1, 2. E na alu ebɛɛ̄ kɔ i suā akiiloo Setan le pya ye gbo-yɔ ani?

DUM bu aā nyɔuwe Jɛhova elu nyɛŋia. Bu kpɛdumɛ, i tɔɔ̄dum dookɛ̄ Jɛhova bee gbī kɔ i tɔɔ̄ doo. Mɛ nyaawo, i tɔɔ̄ bu nyɔuwe Setan le pya ye gbo-yɔ gaa baɛbee. (2 Pya Kɔrint 4:4) Kere ii wa dap muɛ̄, ba le sa ba si ekpo gbɛnɛ.

² Bu ekobee ue ama, i gaa le kɔ ue nyɔɔ kɛ̄ i dap tɔɔ̄ bialoo Jɛhova le kɛ̄ i dap kpooraloo i lɛɛ loo Setan doo. Jɛhova yira yii kɔ a gaa le yereebah i nɛ. Mɛ alu ebɛɛ̄ kɔ i suā pya sīdee Setan gbī esu i daŋa sa i tɛrɛ.

3. E na Pɔrɔ-edɔɔ̄ gbī edoo i loo a?

³ Setan kɔ miɔŋɔ nɛɛ taāŋabah Jɛhova nyɔɔ nu ba e’ɛrɛ le kɔ i ɔbɛ etaāŋa ye bah lo kɛ̄tɔɔ̄ aga i loo. (Buū Job 2:4, 5.) Sɔ̄ ziī nɛɛ tɔgɛ kɔ a gaa gbī enɔe nu akiiloo Jɛhova, Setan le pya ye gbo-yɔ muɛ̄, sa ba egbī e’ɔbɛ ye. Bu wa biira sɔ̄ ba muɛ̄ kɔ ziī nɛɛ kiī ye dum nɛ Jɛhova sa liamaā. Baibol su Pɔrɔ-edɔɔ̄ dooreloo “sasa-ekpo a gaa pɔm, sa gbī nɛɛ a eba.” (1 Pita 5:8) Setan gbī  egbee gbanialoo i nyɔɔnɛ Jɛhova ɛrɛ.—Le-yɔɔ 7:1, 2; 2 Timɔti 3:12.

4, 5. (a) E na Setan naale edap doo a? (b) E na a kura “gbanasī Pɔrɔ-edɔɔ̄” a?

⁴ Mɛ a naa lee kɔ bɔɔ a aa i loo Setan le pya ye gbo-yɔ. Jɛhova kpaɛ̄ pio nu ba ebee i doo loo. Jɛhova yira yii kɔ “gbɛnɛ-edo nɛɛ” a aa yɛɛ pya kaka Nɛɛ Kraist etɛɛ̄ yeebah “gbɛnɛ etɛɛrɛloo.” (Mumuuna 7:9, 14) Pɔrɔ-edɔɔ̄ naale edap doo lɔgɔ  nu lo edoo kɔ lo ama aa sira, nyɔnɛbee Jɛhova gaa baɛloo pya ye nɛɛ.

⁵ Lo i tɔɔ̄ bialoo Jɛhova, Setan naale edap gbee gbanialoo i ye ɛrɛ kumaloo. Muɛ̄ Ue Bari agɛrɛ i nyiɛ kɔ: “Jɛhova le i loo, sɔ̄ bɔɔlo ye le loo.” (2 Nu a bee lu edoo 15:2; Buū 1 Pya Kɔrint 10:13.) Gbɛnɛ-edo pya nɛɛdam le nɛɛwa ba bee ɛrɛ yira a dee kere doodoo, Enɔk, Noa, Sera, le Mozis, bee gbanasī Pɔrɔ-edɔɔ̄ tɛ̄maloo etɔɔ̄ bialoo Jɛhova. (Pya Hibru 11:4-40) Ili dap nage doo wo. Muɛ̄ Ue Bari yira yii kɔ: “Gbanasī Pɔrɔ-edɔɔ̄ e a eteera i aaloo.”—Jemes 4:7.

