā kɛ̄ sa egara miī kɛ̄ lokwa pya edɔɔ̄ naa bɛ wa. Sɔ̄ pya miɔŋɔ yaanu bee wa sa kiā aa ziī tɔ yii ziī sa kɔ “Dɔɔ̄ nu mɛ nɛ taā m doo a nu,” ba naa suā kɔ ba gaa nɔ doonu yɔ a dee kere.

16, 17. E na i kɛɛrɛ bu sɔ̄ i gaa nɔɔ doonu iya dam le wa a?

¹⁶ Doonu iya dam le wa lu doonu ɛɛbu. Lu edoo doonu iya dam le wa bu keekee sīdee bu nyɔuwe. Pya nɛɛ naa wee kɛɛrɛ kɛ̄ pio nu alu edoo bu doonu iya dam le wa aa, nyɔɔwo, ba naa suā kɔ pio ɛɛ dap lu doonu yɔ. Mɛ pya Nɛɛ Kraist a gaa nɔɔ doonu iya dam le wa a muɛ̄ kɔ alu edoo bu sīdee e’ɛɛrɛ bu Jɛhova. Lo ba suā kɛ̄ doonu iya dam le wa bee bɔātɛ̄ aa, ba ebiaɛfii leere.—Maak 10:6-9.

¹⁷ Pya nɛɛ kɛɛrɛ kɔ pio doonu iya dam le wa edoo kɔ pya ba gaa iya ziī aā a, a ɛrɛ ‘le gbɔɔsī.’ (Aisaia 65:11) Bu edoba, pya nɛɛ wee top rice ale nu a ye bee tɛrɛ loo pya ba gaa iya ziī a. Ba yiga kɔ lo ama edoo kɔ dam le wa ama a ɛrɛ gbomiɔŋɔ, le bu ɛɛbu, tɔɔ̄ nyɔɔnyɔɔ dee dum sa ebaɛ wa loo lɛɛ bu taāŋa. Mɛ pya Nɛɛ Kraist enwaɛ̄dɛɛ̄ lokwa ba naa doo lɔgɔ doonu akiiloo ekwɔ sīdee taāŋabah.—Buū 2 Pya Kɔrint 6:14-18.

18. Pya amunu daakuu Baibol na a kɔ ue nyɔɔ doonu iya dam le wa a?

 ¹⁸ Dam le wa ba lu Nɛɛ Kraist wee gbī kɔ wa doonu iya dam le wa alu lo ɛɛbu le ka le loo sa kpeloo dɛ̄dɛɛ̄ nɛɛ a si. Pya saanɛɛ ba si doonu iya dam le wa pya Nɛɛ Kraist naale ekɔ ue a naa lu fɛgɛ, wa doba kɛ̄ ba emaniakɛ̄ doo nɛ, ale kɔ nu a naa tɔgɛ enwadɛɛ̄ kumaloo dam le wa a, ale pya dɔɔ̄na. (Kam 26:18, 19; Luk 6:31; 10:27) Pya Nɛɛ Kraist naa wee su wa doonu iya dam le wa tɔŋɛ nu ba lu bu “dum.” (1 Jɔn 2:16) Lo o gaa nɔɔ lo edoo doonu iya dam le wa, doo ye bu sīdee enɛ a ɛɛbu sɔ̄ o sikɛ̄ kɛɛrɛ bu.—Buū 28 Ue ale dumɛ.

19, 20. Kuɛ̄ kɔp loo ziī bee bɔātɛ̄ doodoo wa?

¹⁹ Ziī nu gbɛnɛ-edo nɛɛ wee doo bie doonu iya dam le wa le bie pya dɔɔ̄na doonu sɔ̄ ba bɔŋia na kuɛ̄ kɔp loo ziī. Sɔ̄ ba gaa kuɛ̄ kɔp loo ziī, ziī nɛɛ ekɔ kara sa pya dɔɔ̄na dana wa kɔp miī nɛ nyɔɔ kuɛ̄gi loo ziī. Pya Nɛɛ Kraist e’ɛmadɛɛ̄ kuɛ̄ kɔp loo ziī doodoo wa?

²⁰ Kpa a kura, International Handbook on Alcohol and Culture kɔ, dap lu kɔ kuɛ̄ kɔp loo ziī lu e’ɛrɛ aāloo doonu yɔ a kere “lo ba wee egara miī kɛ̄ nɛ pya wa bari.” Ba wee doo wo “lo e’ɛrɛ leelee, sa kɛ̄ kuma lo kara ba gbaa kɔ ‘nyɔɔnyɔɔ dee dum na i bara a!’ ale ‘nwanaloo na i gbī a!’ ” Dee kere a, pya nɛɛ wee dana wa kɔp nɛ nyɔɔ lo ebara leelee aābah pya wa bari. Mɛ Jɛhova naa wee nɛ leelee nɛɛ doo wo.—Jɔn 14:6; 16:23.