6. Bu mɛ sīdee na Setan i bebe loo a?

⁶ Kere Setan suā kɔ Jɛhova e’ɔbɛ pio nu a i dap doo loo, a lege gaa gbī edoo dɛ̄dɛɛ̄ nu a dap lo e’ɔɛloo i gbanialoo kiikɛ̄ Bari le. Nii’ee, Pɔrɔ-edɔɔ̄ gaa i bebe loo bu gbɛnɛ-edo sīdee, sa a gaa su pya kiaŋana a bee beā be bu booboo zua akii adumɛ daā. Pio lo kiaŋana na e?

7. E na anua Setan gaa bebe loo pya nɛɛ Jɛhova a?

⁷ Nɛɛ lɛɛratam Jɔn bee ɛm kɔ: “Dɛ̄dɛɛ̄ nyɔuwe tɔɔ̄ kɛ̄ bah nɛɛ pɔrɔ a.” (1 Jɔn 5:19) Setan gaa baɛbee pɔrɔ nyɔuwe ama, sa a gbī nage e baɛbee pya nɛɛ Jɛhova. (Maika 4:1; Jɔn 15:19; Mumuuna 12:12, 17) Pɔrɔ-edɔɔ̄ suā kɔ a naa ɛrɛnae gbɛnɛkpo sɔ̄, nyɔɔwo, a gaa su gbɛnɛ ezū nua nyɔɔ ziī ziī ii lokwa ii tɔɔ̄na agara nɛ Bari. Pio  sɔ̄ Pɔrɔ-edɔɔ̄ tɛ̄ma sīdee a aga, mɛ pya dɔɔ̄na sɔ̄ a tɛ̄ma ewɛpbah sīdee.

8. E na alu ebɛɛ̄ kɔ ziī ziī Nɛɛ Kraist a suā a?

⁸ I buū bu kpa Pya Ɛfɛsɔs 6:12 kɔ: ‘Ili bebe loo pya edɔɔ̄ li keekee kɛ̄tɔɔ̄ li bunyɔɔ.’ Ziī ziī Nɛɛ Kraist gaa bebe loo Pɔrɔ-edɔɔ̄ le pya ye gbo-yɔ. Alu ebɛɛ̄ kɔ i suā kɔ dɛ̄dɛɛ̄ pya a kiīloo nɛ Jɛhova gaa be lo be. Bu lɛta Pɔɔl bee ɛm ma Pya Ɛfɛsɔs, a bee zū pya Nɛɛ Kraist taa sɔ̄ kɔ ba a “yira agɛrɛ.”—Pya Ɛfɛsɔs 6:11, 13, 14.

9. E na Setan le pya ye gbo-yɔ gbī edoo i loo a?

⁹ Setan le pya ye gbo-yɔ gbī edag i tɛ̄ma keekee sīdee. Lo i bee gbanasī Setan tɛ̄ma ziī sīdee, naa kura kɔ a naa dap i eeba tɛ̄ma dɔɔ̄na sīdee. Pɔrɔ-edɔɔ̄ gbī kɛ̄ i ɔloo lokwa a suā lo zaɛ̄ e’aā i. Mɛ a naa lee kɔ a aa i, nyɔnɛbee Baibol gaa i tɔgɛ pya zaɛ̄ Pɔrɔ-edɔɔ̄. (2 Pya Kɔrint 2:11; buū 31 Ue ale dumɛ) Ziī lo zaɛ̄ na doo yɔ.

10. (a) E na a kura doo yɔ a? (b) Bu mɛ sīdee na Jɛhova ɛmadɛɛ̄ doo yɔ a?

¹⁰ Doo yɔ kiiloo su keebee ekpo daānu lo a doo kɔ nɛɛ a dap nyɔɔnɛ yɔ kɔnia ue, pio ɛɛ na kɔ nu esira, doo ebɛŋ, kaɛ nu nɛ nɛɛ, gbī enyɔɔnɛ pya ba e’ua kɔnia ue. Baibol kɔ i nɛ kɔ doo yɔ lu “saāŋa” le kɔ ii dap lu nɛɛ a gaa doo yɔ sa i taāŋa nage bah Jɛhova. (Deuteronomi 18:10-12; Mumuuna 21:8) Pya Nɛɛ Kraist ɛrɛ ekpooraloo lɛɛloo dɛ̄dɛɛ̄ sīdee doo yɔ.—Pya Rom 12:9.

11. E na ɛrɛ nia bu su keebee ekpo daānu i dap zū kɔ i doo a?

 ¹¹ Setan suā kɔ lo su keebee ekpo daānu nia i, ewaɛ ye bah ezū i yere bu doo yɔ. Ɛrɛgeba sīdee doo yɔ egbee i gbanialoo kiikɛ̄ Jɛhova le.

12. Bu mɛ sīdee na Setan gbī egbee i ekɛɛrɛ a?

¹² Setan gbī ekwɔ ekɛɛrɛ pya nɛɛ. A doo kɔ ba a ɛrɛ baɛbaɛ ekɛɛrɛ sa kinakina, ba kɛɛrɛ kɔ “pɔrɔ le, e le pɔrɔ.” (Aisaia 5:20) Pɔrɔ-edɔɔ̄ gbī kɔ pya nɛɛ a kɛɛrɛ kɔ zuurabahtɔ̄ a le bu Baibol naa lee, le kɔ bu i e’ɛɛ gbɛnɛ lo ii nyɔɔnɛ nu Bari kɔ.

13. Bu mɛ sīdee na Setan gbī edoo kɔ pya nɛɛ a ɛrɛ baɛbaɛ beenyiɛ a?

¹³ Doo kɔ pya nɛɛ a ɛrɛ baɛbaɛ ekɛɛrɛ lu ziī sīdee Setan esua daŋa gbɛnɛ-edo nɛɛ. E sua daŋa nɛɛ bu nyɔɔnyɔɔ sɔ̄ lo. Bie bu gɔh Idɛn, a bee doo kɔ Iv a ɛrɛ baɛbaɛ beenyiɛ sɔ̄ a ye bip kɔ: “Bari bee kɔge [kɔ] bui aa de bee a aaloo ɛrɛgeba te a le bu gɔh a?” (Jɛnɛsis 3:1) Sɔ̄ esaa bu dee Job, Setan bee bip Jɛhova bie kɛ̄sī pya ɛnjɛl kɔ: “Lege bu yɔrɔ na Job ɛrɛ bɔɔ loo Bari a?” (Job 1:9) Sɔ̄ Jizɔs liamaā sah, Setan bee ye amkɛ̄ loo kɔ: “Lo a le o lege nwiīnɛɛdam Bari, kɔ nɛ pya lo ekpo dɛm ama kɔ ba alu bee fituru.”—Matiu 4:3.

14. Bu mɛ sīdee na Setan dap doo kɔ pya nɛɛ a ɛrɛ baɛbaɛ beenyiɛ kɔ doo yɔ bee piya a?

¹⁴ Nii’ee, Pɔrɔ-edɔɔ̄ gaa kiigesī lo edoo kɔ pya nɛɛ a ɛrɛ baɛbaɛ beenyiɛ. A gbī edoo kɔ pya nɛɛ a kɛɛrɛ lo a le doo yɔ luge nu a bee piya tɛ̄maloo edoo kɔ pio sīdee doo yɔ a bee kɔ a naa bee piya.  Elua nage edag kere pio Nɛɛ Kraist. (2 Pya Kɔrint 11:3) Nyɔɔwo, e na i dap doo lo ekpega i loo a? I doodoo wa lokwa Setan naa su pya ye kiaŋana i daŋa? Doo i naa ɛp baɛ sīdee a i dap dagɛ: sīdee ɛā ekpeloo le dooa pie loo.