21. Pya amunu doonu na pya Nɛɛ Kraist naale e’ɛrɛ epoo bu a?

²¹ Sɔ̄ o gaa biaɛfii lo o sudɔ bu ɛrɛgeba doonu ale oo le esudɔ bu, kɛɛrɛ nu akiiloo dogo le elap a yere kpotɛ̄. Bu edoba, pio doonu le bii lu lo ba yep bu sīdee a lobara taɛ kunagā, ɔ̄ miī tɛɛā dɛɛ̄, sa kuna nage gā bu. Dua doonu ama dap zū pya nɛɛdam kɔ ba a māloo ziī sa pya nɛɛwa mā nage loo ziī, ale kɔ o doo nu enia bui edo emanyɔɔ. Lo i si dua doonu ama, i gaa baage loo nu Jɛhova baaloo ni?—Le-yɔɔ 1:1, 2; 97:10; 119:37.

22. E na eyerebah nɛ Nɛɛ Kraist kɔ a biaɛfii lo esuge dɔ bu ziī doonu a?

²² Lu ebɛɛ̄ kɔ pya Nɛɛ Kraist aa si pya doonu a naa nua ka loo Bari. Nɛɛ lɛɛratam Pɔɔl bee ɛm kɔ: “Nyɔɔwo kere bɔɔlo de ale ɔ’ɔ, ale ɛrɛgeba nu bui doo, dooraa dɛ̄dɛɛ̄ nu lo enɛ ka Bari.” (1 Pya Kɔrint 10:31; buū 29 Ue ale dumɛ.) Kerewo, naale dɛ̄dɛɛ̄ doonu na akiiloo kunagā, ekwɔ sīdee taāŋabah, ale yere kpotɛ̄ ziī edo a. Lo ziī doonu naa be daakuu Baibol, i su i loo biaɛma fii lo i suge dɔ bu. Lee kɔ i ɛpnage kɛ̄ i biaɛfii e’ɛrɛ pah nyɔɔ pya dɔɔ̄na doo.

23, 24. Bu mɛ sīdee na i dap baatɛ̄ i biaɛfii akiiloo pio doonu nɛ pya i butɔ ba naale Pya Ekeebee a?

²³ Pio sɔ̄ o edaba ɔbɛ esudɔ bu pya doonu a naa nɛ ka Jɛhova. Mɛ pio pya o butɔ ba naale Pya Ekeebee Jɛhova dap kɛɛrɛ kɔ lo ama tɔgɛ kɔ bu a naa ɛɛnae wa loo ale oo gbīna ele wa kpaɛ̄. Ba  dap ɛmadɛɛ̄ kɔ aba sɔ̄ seseea na butɔ dap gbaaloo a. Nyɔɔwo, ena o doo a? A ɛrɛ gbɛnɛ-edo sīdee o dap doo kɔ ba a suā kɔ o weree wa loo le kɔ o ɛp wa nua gbɛnɛ. (Kam 11:25; Eklisiastis 3:12, 13) O dap wa kue kɔ ba a le a kpaɛ̄ pya dɔɔ̄na sɔ̄.

²⁴ Lo pya o manamana gbī esuā nu anua oo doona pio doonu, o dap si bu pya i kpa ale nyɔɔ jw.org wee ɛrɛ ue eyerebah a nɛ kɔ o baatɛ̄ pya nu anua wa nɛ. O aa doo kɔ ba a kɛɛrɛ kɔ o gaa wa nyɔɔnɛ amkɛ̄ lokwa o wa eeba ale su bah ekpo wa aā kɔ ba a su nu o kɛɛrɛ. Yerebah nɛ pya o butɔ kɔ ba a suā kɔ o ebee kɛɛrɛbu gbɛnɛ-edo nu lɛɛ o gae biaɛfii doo wo. Fɛɛrɛloo, sa doo kɔ o “ekɔaue a lu ewonu dɛ̄dɛɛ̄ sɔ̄, top loh.”—Pya Kɔlɔsi 4:6.

25, 26. Bu mɛ sīdee na pya tɛ le ka dap yerebah nɛ pya wa miɔŋɔ kɔ ba a wereloo daakuu Jɛhova a?

²⁵ Alu ebɛɛ̄ kɔ dɛ̄dɛɛ̄ ii i dābeeloo nu anua ii sudɔ bu pio doonu. (Pya Hibru 5:14) Nu i seea sī na lo edoo nu enia Jɛhova. E lo i lu tɛ le ka, i su sɔ̄ yeābah nɛ pya i miɔŋɔ kɔ ba a dābeeloo sa tɔgɛ nia loo zuurabahtɔ̄ a le bu Baibol. Sɔ̄ ba muɛ̄ kɔ Jɛhova lu kaāna nɛɛ a le, ba alaba egbī nage edoo nu a ye nia.—Aisaia 48:17, 18; 1 Pita 3:15.

²⁶ Bu Jɛhova ɛɛ lo emuɛ̄ kɔ i gaa doo kuma kɛ̄ i dap doo lo etaāŋa ye bah bu sīdee a ɛɛ sa kaāna. (Jɔn 4:23) Mɛ gbɛnɛ-edo nɛɛ kɛɛrɛ kɔ nɛɛ naa dap kaāna bu nyɔuwe a naa kaāna ama. Lo ama luge kaka ni? Doo i kɔ ue nyɔɔ lo ama bu ekobee ue enyɔɔnɛ.