15. Bu mɛ sīdee na i dap nyɔɔnɛ pya gbo-yɔ dania nu tɛ̄maloo sīdee i ɛrɛ ekpeloo a?

¹⁵ Nii’ee, pya fim, vidio, pya nu alu etɔgɛ nyɔɔ TV, kɔmputa game, le nyɔɔ intanɛt tɔŋɛ pya yɔ, doo magic, le keebee ekpo. Gbɛnɛ-edo nɛɛ ɛmadɛɛ̄ pya nu ama nua nu a kpeloo sa taāŋa naale loo, e ba naa suā nu bɔɔ a le bu su loo biiloo pya yɔ. Nɛɛ dap nage tɛ̄maloo pya nu a doodoo ɛp sī bunyɔɔ daā edɔɔ̄, ɛp kɛɛ̄ ekaɛbah nɛɛ, tarot card, le crystal ball daā yɔ. Pɔrɔ-edɔɔ̄ gɔ̄ taāŋa a wee sira aaloo pya nu ama sa doo kɔ a bee kɔ pya nu ama lu nyɛŋia, kpeloo sa lu bii. Nɛɛ dap nage kɛɛrɛ kɔ lɔgɔ pɔrɔ naale bu si ee pya nu a tɔgɛ doo yɔ ale keebee ekpo kuma sɔ̄ a naale alɛ na a gaa doo a. E na anua alu nu bɔɔ lo e’ɛrɛ dua ekɛɛrɛ ama ani?—1 Pya Kɔrint 10:12.

16. E na anua i kiī sīdee ɛā ekpeloo a tɔgɛ keebee ekpo a?

¹⁶ Setan le pya gbo-yɔ naa dap suā nu a i le bu beenyiɛ. Mɛ ba dap suā nu a i nia le nu i gaa kɛɛrɛ tɛ̄maloo e’ɛp pya nu i sagɛ lo edoo nɛ i loo le i butɔ, gbaāloo sīdee i ɛā ekpeloo. Lo i sagɛ pya fim, yɔɔ, ale kpa ba kɔ nu akiiloo pya nwī-aa-yɔ, pya doo magic, pya yɔ, pya ebɛŋ, pya ɔ̄ miī loo  nɛɛ, ale dua nu a le doo wo, Setan le pya ye gbo-yɔ esuā kɔ i gbī esuā nu a wa kiiloo. Lo sɔ̄, ba egbī edoo kɔ i agɛrɛbah yii bu doo yɔ.—Buū Pya Galetia 6:7.

17. Bu mɛ sīdee na Setan i dap dag tɛ̄maloo i taɛ lo ele bu nwanaloo a?

¹⁷ Setan dap nage i dag tɛ̄maloo i taɛ lo ele bu nwanaloo. Nii’ee gbɛnɛ-edo nɛɛ gaa tɔga nyɔɔ dumɛloo. Pio nɛɛ e’ɛrɛ keekee sīdee boa, sa loo wa sii nwaɛ. (Maak 5:25, 26) Bɔɔ dap wa aa sa ba gbī e’ɛrɛ boa tɛ̄ma ɛrɛgeba sīdee. Mɛ doodoo pya  Nɛɛ Kraist, i ɛrɛ enwaɛ̄dɛɛ̄ lokwa ii gbī boa tɛ̄maloo ‘ekpo magic.’—Aisaia 1:13.

18. Mɛ dua boa na pya Nɛɛ Kraist e amana a?

¹⁸ Bie Izrɛl a dee kere, a ɛrɛ pya ba bee su ‘ekpo magic’ daānu. Jɛhova bee wa kɔ nɛ kɔ: “Sɔ̄ bui yaari baɛ bah i, m gaa le gɔ̄ na baɛ dɛɛ̄ i lɛɛ loo; kere bui yere booboo kara, mm le egbaɛ̄tɔ̄.” (Aisaia 1:15) Naa kɛɛrɛ, Jɛhova naale egbaɛ̄ nage tɔ̄ wa kara! Ii gbī edoo lɔgɔ nu egbee i gbanialoo kiikɛ̄ Jɛhova le, sa doo kɔ aa i yerebah nɛ, eetɔɔ̄ na sɔ̄ loo i dumɛ. (Le-yɔɔ 41:3) Nyɔɔwo, i ɛrɛ egbītɛ̄ lo kɛ̄ i gaa le ɛrɛ boa doo kiiloo doo yɔ ale a kiiloo su keebee ekpo daānu. (Matiu 6:13) Lo a bee kɔ a kiiloo, i amana!—Buū 32 Ue ale dumɛ.

19. Bu mɛ sīdee na Pɔrɔ-edɔɔ̄ doo kɔ bɔɔ a aa pya nɛɛ a?

¹⁹ Pio nɛɛ ɛmadɛɛ̄ kɔ Pɔrɔ-edɔɔ̄ le pya gbo-yɔ naale, mɛ pya dɔɔ̄na suā leere kɔ ba le aāloo nu esira wa loo. Gbɛnɛ-edo nɛɛ bia bu bɔɔ loo pya pɔrɔ-edɔɔ̄ sa lu zooro nɛ pya doonu a aaloo ekwɔ yiga. Pya dɔɔ̄na doo kɔ bɔɔ a aa pya nɛɛ tɛ̄maloo kɔ loo akiiloo kɛ̄ pya pɔrɔ-edɔɔ̄ bee doo pɔrɔ-pɔrɔ nu loo pya nɛɛ doo. Gbɛnɛ-edo nɛɛ wee ɛrɛ nia loo pya loo ama sa ɛrɛ taɛ lo esikɛ̄ kɔ nɛ pya dɔɔ̄na. Pya loo ama doo kɔ pya nɛɛ a ɛrɛ bɔɔ loo Pɔrɔ-edɔɔ̄.

20. Bu mɛ sīdee na i dap yaari esah akiiloo Setan nɛ pya dɔɔ̄na a?

²⁰ Naa kɛɛrɛbu lo ama, Setan gbī kɔ bɔɔ a aa  pya nɛɛ ye loo. (2 Pya Tɛsalɔnaika 2:9, 10) Alu nɛɛ esah a suā kɛ̄ egɔm ekɛɛrɛ pya ba gbī edoo yɔ doo sa doo kɔ ba a yiga pya nu a naa lu kaka. Pya nɛɛ ama dap kɔ loo akiiloo nu a bee kɔ ba bee muɛ̄ sa dā. Kɛ̄ pya nɛɛ kɔgara loo ama doo, kɛ̄ ba kɔnage yɛgɛ yeekɛ̄ doolo. Ii gbī eyerebah nɛ Setan lo ewee yere bɔɔ bu pya nɛɛ tɛ̄maloo ekɔgara pya loo a le doo wo.—Jɔn 8:44; 2 Timɔti 2:16.

21. Taā i kɔgara loo akiiloo pya gbo-yɔ, e na i dap kɔ ue kumaloo a?

²¹ Lo a ɛrɛ nu a sira loo ziī nɛɛ Jɛhova a aabah pya yɔ, a naa lee ebialoo kɔgara nɛ pya dɔɔ̄na. Naa lu ebɛɛ̄ kɔ bɔɔ a aa pya nɛɛ Jɛhova loo nu Setan le pya ye gbo-yɔ dap doo. Taāwo, alu ebɛɛ̄ kɔ i bie ekɛɛrɛ nyɔɔ Jizɔs le ekpo Jɛhova enɛā ye. (Pya Hibru 12:2) Jizɔs naa bee kɔgara loo akiiloo pya yɔ nɛ pya a wee ye nyɔɔnɛ dumɛ. Nu a bee kɔgara na yereue akiiloo Buɛ̄-mɛnɛ le “gbɛnɛ booboo tam Bari.”—Doonu pya Nɛɛ lɛɛratam 2:11; Luk 8:1; Pya Rom 1:11, 12.

22. E na o biaɛfii lo edoo a?

²² Ii le e’ibere kɔ Setan gaa gbī egbee gbanialoo i ɛrɛ kiikɛ̄ Jɛhova le. Edoo dɛ̄dɛɛ̄ nu a dap lo egbee gbanialoo i ɛrɛ kumaloo Jɛhova. Mɛ i suā dɛ̄dɛɛ̄ kiaŋana Setan, e i ebiarafii lo ekiī dɛ̄dɛɛ̄ sīdee doo yɔ. Ii le e “nɛ lɔgɔ dee Pɔrɔ-edɔɔ̄” kɔ a ɔɛloo i biaɛfii. (Buū Pya Ɛfɛsɔs 4:27.) Aiī, lo i gbanasī Pɔrɔ-edɔɔ̄, ii le edɔ bu ye zaɛ̄, e Jɛhova ebaɛ i loo.—Pya Ɛfɛsɔs 6:11.